1 CODINTIYO 12 - Wanaadi A'deddu

Cöwaadäiñe Epíiditu Santo nutuudu yeichö

¹ Jimmä, cöwaadäiñe Epíiditu Santo nu’jätöödö jäcä odhoowanääcäiñe yei’she wa.

² Änwanno odhoowanääcäiñe na quedeiyenteje’da aweichöcoomo töwä’sadiijannä’cajo awei’jocoomo chu’taajä ta’deudemjönö wwadäädä.

³ Yääje yeijäcä odhoowanääcäiñe yei’she wa Epíiditu Santo woije soto edääje ä’dö’da yeichö: “Jesuuquidiito conemjönö;” quee ä’döjai’cha. Ñäädä Cajiichaanaje Jesuuquidiito e’tänei mmaane Epíiditu Santo woije yääje nä’döa.

⁴ Aneejejaiñene’jödöödä quedeiyente weichojo u’ajä na, ñäädä dea Epíiditu Santo u’neije yeichaame.

⁵ Aneejejaiñene’jödöödä mmaja Wanaadi wwä tödöödö, ñäädä dea Cädhaajotoncomooje yeichaame.

⁶ Aneejejaiñene’jödöödä mmaja tödööemö tödöötojo; yaawääne’, ñäädä dea Wanaadi cöwwäiñe tödööjoneije na.

⁷ Cöwaadäiñe Wanaadi nu’a Epíiditu Santo neneejodö, cöjaadäiñe töweichö ene’ju’tojo, tameedä aashicha cöweicho’comooje.

⁸ Anejja wwä Epíiditu Santo ai Wanaadi nu’a tösejjeque ya’deutojo; anejja wwä ’quene Wanaadi nu’a towaanojo’ne ya’deutojo, ñäädä dea Epíiditu Santo ai.

⁹ Anejja wwä mmaane ecaanö’tojo nä’tua, ñäädä dea Epíiditu Santo ai; anejja wwä ’quene cädäija’como ejiichö’toto’como, Epíiditu Santo ai mmaja.

¹⁰ Anejja wwä nä’tua täneemö tödöötojo; anejja wwä ’quene Wanaadi nutuudu woije ecammajo’tojo. Anejja wwä nä’tua Epíiditu Santo woijatooje yeichö chö’tamme’tojo, odo’sha woijatooje yeichö jeiñe mma. Anejja wwä nä’tua anejja a’deucwe ya’deutojo; anejja wwä ’quene anejja a’deucwe wa’deuwö’jä ecammajo’tojo.

¹¹ Tameedä mädoocomo nödööa ñäädä tooniyaano Epíiditu Santo. Töwö tumjummadö woije cöwaadäiñe cöweicho’como nu’a.

Yää dea ejööje cöweichöcoomo

¹² Cäjööcomo naadö naane’, tooni chääjö yeichaame jooje chääjocoono ejoodöjaajä. Mädääje mmaja Quidiito.

¹³ Tameedä cönwanno ñäädä tooniyaano Epíiditu Santo woije wautisaaje cöwä’dö’jocoomo que tooni chääjöje cä’dötääne, judhío, quidiiyeeco mmaja, tädhaajäcaato, töwö dajaato mmaja; tameedä cöwwäiñe cönä’tui ñäädä dea Epíiditu Santo.

¹⁴ Tooniñoojönö mädä cäjööcomo, joojeene chääjäcoono ejoodöjaajä.

¹⁵ Edääje ä’judu wä’döa’jäcä naadö naane’: “Amääje’da weijäcä adheejö jäcoonojöönö öwö;” ca’jäcä, yääje yä’dötaame adheejö jäcoono dea töwö.

¹⁶ Ajaanadö jeiñe mma edääje yä’döa’jäcä: “Änuuje’da weijäcä adheejö jäcoonojöönö öwö;” ca’jäcä, yääje yä’dötaame adheejö jäcoono dea töwö.

¹⁷ Änuuje mma aweiya’jäcä ¿ane’cäämö que maneetadööde’ yaawä? Janaaje mma aweiya’jäcä jeiñe mma ¿ane’cäämö que momjo’jödööde’ yaawä?

¹⁸ Yääje’daane na; chääwaadäiñe Wanaadi cönnöi adheejö jäcoono, tumjummadö woije.

¹⁹ Adheejö jäcoono töudäje yeiya’jäcä, adheejöjöönö yää.

²⁰ Mädääje na; jooje äjääcono yeichaame tööni mmaane adheejö na.

²¹ Edääje adheenudu ä’döjai’cha na adhaamädö wwä: “Tujunne’da öwwä ma;” cajai’cha. Aju’jä edääje ä’döjai’cha mmaja ä’judu wwä: “Tujunne’da öwwä ma;” quee ä’döjai’cha na.

²² Edääjeene na: Yää cäjööcomo jäcoono ajääjännoto’cä jaiñoone tujunne’cä jeene töweiye nai.

²³ Yää cäjööcomo jäcoono iiñataajatoojönöiche jooje’cä cöneedai’chädööcomo; yää eneejojaichojöönö jooje’cä cönnejontädööcomo.

²⁴ Täneemö mmaane ñeejontädö tujunne’da na. Cönwanno cäjööcomo jäcoono cönencano’tädööcomoojönö Wanaadi cönnöi tujunnato’cäje jeene,

²⁵ äänönge’da yeichö queiñe, tameedäädääne ätäncano’täiye.

²⁶ Tooni adheejö jäcoono wäntunaanö’a’jäcä tameedä adheejö näntunaanö’a yaawä. Tööni adheejö jäcoono aashichaato oneeja’jäcä tameedä adheejö na’cwaincha yaawä.

²⁷ Änwanno maato Quidiito ejööje; awaadäiñe chääjäcoonoje maato.

²⁸ Mädääje mmaja Wanaadi cönnöi quedeiyentecoomo weicho’como: Awa’de anonta’como; yäätonno Wanaadi nutuudu woije ecammajä’nnamo; yäätonno owaanomannamo; yäätonno täneemö tödönnamo, äjiichö’tännamo mmaja, ’wa’tännamo mmaja, soto e’se’tännamo mmaja, anejja a’deucwe töwa’deuwaamo mmaja.

²⁹ ¿Tameedä ca anonta’comooje naicho, Wanaadi nutuudu woije ecammajä’nnamooje jeiñe mma, owaanomannamooje jeiñe mma? ¿Tameedä ca täneemö tödönnamooje naicho,

³⁰ äjiichö’tännamooje jeiñe mma? ¿Tameedä ca anejja a’deucwe töwa’deuwe naicho? ¿Tameedä ca anejja a’deucwe wa’deuwö’jä ecammajä’nnamooje naicho? Ng’jn, tameedä’daane.

³¹ Yääje yeijäcä ijummatääcä Wanaadi nutuudu tujunnato’cä dea mma. Eduuwa wecamma’ñojo äwwäiñe mädä weiñä naadö de’wä aashichaato jaiñoone.