1 CODINTIYO 5 - Wanaadi A'deddu

Quedeiyente u’cadö jäcä Paudo nimennä’jödö

¹ Adheecadööcomo töweecata weneene conemjönö adhantawäiñe töweiye yeichö, Wanaadi dhowaanojöncomo jadä’jödöödä tödööjaichojöönö, yää senööjaaja dö’tä weiñä.

² Mädä nöngato adhantawäiñe yeichaame o’jodhe tötö’tajä’e määnetääne, töwaamoone aamojai aweichaameiñe. Ñäädä yääjato u’cajai maato ajaadäiñe yeichö jonno.

³ Öwö ajaadäiñe’da weichaame tö’tajäätödööne ajaadäiñe na. Yäätä weichawooto wa’cä tu’camje yeichö wichö’tamme’ca ñäädä yää conemjönö tödöönei.

⁴ Cädhaajotoncomo Jesuuquidiito eetö joi adhe’jummatääcä’de; öwö tö’tajäätödö mmaja ajaadäiñe na’de, Cajiichaana Jesuuquidiito jäduudu mmaja.

⁵ Yaawä ñäädä dhanwa u’täcä’de Caajuushawa wwä, töwö yäämadö wetä, yo’tadö yääwanaacadö wetä yaawä Cajiichaana Jesuuquidiito we’a’jäcä.

⁶ O’jodhe chö’tajä’jai’cha maato mädä ännödööcomo jäcä. ¿Odhoowanääcäiñe’da ca’ nai yää edääje wä’dönä weneenedö: “She’caasa ummannä’cajootojo yeichaame tameedä tunummannä’ca;” quee?

⁷ Yää conemjönö ocoone’maato, jenaado’jä ummannä’cajootojo äwanshi töncone’ma töweiye naichöje mmaja. Yääje yeijäcä emaatäcä, yää ’je’daane meichäiye. Yaawä uu ummannä’cajootojo ’jemjönö töweiye naichöje eijai maato, yää Weja’dätä’jä anootoi’chädö äwä eduuwaato tödööajä täu’cwemööje weneenedö. Quidiito saaquidiijiisiyooje cönäämai cöjääcäinchädäiñe. Töwö yäämatoojo cu’tädööje Weja’dätä’jä anootoi’chädö awä oweeja nnedö’cä tönaamiiñä’ca cönä’ja’to.

⁸ Yääje yeijäcä yää Weja’dätä’jä anootoi’chädö awä tönnöe cönä’ja’todö nönge mmaja cöödötäiye cönwanno aashicha cöweichöcoomo que, chäänönge cöweichöcoomo que mmaja. Yääje weiñä cu’tädööje na yää uu tummannä’cajoojönö. Yää ummannä’cajaajä mmaane conemjönö cu’tädööje na, chäänönge’da weiñä cu’tädööje mmaja. Yääje yeijäcä yääje cöweiyancädäiñe’daane Wanaadi nödöödö cöödöto’ñojo.

⁹ Awa’deeto jajeedä äwwadäädäiñe wimennäneedö aca yääje wimennäne: “Masuuduija’como jadä’da eichäcä;” quee.

¹⁰ Quedeiyentejöncomo masuuduija’como ecammancädäiñe’da yää wimennäne, ñanno anejja nödöödö i’ñeimmannamo, tämeena’como mmaja, chu’taajä ijummannamo mmaja. Ñanno ecammancädäiñe’da yääje wimennäne. Yääje yeichö jäcä yääje ya’deuwö’jo mmaane edä nono de’wä eijai’cha yaawä änwanno.

¹¹ Edääjeene wa’dö’se wä’jaaquene yää wimennäneedö: Ñäädä quedeiyentejaato wätä’tädö jadä meichäi’che masuuduije yeiya’jäcä, anejja nödöödö töni’ñeimma yeiya’jäcä mmaja, chu’taajä tumjumma yeiya’jäcä mmaja, wätunnä dha’me yeiya’jäcä jeiñe mma, töwä’dau’cwato yeiya’jäcä jeiñe mma, tämeene jeiñe mma. Yääjato jadä wääwashinchänä’jödö jadäädä tödööemje’da na.

^12-13 ¿Ane’cotoojo quedeiyentejöncomo wanemmencadööto deeade’ ? Wanaadiiñe ñanno nemmencaato. Quedeiyentecoomo mmaane änwanno emmencajai maato. Yääje yeijäcä ajaadäiñe yeichö jonno u’catääcä’de ñäädä conemjönö.