1 CODINTIYO 14 - Wanaadi A'deddu

Anejja a’deucwe wa’deunä

¹ Wä’jummanä ’je aweichöcoomo encano’tätääcä; ijummatääcä Epíiditu Santo nu’jätöödö. Wanaadi nutuudu woije ecammajäätödö jooje’cä ijummatääcä.

² Ñäädä anejja a’deucwato wa’deuwödö na’deuwa soto wwäiñe’da, Wanaadi wwääne, soto aneeta’da yeichomjäcä yää ya’deuwödö. Epíiditu Santo woije ya’deutaame, yaawääne’ owaanojöönö ai na’deuwa.

³ Dha’da ñäädä Wanaadi nutuudu woije ecammajä’nei, soto wwäiñeene na’deuwa ñäädä; ijäädu’toto’comooje na’deuwa, yäätuujato’comooje mmaja, i’wa’toto’comooje mmaja.

⁴ Ñäädä anejja a’deucwato wa’deuwödö töwö dea mma nejäädu’ta. Ñäädä Wanaadi nutuudu woije ecammajä’nei mmaane tameedä quedeiyentecoomo nijäädu’taato.

⁵ Tameedä änwanno anejja a’deucwe awei’sheiñe waadö’je; Wanaadi woije ecammajäätödö mmaane jooje’cä jeene äwwäiñe yei’she wa. Yää ecammajäätödö anejja a’deucwe wa’deunä e’jodhe’cä na, täcamma’da ya’deuwö’jödö yeiya’jäcä, tameedä quedeiyentecoomo ä’jädu’täiyeto yaawä.

⁶ Jimmä, edääje yeiya’jäcä naadö naane’, anejja a’deucwe wa’deuwancädä adöiñaiñe ööta’jäcä, ¿aaquene mmaja mani’wa’tätäädö deeade’ ? Öwwä Wanaadi neneejo’jödö jäcä täcammajä’emö dha’me ööta’jäcä mmaane ä’wa’täjaiñe wa, chäänöngato wätunnä jäcä ecammajäätödö dha’me weiya’jäcä jeiñe mma, Wanaadi a’deddu täcammajä’emö dha’me jeiñe mma, odhoowanoomato’como dha’me jeiñe mma; mädä nöngato dha’me ööta’jäcä ä’wa’täjaiñe wa.

⁷ Tätööemö töweiye naichö naane’, jiichu, se’seedi mmaja. Etöödö nönge’da etööa’jäcä ¿aaquene mmaja aashicha äätadö deaade’ ?

⁸ Wewäänä’tänaawä mmaja töweiye naichö naane’, chäänönge janau’cwa äätö’da yeiya’jäcä esoomajäätö’da eijai ñaato yaawä ñanno töweewänä’taamo.

⁹ Mädääje mmaja änwanno, anejja a’deucwe äätajöönö ai ecammajä’a’jäcä äwwäiñe ¿aaquene mmaja äätadö deaade’ aneecammajäätödööcomo? Jejeichä wwä mma adha’deuwato yaawä.

¹⁰ Jooje na a’deu edä nono de’wä, aneejejaiñene’jödöödä; chääwaadäi töweiye na etaatojo.

¹¹ Yaawääne’ anejja a’deddu aneeta’da weiya’jäcä anejja nönge wa yaawä ñäädä töwa’deuwemö wwä, töwö anejja nönge mmaja eijai ñaa dea öwwä.

¹² Yääje yeijäcä jimmä, Epíiditu Santo nu’jätöödö tujunne yeiya’jäcä äwwäiñe yääne encano’tätääcä, quedeiyentecoomo i’wa’toto’comoone.

¹³ Ñäädä anejja a’deucwato wa’deuwödö Wanaadi wwä e’ca’jai ña töwa’deuwö’jödö ecammatoojo soto wwäiñe.

¹⁴ Anejja a’deucwe Wanaadi wwä wa’deuwa’jäcä do’tadö mma na’deuwa, tö’taajäätödö mmaane yää wa’deuwö’jödö äntö’tammecö’da na.

¹⁵ ¿Aaquene eijai wanä yääje yeiya’jäcä? Edääje eijai wa: Wanaadi wwä a’deujai wa do’tadö que, yaawääne’ tö’tajäätödö que mmajaane’. Ecanta’ñäjai wa dea do’tadö que, tö’tajäätödö que mmaja.

¹⁶ Odo’tadö que mma aashicha Wanaadi jäcä awa’deuwa’jäcä yaawä ñäädä aneetajöönö awa’deuwö’jödö jäcä chö’tajä’jai’cha na, eta’jödööjönö chäwwä.

¹⁷ Chäänönge Wanaadi wwä aashicha awa’deutaame amäädä, anejjacoomo mmaane ejäädu’tä’da naato yaawä.

¹⁸ Wanaadi chea öwwä cuntui adhe’jodheiñe anejja a’deucwe weichojo.

¹⁹ Yääje yeichaame wecanta’ñotoojo taca aacä’cä mma a’deu tätaato wa’deuwa’jäcä anejja owaanomaadö wetä, yää eijai ña anejja a’deucwe jooje wa’deunä e’jodhe’cä.

²⁰ Jimmä, mude’cä’cä nönge’da ätö’tajä’täcä. Conemjönö tödöödö jäcä mmaane mude’cä’cä nönge eijai maato; tö’tajä’nä jäcä ’quene inchomo nönge eijai maato.

