1 CODINTIYO 16 - Wanaadi A'deddu

Jödaata quedeiyente wwäiñe tu’emö jäcä Paudo nimennä’jödö

¹ Edääje wä’dö’se wa jödaata quedeiyentecoomo i’wa’toto’como i’jummadö jäcä. Änwanno tödööjai maato Cadaasiya ñancomo quedeiyentecoomo wwä wödööjoneedöje mmaja.

² Semaana waajäntädö waadäi awaadäiñe töudäje shoomajai maato, töwwä töweiye yeichö woije. Änwanno yää i’jummajai maato, öwö ani’jummajo’da weichö wetä yaawä adöiñaiñe ööta’jäcä.

³ Yaawä adöiñaiñe wä’döa’jäcä jajeeda imennaajä dha’me Jeduusadén ña wanontaato’de ñanno aneecammadööcomo dea, iiñancomo quedeiyentecoomo döiñaiñe yää äntuduucomo täjemjönö imö’que.

⁴ Öwö jaiñoone täjai mmaja tö’ta’jäcä yaawä tönwanno ya’nontäjai ñaato.

Yöiñaiñe töötotoojo Paudo wwä ecamma’jödö

⁵ Adöiñaiñe öötädaawä Maasedooniya chäcä wöta’de; yää ’jeje jeene Codinto ña wöta’de.

⁶ Numa’cä’da ca ajaadäiñe eijai wannö jääcä yaawä, tu’que yeichö jeiñe mma ajaadäiñe wija’do’jotaichö jääcä. Yaawä yäätonno öötädaawä änwanno ö’wa’täjai maato.

⁷ Weeja’dätäädöje mma adheene’seiñe’da wa, numa’cäiche ajaadäiñe wei’she weijäcä, Cajiichaana Jesuuquidiito woije yeiya’jäcä.

⁸ Eetä Eujeeso ña weichojo na Pentecoté anootoi’chädö jona tödööene,

⁹ eetä jooje Cajiichaana tadaawaajui öwwä tödööemö yeijäcä, chäänönge ä’döjaicho; jooje mmaja tu’de’tännamo naato.

¹⁰ Adöiñaiñe Tiimoteo wöta’jäcä aashicha tödöötäcä’de, täncanoode’da eiye ajaadäiñe, töwö Cajiichaana Jesuuquidiito tadaawaajui tödööneije yeijäcä, öwö waadöje mmaja.

¹¹ Yääje yeijäcä mänquiiñeme’täi’che. Aashichaane enno’jatääcä öwwadäädä yeejödaawä; öwö wiyoomo’ca anejjacoomo quedeiyente jadäiñe yeejödö.

¹² Ñäädä cöjimmotoncomo Apoodo mmaane jooje wiyäätuujaneedö’je adöiñaiñe iichädö wetä anejjacoomo quedeiyente jadäiñe. Yaawääne’ eduuwa töötä’se’da cönääcammaacä; töwö towaanäcä nöta’de.

Yä’ca’jödö

¹³ Äädai’chätääcä; yäätäädä aneecamjödööcomo tödöötäcä. Dhanwaaje eichäcä, jäduujeiñe.

¹⁴ Tameedä ännödööcomo tödöötäcä äwä’jummancädäiñe.

¹⁵ Jimmä, edääje wä’dö’se wa äwwäiñe: Odhoowanääcäiñe Eteujana wä’jimmä’tädö awa’deene quedeiyenteje yääwaacajo’jocoomo Acaaya ña. Tönwanno quedeiyentecoomo töni’wa’tä weneeneto, yeichöcoomoje.

¹⁶ Yääje yeijäcä yääja’como i’wa’täjai maato, tameedä ñönga’como mmaja, anejjacoomo ’wa’tännamo mmaja, töweetadaawa’caja’como mmaja.

¹⁷ Öwö ta’cwaiñe wa döiña Eteujana weejö’jödö weijäcä, Jootunaato mmaja, Acaico mmaja. Tönwanno öwwä tönnöe weneeneto änwanno tödööjai’cha määnetäänedö eetä’da aweijäcäiñe.

¹⁸ Tönwanno ta’cwaiñe tö’tamme’jojä’tä weneeneto, änwanno mmaja. Canno nönga’como aashicha tödööjai caato.

¹⁹ Quedeiyentecoomo Aasiya ñancomo ta’deujocoomo nadääjaato äwwadäädäiñe. Aquiida, Pidiisiida mmaja, ta’deujocoomo nadääjaato dea, Jesuuquidiito eetö joi, ñanno immaichomo taca chääjadäiñe töweecanta’ñä weneenetoodö mmaja.

²⁰ Tameedä quedeiyentecoomo ta’deujocoomo nadääjaato äwwadäädäiñe. Töwä’jumma aweichöcoomo eneejancädä ata’dejjatääcä.

²¹ Öwö, Paudo dea, edä yä’cadö wimenna.

²² Anejja Cajiichaana Jesuuquidiito ämjumma’da yeiya’jäcä töwännanö’e na ñäädä. Ä’cäde’de amäädä Cajiichaana Jesuuquidiito.

²³ Cajiichaana Jesuuquidiito nutuudu aashichaato äwwäiñe yei’she wa.

²⁴ Öwö mämjummaato tameedä, Jesuuquidiito jäcäinchädä. Amén.