Uan 1 5 - El Nuevo Testamento en matsés

Esus tantiaquid icsamenu, cac icsate bunesa chiaid

¹ Nuquin Papan nidaidën chomiaid Mesias caid Esuquidistu nec, quequin tantiaquid Nuquin Papan: Cun bacuëbo nec, caido nendac. Matses caic: Amë tantiaquin aton bacuëbotsen tantiaquid nec.

² Adembidi Nuquin Papa tantiaquin Aidën chiacpadombuen naquid icquin Ambi: Cun bacuëbo nec, caidotsen nuqui tantiendac, quequin abimbo nuqui tantiec.

³ Adembidi Nuquin Papa tantiaquidën ambi: Naden nata, quequin chiampid tantiaquin nabanendac. Aden Ambi: Naden nata, quequin Chiampid natiapimbo ictequid nec, quenquio nuqui iquec.

⁴ Aden Nuquin Papan: Cun bacuëbo nec, caido icsho Nuquin Papa tantiesabon: Icsambuen namenu, quequidën icsambuen chiac: Padi. Adotiapimbo iquebique. Aden ubi chienda, caindac Esus tantiaquidën Esus tantiesa dëniacquin chuiquin.

⁵ Esuquidistu Nuquin Papan Madombo nec, quequin tantiaquidënquio Esus tantiesabon: Icsambuen namenu, caqui icsambuen nainquiocquin dëniactednendac.

Esuquidistu chuibanaid

⁶ Esuquidistu nidaidën choacsho: Nuquin Papan Madombo nec, quequin tantiamenuen Uan acten mentoanquidën acten mentopanëdash. Adembidi tantiamenuec cueste napotiaidën dectanac intac chididiquec uënëspanëdash. Adsho issun Nuquin Papan Mayanën: Aid Nuquin Papan Madombo nec, quequin chiaid abimbo nec.

⁷ Aid abimbo tantiamete 3ted iquec.

⁸ Abi acten mentoaidbëta aton intac chididiquiaid abimbo tantiamete nec. Adembidi Nuquin Papan Mayanën abimbo tantiamequid nec, quequin abibidi tantiamequid aidtedi nec.

⁹ Matsesën ambi isaid chuibansho: Abimbo chiec, nuqui capec. Adombuembidi abimbo chuibanquidquio icquin Nuquin Papan: Cun Madombo nec, quequin abimbo chiaid nec, quequin nuqui tantiec.

¹⁰ Nuquin Papan Madombo Esus nec, quequin tantiaquin: Nuquin Papa abimbo chuibanquid nec, quequin nuqui tantiec. Padnuen Nuquin Papa tantiesan: Cun madombo nec, quequin abimbo chiaid chiesa yec muaquidquio Nuquin Papa nec, quequin muaquin chuiquid nec.

¹¹ Nuquin Papan Chiaid nad iquec: Cun mado tantiaquido ënëdenquio yec ubëd tabadtequido iquendac, quequin chiaid iquec.

¹² Adec aton Mado Esus tantiaquido ënëdenquio yec aidbëd tabadtequido nendac. Esus tantiesaboen Nuquin Papabëd tabadtequidpenquio nendac.

Ënquin chiaid

¹³ Nuquin Papan Mado Esuquidistu nec, quequin tantiaquid Icbobëd ënëdenquio yec tabadtequid nendac, quequin tantiaquidquio ma mibitedi icpanu, quequin chuiquin dada uaic nebi.

¹⁴ Aden chiaid tantiaquin: Ubi nashunec, queshun: Abi bunacpaden chiannesho tantiashun Nuquin Papan ubi nashunendac, quequin nuqui tantiec.

¹⁵ Aden Abi bunacpaden chiannesho tantiaquidquio Nuquin Papa nec, quequin nuqui tantiec. Adembidi Abi chiannesho tantiashun umbi chiacpadombuen ubi nashunec, quequin nuqui tantiauaic.

¹⁶ Mibëtan Esus tantiaquidën icsambuen naic uënësenquio icsho issun Nuquin Papa chuita: Mibëd tabadtequid icmeuaquin bëdambuen isuata, Papa, quequin chiac Nuquin Papan bëdambuen isuaindac. Padnuen utsi icsambuen naic uënësso issun: Mibëd tabadme, quequin Nuquin Papa chienda.

¹⁷ Icsambuen naidtedi Nuquin Papan Chiaid niaquec icsatequid nec. Icsambuen naid utsi utsiec uënëstequid icnubi utsi utsiec uënësenquio ictequid nec.

¹⁸ Nuquin Papan: Cun bacuëbo nec, caido icquin icsambuen nabanesa nec, quequin nuqui tantiec. Aden abi tantiaquido icsho Nuquin Papan Madon Esusën dayun uaid icsho Mayan Icsa Satanasën icsa uatiapimbo iquendac.

¹⁹ Esus tantiaquid icquin Nuquin Papan: Cun bacuëbo nec, caido nebi, quequin nuqui tantiec. Nuquin Papa tantiesabotedi Mayan Icsa Satanasën iuaquin namiaido nec, quequimbidi nuqui tantiec.

²⁰ Nadembidi nuqui tantiec. Nuquin Papan Madombo choshon chuibanec: Nuquin Papambo nadquio iquec, quequin tantiamepondash. Adash: Esuquidistu Nuquin Papan mado Nuquin Papapadquidbëd abentsëc yacbimbuec nuquitedi iquec. Aidi Aton Papapadquid icquin abi tantiaquido icsho Nuquin Papa yacno ënëdenquiocnoc tabadmendac, quequimbidi nuqui tantiec.

²¹ Cun bacuëbobimbuecquido mibi neque. Naden icsambuen nainda. Utsibon ambibi nacnenshun papa cain tantiaid Nuquin Papapenquio tantiec tabadenda.