1 CODINTIYO 7 - Wanaadi A'deddu

Jötaanä jäcä wä’wätuujanä

¹ Eduuwa wimenna öwwadäädä ämmenno’jocoomo aca cäcamma’ja’quennö jäcä. Aashicha eijai ña ijööta’da dhanwa weiya’jäcä;

² yaawääne’ jooje wä’yunaacanä yeijäcä töwaadäiñe dhanwaacomo töjiiñantoncomo tödööjai ñaato, wodiiñamo mmaja töwaadäiñe töiñonootoncomo tödööjai ñaato dea.

³ Dhanwa oowontäjai’cha na töjiiñamo wwä; yääje mmaja wodi, töiño wwä oowontäjai’cha na dea.

⁴ Wodi täjö edhaajäje’da na, iiñoone; dhanwa mmaja täjö edhaajäje’da na dea, ijiiñamoone.

⁵ Oowontä’da eichäcä änwannoje dea. A’nädä yääje aweicho’como jäcä awa’deuwa’comjäcä mmaane yääje eijai maato, a’dhe mma, Wanaadi wwä wa’deunä jäcä mma awei’she aweiya’comjäcä. Yää ’jeje oojodööjai maato dea yaawä, Caajuushawa mma adhencu’toto’no yaawä änshinchä’da aweichöcoomo ai.

⁶ Äwäätuujadööcomooje mma yääje wä’döa äwwäiñe, adhaanontädööcomoojönö yeichaame.

⁷ Öwö waadöje mmaja tameedä awei’sheiñe waadö’je; yaawääne’, yoowanääcä na awaadäiñe Wanaadi nutuudu töweiye yeichö aweicho’como, anejja yääje, anejja ’quene yääje’da.

⁸ Edääje wä’döa tö’dhemjöncomo wwä, töiñoquemjöncomo wwä mmaja: Aashicha eijai ña mädääje maatoodöje dea aweiya’comjäcä, öwö waadöje mmaja.

⁹ Yaawääne’, änshinchä’da aweiya’comjäcä ijöötajai maato, ätöiñonoojai mmaja. Aashicha mädääje eijai maato, jooje ätö’tajäätödööcomo queiñe.

¹⁰ Edääje wiyäätuujaato töiñoca’como, tö’dha’como mmaja. Cajiichaana waanontädö jaiñoone wecamma, öwö tö’tajäätödö mmajöönö. Wodi töiño e’nomjajai’cha na.

¹¹ Töiño e’nomja’jäcä töiñoque’da nei’ñojo, ñäädä jadä dea jeiñe mma nä’dö’ñojoode. Dhanwa mmaja töjiiñamo e’nomjajai’cha na.

¹² Anejjacoomo wwä öwö tö’tajäätödö wecamma, Cajiichaana waanontädööjönö yeichaame; äwäätuujadööcomooje mma yääje wä’döa. Aneecamjö’da quedeiyente jiñamo yeiya’jäcä, töjiiñamo wwä tujunne töweichaame ñäädä quedeiyente töjiiñamo e’nomjajai’cha na.

¹³ Aneecamjö’da quedeiyente ño yeiya’jäcä jeiñe mma, töwö iiño chääjadä dea töwei’she yeiya’jäcä, ñäädä quedeiyente töiño e’nomjajai’cha na.

¹⁴ Ñäädä aneecanö’jönö ijiiñamo quedeiyenteje yeichö jäcäinchädä Wanaadi wwonooje na; wodi aneecanö’jönö iiño quedeiyenteje yeichö jäcäinchädä Wanaadi wwonooje na dea. Dha’da ei’jo mmaane ännacontoncomo eichöto aneecanö’jöncomo nacontoncomo nönge; yääje’daane naato, Wanaadi wwonoojeene naato.

¹⁵ Quedeiyentejöönö e’nomjaneije yeiya’jäcä mmaane tödöötojo ’je’da na; tancanoode’da ñäädä quedeiyente eijai ña yaawä. Aashicha töweiyaamoje Wanaadi ca’dejjatääne, töwäätäuwaamoje’daane.

¹⁶ Edääje wä’dö’se wa äwwäiñe, änwanno quedeiyentecoomo: Amäädä wodi, ¿oiño quedeiyenteje’da naadö ewaanacaajai aweichö jäcä chö’tajäätö’da ca määnene? Amäädä mmaja dhanwa, ¿ajiiñamo quedeiyenteje’da naadö ewaanacaajai aweichö jäcä chö’tajäätö’da ca määnene?

¹⁷ Änwanno eijai maato awaadäiñe aweicho’como Cajiichaana nutuudu woije, Wanaadi wwä adha’dejjadaawäiñe mä’ja’quennö nönge dea. Mädääje tameedä Quidiito sotoi tönoowanoomaiñe wääneneeto.

¹⁸ Siicunsidaadoje aweichö Wanaadi wwä adha’dejja’jäcä, siicunsidaadoje’da äwä’dötoojo manencano’täi’che. Yääje’da aweichö Wanaadi wwä adha’dejja’jäcä mmaane, yääje äwä’dötoojo manencano’täi’chede.

¹⁹ Dötä’da na yää siicunsidaadoje weiñä, yääje’da weiñä dötä’da mmaja. Wanaadi waanontä’jödö tödöödö mmaane dötä na.

²⁰ Awaadäiñe eijai maato Wanaadi wwä adha’dejjadaawäiñe mä’ja’quennöje dea.

