1 CODINTIYO 4 - Wanaadi A'deddu

Anonta’como tadaawaajuichomo

¹ Yääje yeijäcä Quidiito anoonöje mma ñaa weichö chö’tamme’jai maato, Wanaadi nödöödö owaanojöönö’jödö jäcä ecammajä’nnamooje anonta’comooje mmaja.

² Ñäädä anontaajä chäänönge eijai ña.

³ Cone’da yöödö’da na jääcä awa’deuwödööcomo, äcamma’jonnamo wwä yemmencadö jeiñe mma. Öwwäädä’jödöödä ätämmenca’da wa,

⁴ yoowanääcä’da yeijäcä coone’nadiiyö. Yääje yeichaame conemjönö ’je’da ätä’täjai’cha wa. Cajiichaanaane yemmenca.

⁵ Yääje yeijäcä awa’dennodä’daane emmencatääcä. Cajiichaana neejö’ñojo awa’de, yaawä töwö jaiñoone necaademe’ca’de tameedä tööjato aca etoone’taajä. Töwö necaademe’ca’dede tameedä soto tö’tajäätödööcomo; yaawä Wanaadi chääwaadäiñe niya’deme’caato’de iiñö’jocoomo ’cäwa’cä.

⁶ Jimmä, edä wecammajä’a aashicha aweichöcoomo wetä; yääje yeijäcä Apoodo jäcä ya’deuwa, öwö jääcä mmaja, töja’do’joone’daane Wanaadi a’deddu imennaajä woije meichäiye, o’jodhe chö’tajäätö’da aweichöcoomo wetä mmaja tooni odhoowanoomaneichomo jäcä, yeichacoono chiiñeme’taame.

⁷ ¿Änääcö anejja e’jodhe ayöödöaanä? ¿Ane’cäämö äwwä nai Wanaadi nutuudujöönö? ¿Ane’que’nei Wanaadi nutuuduje yeichaame o’jodhe ätö’tajä’anä owoije aneejodöödö yeichawooto wa’cä?

⁸ Chäänönge jaiño maato dea eduuwä; tameedaasa äwwäiñe töweiye na. Cajiichaana wa’cä maato eduuwa; ñaa mmaane ema’jödööje ñaa mödööato. Cajiichaanaje mmädääne awei’sheiñe wa, cajiichaanaje weiñä ajaadäiñe ñaa onoonejaiyede yaawä.

⁹ Ñaa, anonta’como, tameedä dho’näncomooje Wanaadi wwä ñaa dö’jödö nichö’ta. Soto töwäämaamöje e’taajä nönge ñaa tö’tadö na, tameedä täneemöje tödööajä, amoode neneedöcoomoje, soto neneedöcoomoje mmaja.

¹⁰ Jesuuquidiito jo’tädööje i’jeta’jödööje ñaa e’tätä soto weneeneto, änwanno mmaane quedeiyente towaanojo’na’como. Ñaa na jäduuje’da; änwanno mmaane jäduuja’como wa’cä. Soto ñaa quiiñeme’tä weneeneto, änwanno mmaane yaacö’comje.

¹¹ Eduuwa naadö jona tödööene ämiije ñaa weneene, emjätö’se mmaja, töwonque’da mmaja; töwäätä’maminchajo ñaa weneene dea soto wwäiñe; tömmaiche’da mmaja ñaa na dea.

¹² Töquincha ñaa wä’döaajä na töweetadaawa’cajootö. Soto wwäiñe ñaa quimmajäätödö töneccujä’e ñaa weneene aashicha wa’deunä que. Chäwwäiñe ñaa maminchadö tönshinchä ñaa weneene.

¹³ Cone’da ñaa jäcä ya’deuwödaawäiñe aashicha dea ñaa weneene chääjäcäiñe. Eduuwa naadö jona tödööene i’she’jödö nönge ñaa dötä weneeneto, ema’jödööje mmaja.

¹⁴ Ajöichojooto’comooje’da mädä wimenna, äwäätuujato’comoojeene, önnacoomo umjummadööje aweijäcäiñe.

¹⁵ Quidiito jäcä amoojadä miide odhoowanoomannamo eijai yeichaame, tooni mma oomotoncomo na; öwö oomotoncomooje wa Jesuuquidiito jäcäinchädä, äwwäiñe aashichaato wätunnä ecammajäätö’jödö weijäcä öwwä.

¹⁶ Yääje yeijäcä edääje mänwätuujaato: Öwö nönge mmaja eichäcä.

¹⁷ Yääje aweichöcoomo wetä Tiimoteo wanonta äwwadäädäiñe, ñäädä Jesuuquidiito jäcäinchädä önnedö umjummadö, quedeiyente chäänöngato mmaja. Töwö ätö’tamme’jaato’de Quidiito jadä quedeiyenteje weiñä jäcä, yää yoije wääneneedö, tameedä yeichö wa’cä tameedä quedeiyentecoomo tönoowanooma wääneneedö jäcä.

¹⁸ Dhantai adhantawäiñe o’jodhaato wa’cä nääcanö’aato, adöiñaiñe tä’da weiyaatäi.

¹⁹ Eduuwa mma wöta’de adöiñaiñe, Cajiichaana woije yeiyä’jäcä. Yaawä ñanno o’jodha’como tö’tajäätödö a’dedducoomojöönö mma weneea’de, iiñödööcomoone.

²⁰ Wanaadi töcaajichaanaije weiñä na wa’deunä que’da, jädu queene.

²¹ ¿Aaquene adöiñaiñe öötä’se maato, jäduuje ’ja, ta’cwaiñe weichö queene, wä’jummanä ’je mmaja?