Uan 1 1 - El Nuevo Testamento en matsés

I. BEDANQUIN CHIAID ( 1.1-4 ) Nuquin Papabëd ënëdenquio yec tabadte chiaid

¹ Nidaid uabi yec icpampidi matsessun Esuquidistun chuibansho abëd icquidobëtan tantiapondambi. Aidi abëd icquidobëtan ispondambi. Adembidi mishpondambi. Aidi Nuquin Papabëd ënëdenquio yec tabadte chiannequidquio nepondash. Aidi Nuquin Papa tantiamianquidquio icsho mibitedi chuiquin dada uaic nebi.

² Aidi abuc Nuquin Papabëd ënëdenquio yec tabadbuedi nidaidënuësh matses icnuec chopanëdash. Choshon: Nuquin Papabëd ënëdenquio yec tabadte iquendac, quequin chiannequidquio ubëd icquidobëtan isondashun aidën naidquio chuibanec nebi.

³ Aidi ubëd icquidobëtan isquin chuibansho tantiondashun chuibanec nebi. Ma mibitedi ubëd icquidobëd abentsëc yacbimbuec ma tabadnu, quequin chuibanec nebi. Adecbidi abentsëc yacbimbuec Nuquin Papabëd yec aton mado Esuquidistubëd yec quec ubitedi tabadacpadecbidi ma mibitedi tabadnu, quequin chuibanec nebi.

⁴ Esuquidistu tantiaquido yec abentsëc yacbimbuec nuquitedi tabadec. Adec tabadec mibëdi cuishonquequiono, quequin chuiquin dada uaic nebi.

II. BËYUC CHUIBANAID ( 1.5—2.28 ) Esuquidistun matsesën icsambuen naid bedshunaid chiaid

⁵ Esuquidistun Nuquin Papan naid chuibansho tantiondashun mibitedi chuiuaimbique. Tantia. Nuquin Papa bëchamauanquiecquid yec bëdamboshë icquid nec. Adquid yec inchështiapimbo yacbimbuen icsambuen naisambo nec.

⁶ Adquid icnuc: Nuquin Papa tantiaquid yec aidbëd abentsëc yacbimboecquid nebi, quebuedëmbi icsambuen nabanquin aidën chiaid niac niacquid yec nuquibi muaquid nendac.

⁷ Nuquin Papan chiacpadombuen nabanquid yec Esus tantiaquid utsibobëd abentsëc yacbimbuec tabadquid nuquitedi nendac. Adquid nuqui icmenuec nuqui icsambuen naidtedi bedshunec abided cuidadec Nuquin Papan Mado Esuquidistu uënëspondash. Adec intac mëyanec uënësondaidënquio nuqui icsambuen naidtedi uqendac. Nuqui icsambuen nabued tantienquio yec bëshunendac.

⁸ Icsambuen naisambo nebi, quec nuquibi mua uadquid icquin abimbo chuibanquidpenquio nuqui nendac.

⁹ Padnuen Nuquin Papa chiec: Icsambuen naombique. Ubi bëdambo icmequin ubi bëdambuen ista, Papa, quesho tantiashun ambi chiacpadombuen naquin nuqui bëdambuen isendac. Nuqui icsambuen naidtedi tantienquio yec bëshunquin icsambuen naisabimbuecnuc nuqui bëdambuen isendac.

¹⁰ Matses icsambuen naisambo nibëdquiec, quequin chuiquin Nuquin Papan Chiaid dada uampid icnubi: Icsambuen naisambo nebi, quequin chiec: Muaquid Nuquin Papa nec, quiacbimbuec nuqui onquepec. Adec onquequin Nuquin Papan Chiaidquio bëdambuen tantienquiocquid nuqui nendac. Aden chuiquid Nuquin Papan chiacpadombuen naisa nendac.