²¹ Tädhaajäque aweichö Wanaadi wwä adha’dejja’jäcä cone’da männöi yää tädhaajäque aweichö. Yaawääne’, tädhaajäque aweichö jonno äwäätu’catoojo ecamma’jäcä mänquiiñemeecöi.

²² Ñäädä Cajiichaana Jesuuquidiito wwä ta’dejjadaawä tädhaajäque cönä’ja’dö, eduuwa tädhaajäque yeichö jonno u’caajä töweiye naichöje na, Cajiichaana Jesuuquidiito anoonöje yeichö wetä. Yääje mmaja ñäädä ta’dejjadaawä tädhaajäque’da cönä’ja’dö; Quidiito anoonöje na eduuwa ñäädä.

²³ Wanaadi wwä täjeema maato täjeeto que; yääje yeijäcä adheedhajootoncomo neeneje soto tödööjai’cha maato.

²⁴ Yääje yeijäcä jimmä, awaadäiñe Wanaadi jadä eichäcä adha’dejjadaawäiñe mä’ja’quennöje dea.

²⁵ Ñanno tö’dhemjöncomo jäcä, töiñoquemjöncomo jäcä mmaja Cajiichaana waanontädö ’je’da öwwä na. Yääje yeichaame öwö tö’tajäätödö wecamma, tätamje önwätuujadö yeijäcä, Cajiichaana ni’wa’tädööne weiyajä.

²⁶ Jooje wätä’maminchajoonä cöjääcäiñe töweiye yeijäcä aashicha eijai öwwä chö’tadö na naadöje dea dhanwa yeiya’jäcä.

²⁷ Tö’dhe aweiya’jäcä, tö’dhe’da aweichojo manencano’täi; tö’dhe’da aweiya’jäcä jeiñe mma, tö’dhe aweichojo daja manencano’täi.

²⁸ Yaawääne’, ajööta’jäcä cone’da’da na, wodi wätöiñonooa’jäcä cone’da’da mmaja. Ajööta’comjäcä, äwäätöiñonooa’comjäcä mmaja, conemjönö meneeaato’de edä nono de’wä; mädä wwä adheewontä’seiñe waadö’je.

²⁹ Edääje wä’dö’se weichö mädä jimmä: Amoinche’da nä’döi chu’nä’taajä. Eduuwa naadö jonno ñanno tö’dha’como eijai ñaato tö’dhemjöncomo nönge;

³⁰ ñanno wentumje naatoodö eijai ñaato wentumjemjönö nönge daja; ñanno ta’cwaiñe naatoodö eijai ñaato ta’cwaiñemjönö nönge daja; ñanno töwäätätöija’como yää töneejemaadöcoomo tödööjai ñaato tönnödööcomoojönö nönge.

³¹ Ñanno edä nono de’woncomo antawoncomo eijai ñaato edä nono de’woncomo jadoncomoojönö nönge, edä nonoodö täne naadö wataamenääje yeijäcä.

³² Adhaaquiñuuducoomo ’je’daane yei’she wa. Ñäädä tö’dhemjönö nencano’ta Cajiichaana nödöödö, Cajiichaana a’cwaimatoojo.

³³ Tö’dhato mmaane edä nono de’wono nencano’ta, töjiiñamo a’cwaimatoojo daja.

³⁴ Äänönge’da mmaja naato dea ñanno töiñocaato acä töiñoquemjönö. Ñäädä töiñoquemjönö Cajiichaana nödöödö nencano’ta, Wanaadi wwä töwä’tu’se mmaja, chäwwonooje töweichö wetä, aashicha tötö’tajäätödö wetä mmaja. Töiñocaato mmaane edä nono de’wono nencano’ta, töiño a’cwaimatoojo.

³⁵ Mädä wecammajä’a aashicha aweicho’comooje, adheemu’dädööcomooje’daane. Chäänönge awei’sheiñe wa, adhaaquiñuuducoomo ’je’daane Cajiichaana anoonöje meichäiye.

³⁶ Anejja tönnedö ajei’choto’jaato iiñono’se töweiya’jäcä, mude’cäje yeichö töweeja’dä’e yeijäcä, anejjeja tödöötojo ’je’da yeiya’jäcä mmaja, tumjummadö woije nödö’ñojo. Nätöiñono’ñojo ñäädä iiñedö; conemjönööjönö yää.

³⁷ Ñäädä tönnedö iiñono’semjönö mmaane, iiñedö yääje töwei’she yeiya’jäcä mmaja, tooniye ñäädä dhanwa tötö’tajäätödö sha’dumincha’jäcä ätöiñono’da tönnedö weichojo jäcä, aashicha mmaja mädääje eijai ña dea.

³⁸ Mädääje na; ñäädä tönnedö iiñonoonei chäänönge nödööa, ñäädä tönnedö aniiñonoojönö mmaane chäänönge’cä jeene nödööa.

³⁹ Wodi töiño nudä naadawäädä töiño jadoonoje na, waanontänä imennaajä wä’dödö naadöje dea. Töiño wääma’jäcä mmaane tumjummadö woije ätöiñonoojai ña yaawä, yaawääne’ quedeiyente jadä deaane.

⁴⁰ Aashicha’cä jeene eijai ña yäätonno mmaja ätöiñono’da yeiya’jäcä. Mädääje öwö öntö’tammecöödö na; Epíiditu Santo mädääje tö’tamme’joneije nichö’ta.