1 CODINTIYO 6 - Wanaadi A'deddu

Quedeiyentejöncomo wwä cönnödööcomo choonecaajojai’cha cöweichöcoomo

¹ Ajimmotoncomo jäcä cone’da aweichawäiñe ¿ane’que’nei chooneca tönaadä määnetääne äcamma’jonei quedeiyentejöönö wwadäädä, quedeiyente wwadäädäiñeene adääjai aweichaameiñe?

² ¿Odhoowanääcäiñe’da ca’ nai quedeiyentecoomo edä nono de’woncomo emmencannamooje töweiyaamoje yeichöcoomo? Edä nono de’woncomo emmencannamooje töweiyaamoje aweichaameiñe ¿mänö’cä mmädä choonecaajai’cha ca maato?

³ ¿Odhoowanääcäiñe’da ca’ nai amoode emmencannamooje töweiyaamoje cöweichöcoomo? Töwaacö’je mma edä nono de’wono choonecaajai caato.

⁴ Edä nono de’wono töcoonecaamö äwwäiñe töweiye yeichäwä ¿ane’que’nei quedeiyentejöncomo wwä mmädä tönconeecajo määnetääne, ñanno quedeiyente o’näncomo?

⁵ Ajöichojoodöcoomoje yääje wä’döa. ¿Tösejjecaato ’je’da mmädä ca nai adhantawäiñe, quedeiyente nödöödö coneecanei?

⁶ ¿Aaquene mmaja töjimmä jäcä cone’da töweichawä quedeiyente anaadädö deaade’ quedeiyentejöncomo wwadäädäiñe mmädä, ñanno wwäiñe choonecaajodö wetä?

⁷ Cone’da aweichöcoomo dea mädä ajimmotoncomo jäcä cone’da määnetäänedö. ¿Aaquene’ töshinchä mmaane äwwäiñe shincha’jäcä äjääcä conemjönö tödöödö? ¿Aaquene adheememmecöödö shincha’jäcä mmaja?

⁸ Yääje’daane maato; conemjönö tönnöe määnetääne, töneememme’que mmaja, ajimmotoncomo mmädä mmaja.

⁹ ¿Odhoowanääcäiñe’da ca’ nai chäänöngemjöncomo Wanaadi jataacäi täjai’cha yeichöcoomo? Mätäncu’tojootäi’che, ñanno Wanaadi jataacäi täjai’cha naato, töiño jonno, töjiiñamo jonno jeiñe mma anejja enaawä töweiyato, chu’taajä ijummanei mmaja, masuuduijato mmaja, dhanwa acä dhanwa conemjönö tödöönei mmaja,

¹⁰ tämeenato mmaja, anejja nödöödö i’ñeimmanei mmaja, töwä’dau’cwato mmaja, wätunnä edhaajä mmaja, äncu’tänei mmaja; tameedä yääja’como Wanaadi jataacäi täjai’cha naato.

¹¹ Mädääje mä’ja’quene änwanno dhantai, töwäädä adheecoccajootäneene’. Eduuwa Wanaadi wwonooje tösooma maato; Epíiditu Santo ai töwö Wanaadi töjaadonooje ayöödötääne Cajiichaana Jesuuquidiito joi.

Wanaadi wwonooje cäjööcomo tödööjai cöweichöcoomo

¹² Chäänönge yääje soto töwä’döe weneeneto: “Tameedä tödööemje na;” quee. Yääje yeichaame tameedä’daane aashicha dötä na. Tameedä tödööjai cöweichaameiñe ane’cä’cä co’jodheiñe tödööjai’chaane caato.

¹³ Chäänönge mmaja yääje töwä’döe weneeneto dea: “Äwanshi tödööajä na wääwashinchotoojoje; wenö tödööajä na äwanshi ewöötöje;” quee. Yääje yeichaame a’nädäncädä Wanaadi nacoichaja’de yää. Cäjööcomo mmaane Cajiichaana wwonooje tödööajä na, tömaasuduichaamöje’daane, chäädhajääne töwö yeiyajä.

¹⁴ Wanaadi yäämaajo jonno Cajiichaana Jesuuquidiito cönaadoncaichöje mmaja töjäädudu que cadoncaato’de cönwanno.

¹⁵ ¿Odhoowanääcäiñe’da ca’ nai adheejöcoomo Jesuuquidiito ejö jäcoonoje yeichö? Yääje yeiya’jäcä ¿aashicha eijai ñai masuudui ejö jadä Jesuuquidiito ejö ejoodöjoodö? Ng’jn, aashicha’daane.

¹⁶ ¿Odhoowanääcäiñe jönca nai masuudui jadä yoojodööajä tooni chääjöje töwä’döe yeichöcoomo ñäädä masuudui acä? Edääje Wanaadi a’deddu imennaajä nä’döa: “Aacä töweichaameiñe tooniño nönge naato’de;” quee.

¹⁷ Ñäädä Cajiichaana Jesuuquidiito jadoono woojodöödö mmaane tooni chö’tajäätödööcomo na yaawä Jesuuquidiito acä.

¹⁸ Äänejeetäcä masuuduije weiñä jonno. Tameedä anejja conemjönö soto tönnöe weneenetoodö täjööcomo jäcoonojöönö; masuuduichanä mmaane äjö jäcoono.

¹⁹ ¿Odhoowanääcäiñe’da ca’ nai Epíiditu Santo weichojooje adheejöcoomo weichö, ñäädä Wanaadi nutuudu ataacaiñe naadö? Ännödööcomoojönö mädä adheejöcoomo;

²⁰ Wanaadi wwä täjeema maato täjeeto que. Yääje yeijäcä Wanaadi nijummadö woije tödöötäcä adheejöcoomo que, ätö’tajäätödööcomo que mmaja, a’nädä Wanaadi wwonooje yeijäcä.