1 CODINTIYO 1 - Wanaadi A'deddu

Yaajäntä’jödö

¹ Öwö Paudo, Wanaadi woije Jesuuquidiito nanontädööje e’taajä, cöjimmotoncomo Sootene acä ñaa

² nimenna äwwadäädäiñe, änwanno ñaa jimmä, Wanaadi ecaanö’nnamo Codinto ñancomo. Änwanno Wanaadi sotoije mä’dötääne Jesuuquidiito jadä äwä’dödööcomo que. Wanaadi adha’dejjatääne aashicha aweicho’comooje tameedä yeichö wa’co’como Cädhaajotoncomo Jesuuquidiito ecaanö’nnamo jadäiñe. Töwö Jesuuquidiito na ñanno edhaajotoncomooje, cönwanno Cädhaajotoncomooje mmaja.

³ Aashichaato, täncanoode’da aweicho’como mmaja äwwäiñe yei’she wa, Cumöötoncomo Wanaadi nutuudu, Cajiichaana Jesuuquidiito nutuudu mmaja.

Codinto ñancomo wwä Quidiito nutuudu aashichaato

⁴ Weiñäje aashicha töwa’deuwe wäänene Wanaadi wwä äjääcäinchädäiñe Wanaadi nutuudu aashichaato äwwäiñe naadö weijäcä, yää Jesuuquidiito jäcäinchädä äwwäiñe cuntuichö.

⁵ Quidiito jadä aweichomjäcä tameedä Wanaadi nutuudu aashichaato äwwäiñe na, awa’deuto’como, tösejjeque aweicho’como mmaja.

⁶ Mädääje Quidiito jäcä ecammajäätödö chäänönge yeichö nääne’ju’ja äjääcäiñe.

⁷ Yääje yeijäcä Cajiichaana Jesuuquidiito wäänejoodö miyoomo’catoodö wadaadäädä a’que’da na Wanaadi nutuudu äwwäiñe.

⁸ Töwö Wanaadi adheedai’chaato’de yaatameedö jonaane, ejääduqueejö’da aweichöcoomo wetä, anejja wwä äämentojo’da aweichöcoomo wetä yaawä Cädhaajotoncomo Jesuuquidiito we’a’jäcä.

⁹ Chäänöngato ñäädä Wanaadi, töwö dea adha’dejjatääne Tönnedö Jesuuquidiito jimmäje aweichöcoomo wetä, ñäädä Cädhaajotoncomo.

Aata’deucwe’da Codinto ñancomo wei’jocoomo

¹⁰ Jimmä, Cädhaajotoncomo Jesuuquidiito eetö joi mänwätuujaato; aata’deucwe eichäcä, äätu’de’tä’daane. Aashichaane eichäcä ääjäcä, yää dea ätö’tajäätödööcomo weiyancädä, yää dea adha’dedducoomoje tödööancädä mmaja.

¹¹ Ñanno Codoowé wä’jimmä’tädö adheecammajä’täne öwwä, jimmä, töwäätäccujä’e aweichöcoomo.

¹² Edääje wä’dö’se weichö mädä: Edääje awaadäiñe töwä’döe määnetääne: “Paudo sotoi öwö;” quee; anejja ’quene: “Apoodo sotoi öwö;” quee; dhantai ’chene: “Peedhodo sotoi öwö;” quee; “Quidiito sotoi öwö;” quee daja anejjacoomo.

¹³ ¿Tödaatojä’e ca Quidiito nai? ¿Paudo ca cuduusa jäcä cönaatajoijoi äjääcäinchädäiñe? ¿Paudo eetö joi cha wautisaaje mä’döjootäne?

¹⁴ Dhamma dha ñanno mma wautisaaje wödööneto, Quidiipo, Caayo mmaja,

¹⁵ öwö yeeto joi wautisaaje mecammatäädöne.

¹⁶ Eteujana wä’jimmä’tädö mmaja wautisaaje wödööneto dea; yäätonno anejja wautisaaje tödö’jödö chö’ta’da wa.

¹⁷ Wautisaaje tödööneije’daane Quidiito yaanontäne, aashichaato wätunnä ecammajä’neijeene; ya’deddu shö’jano’tancädä’da, cuduusa jäcä Quidiito wääma’jödö ecammajäätödö jäduucadö queiñe owwä.

