1 CODINTIYO 3 - Wanaadi A'deddu

Wanaadi tadaawaajui tödöödö jäcä ääjimmäje cöweichöcoomo

¹ Jimmä, Epíiditu Santo woija’como wwä wa’deunä töweiye naichöje a’deujai’cha wä’jaaquene äwwäiñe, tujuunu woija’como wwä wa’deunä töweiye naichöje mmaane, quedeiyente ä’döeenö wwä wa’deunä töweiye naichöje mmaja.

² Sö’jato que’da odhoowanoomatäiñe töweiye wä’jaaquene, shuushu que shiichu’cä ewanshinchädö töweiye naichöje, äwanshi ñeene que’da, sö’jato etaajai’cha awei’jocoomo weijäcä. Yä’jödöödä maato, yää etaajai’cha dea,

³ ajuunucoomo woije dea aweijäcäiñe. We’neimmanä töweiye naadö naane’ adhantawäiñe, wä’tu’de’tänä mmaja, aata’deucwe’da weiñä mmaja. ¿Ajuunucoomo woije jönca ätö’tadööcomo yaawä, quedeiyentejöncomo nönge?

⁴ Dhantai änwanno töwä’döe määnetääne: “Paudo sotoi öwö;” quee; anejja ’quene: “Apoodo sotoi öwö;” quee. ¿Tujuunucoomo woija’como jönca ätö’tadööcomo yaawä?

⁵ ¿Änääcö ñäädä Paudo? ¿Änääcö ñäädä Apoodo? Wanaadi anoonöje mma ñaa na; ñaa joi mecaanö’täne änwanno. Töwaadäi ñaa cönnöi Cajiichaana nutuudu tötaadawaajui.

⁶ Öwö Wanaadi a’deddu wecammajä’ne awa’deene äwwäiñe, dhadöödö ñaatö’tädö töweiye naichöje; Apoodo ’quene töjöönei nönge cönä’jaacä; Wanaadi mmaane iiñejencaneije.

⁷ Yääje yeijäcä ñaatö’tänei’jödö o’jodhe’da na, töjöönei’jödö o’jodhe’da mmaja; Wanaadi mmaane o’jodhe na, iiñejencanei’jödööje yeijäcä.

⁸ Äänönge naato ñaatö’tänei’jödö acä töjöönei’jödö; chääwaadäiñe chääje’jödö nä’tua’de chaadawaajuichomo’jödö ’cäwa’cä mma.

⁹ Ääjimmäje ñaa na Wanaadi tadaawaajui tödöödö jäcä; änwanno ’quene chaadawaajui’jödööje maato, soto naudädö töweiye naichöje. Wanaadi äjääcäiñe netaadawa’caja, maa amäänei tönaamä töweiye naichöje.

¹⁰ Wanaadi yaanontäneedöje dea dha’deddu awa’deene wecammajä’ne äwwäiñe, towaanojo’nato wwä maa amäädawä dha’täi awa’deene tönnöe töweiye naichöje. Anejja namääa eduuwa yää neecammajäätö’jödö de’wä. Towoinchadä’daane namo’ñojo ñäädä yää de’wä amäänei.

¹¹ Yäätonno anejja yää maa a’täije tödööjai’cha na, tödööe naadö jonno; Jesuuquidiitoone dha’täije na.

¹² Yää maa a’täi ye’wä anejja namääa oodo que, jödaata que mmaja, yaamante que mmaja; anejja ’quene namääa dee que mmädä, chuu adö que mmaja, woi che mmaja.

¹³ Chääwaadäiñe chaadawaajuichomo’jödö nääne’ju’ja’da wätämmencajootojo anootoi’chädö awä. Wa’to nene’ju’ja’de; wa’to que toneeja na’de tameedä chaadawaajuichomo’jödö, aashicha yeichö eneedö, cone’da yeichö eneedö jeiñe mma.

¹⁴ Yää maa amääajä ätucca’da yeiya’jäcä, töweiye na’de amäänei’jödö eje’jödö.

¹⁵ Ñaamädö’jödö wätucca’jäcä mmaane chääje’jödö ’je’da na’de, töwääwanaaca töwö yeichaame, wa’to nwaca yaatudu ewaanacaadö töweiye naichöje.

¹⁶ ¿Odhoowanääcäiñe’da ca’ nai Wanaadi weichojooje aweichöcoomo, Epíiditu Santo ataacaiñe yeichö mmaja?

¹⁷ Anejja wwä Wanaadi weichojo choone’ma’jäcä Wanaadi nennanö’ca’de ñäädä, tönoiñe yeijäcä Wanaadi weichojo, yää maatoodö.

¹⁸ Mätäncu’tojootäi’che; anejja adhantawäiñe edä nono de’wono jäcä towaanojo’ne yääcanö’a’jäcä, töwoinchadääne nä’dö’ñojo ñäädä yääjato, towaanojo’ne ä’döiye yaawä, ñeene queene.

¹⁹ Edä nono de’wono sejje wä’shiquiijanä nönge mma Wanaadi wwä na. Dha’deddu imennaajä jäcä edääje nä’döa: “Töwö Wanaadi tösejjeca’como nashiichuudaato’de shejjedööcomo que dea mma;” quee nä’döa.

²⁰ Edääje mmaja na dea Wanaadi a’deddu imennaajä: “Töwö Cajiichaana dhowaanäcä na töwäädämmatooje yeichö tösejjeca’como tö’tajäätödööcomo;” quee.

²¹ Yääje yeijäcä anejja sotoije töweichö jäcä soto o’jodhe chö’tajä’jai’cha na. Tameedä äwwoncomooje na:

²² Paudo, Apoodo mmaja, Peedhodo mmaja, edä nono mmaja, nudä weiñä mmaja, wäämanä mmaja, eduuwa weiñä mmaja, äcuude weiñä mmaja; tameedä äwwoncomooje na.

²³ Änwanno mmaane Jesuuquidiito wwonooje maato, Jesuuquidiito ’quene Wanaadi wwonooje na.