1 CODINTIYO 10 - Wanaadi A'deddu

Chu’taajä e’nomjadö jäcä wä’wätuujanä

¹ Jimmä, ätö’tatääcä cadai’choncomo wei’jocoomo jäcä; tameedä tönwanno ca’dutu o’nä töötä töweiye cönä’ja’to; tameedä cöne’dätoicho Dama Seweichato wenwa’duaajä ai.

² Cönwanno wautisaaje töwä’döe caatoodöje mmaja tönwanno Moisé sotoije cönääwaacaicho yää ca’dutu o’nä töwäämannäjöödöcoomo que, dama ’cwai töwe’dätäädöcoomo que mmaja.

³ Tameedä tönwanno tönäu’cwe cönä’ja’to yää dea äwanshi caju ñano, Wanaadi nutuudu;

⁴ tönenque cönä’ja’to dea caju ñano wocö, Wanaadi nutuudu mmaja. Yää tuna töweeja’ca cönä’jaacä täju ai, yää chääjadäiñe töötä cönä’ja’dö ai. Yää täju cönä’jaacä Quidiito.

⁵ Yääje yeichaame tameedä’da chäänönge cönä’ja’to Wanaadi owaadäädä, jata’jemjönö aca cönä’jajoichodö naane’.

⁶ Yääje yei’jocoomo na cöwä’wätuujato’comooje, conemjönö ämjumma’da cöweichöcoomo wetä, tönwanno cönä’ja’todööje’da.

⁷ Yääje yeijäcä chu’taajä mämjummatäi’che, ñanno dhantai cönä’ja’todööje. Wanaadi a’deddu imennaajä jäcä yääje nä’döaadö naane’: “Ñanno soto cönaatajiimaicho töwääwashinchädööcomo wetä, töwoocödööcomo enöödö wetä mmaja; yää ’jeje cönammöicho yaawä töwänwadööcomo wetä;” quee imennaajä nä’döa.

⁸ Masuuduije eijai’cha mmaja caato dea, ñanno dhantai cönä’ja’todööje. Yääje töweichöcoomo jo’tädööje cönä’jajoicho tooni sotooto de’wä aacä miide yää anooto awä dea.

⁹ Cönwanno Cajiichaana Jesuuquidiito oneejajai’cha caato. Mädääje ñanno cönnöicho, dhantai; äcääyu canaadöje cönä’jajoicho yaawä.

¹⁰ Wanaadi jäcä enta’me’jai’cha caato dea, ñanno dhantai cönenta’me’ca’todööje; yaawä amoode canaadöje cönä’jajoicho, ñäädä wäämanä edhaajä.

¹¹ Tameedä yää cadai’choncomo wei’jocoomo na cöwä’wätuujato’comooje. Yää tömennä na cöwä’sejje’toto’comooje, cönwanno anooto wataamedö enennamo.

¹² Yääje yeijäcä ñäädä jäduujato tö’tadö towaadäädä nei’ñojo, e’ducca’no.

¹³ Yää wä’yunaacanä ojoonaiñe töwe’e weneenedö tameedä soto noneejaatöcoomo dea yää. Chäänöngato ñäädä Wanaadi, töwö ayuunacaajotäiñe’da na adhe’jodheena’como que. Äwä’yunaacajoodöcoomo waadäi töwö Wanaadi nu’a äwwäiñe e’jodheinchatoojo, yää shinchädö wetä äwwäiñe.

¹⁴ Yääje yeijäcä jimmä umjummadö, e’nomjatääcä chu’taajä wwä tödöödö.

¹⁵ Tösejjeca’como dajaane änwanno, äwwäiñe ya’deuwaadö; änwanno dea chö’tamme’jai maato mädä äwwäiñe wa’deuwödö.

¹⁶ Yää tängemö, Santa Seena tödöödawä chääjäcä Wanaadi wwä töwa’deuwe cäänetäänedö, cuduusa jäcä Jesuuquidiito aquiiyö töjaajo’jödö cu’tädö yää; yää jäcäinchädä ñannoje dea caato. Yää uu töni’yajä’e cäänetäänedö cuduusa jäcä Quidiito ejö etuunui’chä’jödö cu’tädö yää; yää jäcäinchädä ñannoje dea caato.