Quidiito Wanaadi jäduuduje yeichö

¹⁸ Cuduusa jäcä Quidiito wääma’jödö jäcä ecammajäätödö na i’jeta’jödö nönge ñanno töwännanö’aamo wwäiñe; cönwanno töwääwanaacaamo mmaane cowaanäcäiñe na Wanaadi jäduuduje yeichö.

¹⁹ Edääje Wanaadi a’deddu imennaajä nä’döa: Tösejjeca’como sejjedööcomo wacoicha’de; towaanojo’na’como woowanooma’jocoomo tödööto’me’da wödööja’de; quee imennaajä nä’döa.

²⁰ Yääje yeiya’jäcä, ¿aaquene töweiyemööje ñäädä tösejjecaato nai, owaanomaanei mmaja, edä nono de’wono jäcä wätäccujä’nä dhowaanocooto mmaja? ¿Tödööto’me’da jönca Wanaadi cönnöi edä nono de’wono towaanojo’ne weiñä?

²¹ Edä nono de’woncomo towaanojo’ne töweichöcoomo que mma Wanaadi towaanäcäiñe tödööjai’cha naato; tösejjeque Wanaadi weichö woijato dea yää. Täcaanö’nnamo mmaane töwö Wanaadi töneewanaaca weneeneto, ñanno ta’deddu ecammajäätödö etannamo’jödö, yää i’jeta’jödööje anejjacoomo töne’tä weneenetoodö.

²² Judhíocoomo ene’ju’tojo ene’se weneeneto; quidiiyeecocoomo ’quene towaanojo’ne töweichöcoomo tumjumma weneeneto.

²³ Yääje yeichaame ñaa töneecammajä’e weneene Quidiito, ñäädä cuduusa jäcoono wääma’jödö. Yää ecammajäätödö na judhío cone’da yä’döjooto’comooje, judhíojöncomo wwäiñe ’quene na i’jeta’jödö nönge.

²⁴ Ñanno Wanaadi na’dejjadö wwäiñe mmaane Quidiito na Wanaadi jäduudu edhaajäje, shejjedö edhaajäje mmaja, judhío wwäiñe, quidiiyeeco wwäiñe mmaja.

²⁵ Yää Wanaadi ’jedööje töne’tä weneenetoodö soto sejjedö e’jodhe’cä na; jäduuje’da Wanaadi weichö töne’tä weneenetoodö mmaja soto jäduudu e’jodhe’cä na dea.

²⁶ Änwanno maatoodö naane’, jimmä; Wanaadi adha’dejjatääne wanna’da adhantawäiñe yeichaame edä nono de’wono que towaanojo’na’como, wanna’da mmaja cajiichaanaja’como, wanna’da mmaja täneejuca’como.

²⁷ Ñäädä towaanojo’nemjönööje edä nono de’woncomo ne’tädö Wanaadi cönei towaanojo’nato jöichojoodöje; jäduujemjönööje edä nono de’woncomo ne’tädö mmaja Wanaadi cönei chea jäduujato jöichojoodöje daja.

²⁸ Töwö Wanaadi cönei chea edä nono de’wono täneejuquemjönö, chiiñeme’cajä mmaja, wacööjönö mmaja, ijoqque’da tödöödö wetä yaawä ñäädä edä nono de’wono täneejucaato.

²⁹ Yääje yeijäcä anejja o’jodhe chö’tajä’jai’cha na Wanaadi owaadäädä.

³⁰ Töwö Wanaadi Jesuuquidiito jimmäje ayöödötääne. Quidiito jäcäinchädä töjaadonooje Wanaadi cödöötäne. Wanaadi chea Quidiito cönnöi cösejje’täneichomooje, cösoomaneichomooje mmaja, Cäwaanacaaneichomooje mmaja.

³¹ Yääje yeijäcä Wanaadi a’deddu imennaajä wä’dödö nönge eijai caato: “Ñäädä o’jodhe tötö’tajäätö’sato Cajiichaana jäcääne o’jodhe nichö’tajäätö’ñojo;” quee naadö woije eijai caato.