²¹ Edääje nä’döa jenaado’jä waanontänä imennaajä jäcä: “Äätajöönö ai, anejjacoomo a’deucwa’como ai mmaja ya’deuwa’de canno soto wwäiñe; yääje yeichaame aneeta’da dea naato’de; quee nä’döa Cajiichaana;” quee imennaajä nä’döa.

²² Yääje yeijäcä mädä anejja a’deucwe wa’deunä ene’ju’tojooje na quedeiyentejöncomo wwonooje, quedeiyentecoomo wwonooje’daane. Wanaadi nutuudu woije ecammajäätödö mmaane ene’ju’tojooje na quedeiyentecoomo wwonooje, quedeiyentejöncomo wwonooje’da.

²³ Tameedä quedeiyentecoomo we’jumma’comjäcä naadö naane’, yaawä tameedä änwanno anejja a’deucwe awa’deuwa’comjäcä, ¿i’jeta’jödö nönge jönca adhe’täjaiñe nai quedeiyentejöönö adöiñaiñe yoomonga’jäcä, towaanojo’nemjönö womonga’jäcä jeiñe mma?

²⁴ Dha’da ’quene tameedä Wanaadi nutuudu woije ecammajäätödööje aweiya’comjäcä, yää ecammajäätödö aca quedeiyentejöönö womonga’jäcä, towaanojo’nemjönö jeiñe mma, töwö töcoone’nadiiyö jäcä cone’da ä’döjoojai ña yaawä; töwwäädä ätämmencajai ña yaawä yää aneecammajäätödööcomo etaadö’jo.

²⁵ Chö’tajäätödö tacaademjönö tacaade nä’döa yaawä; töwö ta’mudhe ä’döjai ña yaawä Wanaadi wwadäädä, ya’demeecödööje. Edääje ä’döjai ña yaawä äjääcäiñe: “Wanaadi chämma ajaadäiñe na;” quee.

Töweewodoichancädä’da we’jummanä tödöödö

²⁶ Mädääje na jimmä; awe’jummadaawäiñe awaadäiñe tödööjai maato. Anejja wecanta’ñänä dha’me eijai ña, anejja ’quene woowanoomanä dha’me, anejja mmaane töwwä Wanaadi neneejodö, anejja a’deucwe wa’deunä jeiñe mma, yää ecammajo’tojo jeiñe mma. Tameedä yää tödööjai maato quedeiyentecoomo wä’jädu’toto’comooje.

²⁷ Anejja a’deucwe wa’deunawä, tooni nshai na’deuwö’ña’to, aacä mma, aaduwaawä jeiñe mma, mädä ’cäwa’cä mma. Ñanno wa’deuwö’jocoomo ätääcammajä’jai ña yaawä adha’deucweiñe.

²⁸ Ecammajä’nei ’je’da yeiya’jäcä mmaane anejja a’deucwe a’deuwö’da nei’ña’to we’jummanaawä. Töwwäädäiñe mma na’deuwö’ña’to, tötö’tajäätödööcomo ai, Wanaadi wwä mmaja.

²⁹ Aacä Wanaadi nutuudu woije ecammajä’nnamo na’deuwö’ña’to, aaduwaawä jeiñe mma. Anejjacoomo chö’tamme’jai ñaato ñeecammajäätödööcomo.

³⁰ Yaawä Wanaadi woije anejja shuucuno wwä ecammajo’tojo yä’tua’jäcä, ñäädä ecammajä’nei eta’jöjai ña yaawä, ñäädä wwä ecammajäätödö wetä.

³¹ Mädääje awaadäiñe tooni nshai ecammajä’jai maato, änwanno Wanaadi nutuudu woije ecammajä’nnamo, tameedäädääne moowanoomatäiye, mä’jädu’tätäiyede.

³² Ñäädä Wanaadi nutuudu woijato wa’deuwödö tötö’tajäätödö emu’dojoocoije eijai ña.

³³ Wewoodoichanä edhaajäjöönö ñäädä Wanaadi, acu’shämje weiñä edhaajääne. Tameedä quedeiyentecoomo wecanta’ñänä tönnöe weneenetoodöje dea

³⁴ owoodi’choncomo nei’ña’to, äucwätä’da; wecanta’ñotoojo taca a’deujai’cha naato. Töweicho’como ecammaajä woije eijai ñaato, Wanaadi waanontädö imennaajä wä’dödö nönge dea.

³⁵ Ane’cä’cä ecamma’jo’se töweiya’comjäcä töiñonootoncomoone ecamma’jojai ñaato tä’sacaiñe. Aashicha ääne’da wodi wa’deuwödö wecanta’ñotoojo taca.

³⁶ Änwannojöönööne Wanaadi a’deddu majäntojootäne; ñanno mmajöönö änwanno dha’deddu etannamo.

³⁷ Anejja adhantawäiñe Wanaadi nutuudu woije ecammajä’neije töwääcanö’a’jäcä, Epíiditu Santo woije töwääcanö’a’jäcä mmaja, ñäädä chö’tamme’jai ña yaawä edä äwwadäädäiñe wimennaadö Cajiichaana Jesuuquidiito nanontä’jödööje yeichö.

³⁸ Yaawääne’ yääje tötö’tajäätö’se’da yeiya’jäcä ñäädä a’deddu etaajai’cha maato.

³⁹ Yääje yeijäcä jimmä, ijummatääcä Wanaadi nutuudu woije ecammajo’tojo, yaawääne’ anejja a’deucwe ana’deujojo’da’da eichäcä.

⁴⁰ Wecanta’ñänaawä tameedä chäänönge tödöötäcä, aweewodoichancädäiñe’da.