¹⁷ Wanna cöweichaameiñe yää dea uu cäu’cato, tooniyaano; yääje yeijäcä tooni chääjöje caato.

¹⁸ Iisadaaediitacoomo naatoodö naane’, ñanno saaquidiijiisiyooje u’ajä tänännamo. Tönwanno ääjimmäje naato yää dea tönänque töweichomjäcä.

¹⁹ “Chäänöngato yää chu’taajä,” quee öucwadööje’da yääje wä’döa, äwanshi chu’taajä wwä u’ajä anejja äwanshi e’jodhe e’tancädä’da mmaja.

²⁰ Edääjeene wä’döa: Ñanno Wanaadi dhowaanojöncomo, saaquidiijiisiyo tönnöe weneenetoodö, Wanaadi wwä’da yää tönnöe weneeneto, odo’shancomo wwäiñeene. Odo’shancomo nödöödö anaajojo’da awei’sheiñe wa.

²¹ Änwanno emjai’cha maato Cajiichaana Jesuuquidiito wwono, odo’shancomo wwono entaame mmaja. Änwanno täu’jai’cha maato Cajiichaana Jesuuquidiito wwono, odo’shancomo wwono täu’taame mmaja.

²² ¿Cajiichaana Jesuuquidiito tö’neiñe tödööjodö ca mädä cöwwäiñe? ¿Töwö cho’jodhe’cä ca caato, mädääje tödöödö wetä cöwwäiñe?

Cöjimmotoncomo sadiijanto’me eijai’cha cöweichöcoomo

²³ Chäänönge yääje soto töwä’döe weneeneto: “Tameedä tödööemje na;” quee. Yääje yeichaame tameedä’da aashicha dötä na. Tameedä tödööjai cöweichaameiñe tameedä’daane ’wa’tätä na.

²⁴ Cöwaadäiñe encano’täjai caato aashicha cöjimmotoncomo weicho’como, cönwanno aashicha cöweicho’como mmajöönö.

²⁵ Tameedä tänäämö ejeemajootojo tacaano tänääjai maato chu’taajä wwä saaquidiijiisiyooje u’ajääje yeichö ecamma’jancädä’da, mädä ai mma ätö’tajäätödööcomo maneejodööjoto’no yaawä.

²⁶ Cajiichaana nödöödö edä nono, tameedä ye’wä naadö mmaja.

²⁷ Adheewashinchädö wetä tömmai chaca adha’dejja’jäcä quedeiyentejöönö wwä, äätä’se aweiya’jäcä, tameedä töwö inchudu tänääcä’de, chu’taajä wwä saaquidiijiisiyooje u’ajääje yeichö ecamma’jancädä’da, mädä ai mma ätö’tajäätödö maneejodööjo’no yaawä.

²⁸ Yaawääne’, edääje äwwä töwö yä’döa’jäcä: “Chu’taajä wwä saaquidiijiisiyooje u’ajä’jödö määdhä tänäämö;” ca’jäcä, töwö chääjäcäinchädä mänäänäi’che yaawä, aneiñaja mma chö’tajäätö’no yaawä.

²⁹ Amäädä chö’tajäätö’da aweichaame, töwööne chö’tajä’jai ña. Edääje chö’tajä’jai’cha maato: “ ¿Aaquene mmaja anejja tö’tajäätödö woije wääwashinchädö deaade’ ?

³⁰ ¿Aaquene mmaja cone’da anejja ännödö deaade’ Wanaadi wwä wa’deuwancädääne wääwashinchaajä?” quee chö’tajä’jai’cha maato.

³¹ Wanaadi wwonoojeene tameedä tödööjai maato, äwääwashinchädööcomo mmaja, owoocödööcomo enöödö mmaja, tameedä anejja tödöödö mmaja.

³² Soto sadiijanto’comooje mma meichäi’che, judhío jeiñe mma, judhíojöönö jeiñe mma, quedeiyente jeiñe mma.

³³ Mädääje wäänene öwö, tameedä soto a’cwaimato’como tunuujiye, öwö aashicha weichojo ujiiyancädä’da, tönwanno aashicha yeicho’comoone, yääwanaacadööcomo wetä yaawä.