1 CODINTIYO 2 - Wanaadi A'deddu

Quidiito wääma’jödö jäcä ecammajäätödö

¹ Jimmä, adöiñaiñe weiyaquennawä Wanaadi a’deddu chäänöngato wecammajä’ne äwwäiñe iiñataaje ya’deddu tödööancädä’da, sö’je tödööancädä’da mmaja.

² Ajaadäiñe weichö anejja jäcä tö’tajäätö’se’da wä’jaaquene, Jesuuquidiito jäcä mmaane, cuduusa jäcä yääma’jödö jäcä mmaja.

³ Adhantawäiñe wä’jaaquene jäduuje weiyancädä’da, saadöje tätä’nönnäje mmaane.

⁴ Ya’deddu, neecammajäätödö mmaja, cönä’jaacä a’deu aashichaato que acaana’cato’comooje’da, soto sejjedö que’da mmaja, Epíiditu Santo neneejodö queene, Wanaadi jäduudu que mmaja.

⁵ Mädääje wä’jaaquene soto sejjedö jäcäinchädä aneecamjödööcomo yeichö queiñe, Wanaadi jäduudu jäcäinchädääne yeichö wetä.

Epíiditu Santo Wanaadi nödöödö eneejoneije yeichö

⁶ Sejje que töneecammajä’e ñaa weichaame mma’ne, ñanno ecamjödö jäcä chäänönge yä’döa’como wwä mmaane. Yaawääne’, edä nono de’wono sejje que’daane töneecammajä’e ñaa weneene, edä nono de’woncomo cajiichaanacoomo sejjedö que’da mmaja, ñanno töwaatameemöje töweiyaamoje naatoodö.

⁷ Ñaa töneecammajä’e weneene Wanaadi sejjedö owaanojöönööne, yää owaanäcä’da jenaadä cönä’ja’dö, edä nono tödöödö owaajodä cöwääwanaacato’comooje Wanaadi cöneejodöichö.

⁸ Edä nono de’woncomo cajiichaanacoomo dhowaanäcäiñe’da na yää; dha’da ei’jo mmaane cuduusa jäcä anaajoijo’da eichö cöneiya’to ñäädä Cajiichaana aashichaato.

⁹ Edääje Wanaadi a’deddu imennaajä nä’döa: Tujummannamo wwonooje töweiyemööje Wanaadi cönnöi soto neneedöcoomojöönö, soto netaadöcoomojöönö mmaja, soto nichö’tamme’jä’eetöcoomojöönö mmaja; quee imennaajä nä’döa.

¹⁰ Epíiditu Santo yää tönaawanaanö’ca weneene cöwwäiñe, Wanaadi woije. Ñäädä Epíiditu Santo tameedä nemmenca, sö’jato Wanaadi nödöödö jadä’jödöödä.

¹¹ Soto dhowaanäcä’da töweiye nai töjimmä tö’tajäätödö, töwö dea mma dhowaanäcä na tötö’tajäätödö. Mädääje mmaja Wanaadi tö’tajäätödö owaanäcä’da na, Epíiditu Santo mma dhowaanäcä na.

¹² Cönwanno cöwwäiñe cönä’tui edä nono de’wonoojönö tö’tajo’tojo, Epíiditu Santoone, ñäädä Wanaadi dö’sennoto we’ajä. Ñäädä Epíiditu Santo cöwwäiñe cönä’tui Wanaadi nutuudu aashichaato cöwwäiñe naadö cowaanäcäiñe yeichö wetä.

¹³ Mädä jäcä töneecammajä’e ñaa weneene soto sejjedö woowanooma’jä que’da, Epíiditu Santo nowaanomaadö queene. Wanaadi nödöödö töneecammajä’e ñaa weneene Epíiditu Santo ’ja’como wwäiñe.

¹⁴ Ñäädä Epíiditu Santo woijemjönö Epíiditu Santo nödöödö tömjo’ma weneene, i’jeta’jödö nönge yeijäcä chäwwä. Töwö yää etaajai’cha na, Epíiditu Santo ni’wa’tädö queene yää chö’tammecöödö yeiyajä.

¹⁵ Ñäädä Epíiditu Santo ’jano mmaane tameedä töntö’tamme’que weneene, anejjacoomo äntö’tammecö’da yeichaame töwö yeichö.

¹⁶ Edääje Wanaadi a’deddu imennaajä nä’döa: “¿Änääcö dhowaanäcä nai Cajiichaana tö’tajäätödö? ¿Änääcö Wanaadi onoowanoomadö’de?” quee nä’döa. Cönwanno cöwwäiñe töweiye na Quidiito tö’tajäätödö.