Tito 2 - El Nuevo Testamento en matsés

Esus tantiec iccuededquido tantiamete chiaid

¹ Icsate bunquido dadpen icnubi Esus tantiaquido icmenu, quequin Nuquin Papan Chiaidquio chuibanquin tantiameta, Tito.

² Tsësiobo naden chuibanta: Mimbi icsambuen nate bunaid nainquio yec tabadta. Mibi bëdambocquid nec, utsibo camenuec bëdambuec tabadta. Aden naquin icsambuen natsiambi. Naden naic bëdambocquid yantsiabi, queshun bëdambuen nata. Adembidi Nuquin Papabëta Esus tantiaquiota. Adecbidi utsibobëd tantiananec tabadquin natiamiantequid icnubi chieshtoenquiocquin Esus tantiaquiota, quequin chuibanta, Tito.

³ Adembidi Esuquidistu tantiaquid machobo tantiamequin naden chuibanta. Nuquin Papan bëdambocquid icmiaid nebi, quec bëdambuec tabadta. Adembidi utsin icsambuen naiduidi chiannequid iquenda. Adembidi acte paë uaid tantiadennuen acquid iquenda. Bëdambuen nabanec tabadquin buntacbo ismeta, quequin machobo chuibanta, Tito.

⁴ Aden mimbi chiac machobon buntacbo chuiquin: Min bënë tantiec bëdambuec tabadta. Adecbidi min bacuëbo tantiaquin bëdambuen nashunta, quequin bëdambuen chuitsiash.

⁵ Adembidi naden bëdambuen tantiaquid: Naden naic icsatsiabi, queshun aden nainquio icquid. Naden naic bëdambo ictsiabi, queshun naquid. Min bënëuidi chudmequid icta, quequin chuitsiash. Min shubu nuntan nacnenquid yec utsibo nashunquid. Min bënën chiacpaden nata, quequin chuitsiash. Aden machobon abi ismiacpadombuen nëbi buntacbon bëdambuen naic tabadsho issun: Nuquin Papan Chiaid icsambo iquec, quequin utsibon chuishuntiapimbo ictsiash.

⁶ Adembidi caniabo chuiquin: Ubi bunacpadombuen naic icsatsiabi, queshun mimbi icsambuen tantiaidtedi nainquio yec bëdambuec tabadta, quequin chuibanta, Tito.

⁷ Bëdambuec tabadquin tantiamequin ismenu, quiash bëdambuec tabadta. Adembidi icsainquio yec bëdambuec tabadquin ismeta. Adembidi mamënshunmenquio icquin bëdambuen chuiquin tantiameta.

⁸ Adec bëdambuec tabadquin ismequin Nuquin Papan Chiaid abimbo mimbi chuibanac Esus tantiesabon mibi chieshënenquio icquimbi ubitedi icsambuen chuishuntiapimbo yec dacuëdec tabadendac.

⁹ Adembidi iuabo chuiquin: Bëdambo iquebi, ubi iuaquid camenu, quequin aidën chiactedi nabanquin chushquenquio icquin nabanta, quequin chuibanta, Tito.

¹⁰ Adembidi: Mibi iuaquidëna ampenquio icquin bëdambuen dayun uaquin nashunquin ismeta. Aden Esuquidistu tantiaquin nabansho isash mibi iuaquid: Cun iua Esuquidistu tantiaquid yec bëdambo yanac. Cun iua bëdambo icmequidën chiaid tantianu, quendac mibi iuaquid, quequin chuibanta, Tito.

¹¹ Matses abitedimbo bëdambuen iste bunquid icquin Nuquin Papan: Ubëd tabadtequid icmenu, quequin matsesën icsambuen naid bedshunash cuidadtequid icmenu, queshun Esuquidistu chomepanëdash.

¹² Aden chomiac Esusën Nuquin Papan chiacpadombuen naic abided cuidadaid icnuc nuqui icsambuen naidbëta Esus tantiesabon icsambuen nate bunaid ënte tantiamec. Adoac nëbi bëdambuen tantiaquid icquin: Naden naic bëdambocquid ictsiabi, queshun bëdambuen naquid nuqui nec. Adembidi: Aden naquin icsambuen natsiambi, quequin nainquio icquin Nuquin Papan tantiamiacpadombuen naic bëdambuec tabadquid nuqui nendac.

¹³ Cun Icbo Esuquidistu ubi Nuquin Papa cuidmenquiocquid bëdamboshëcquid chote uëshë chonoc cuishonquendabi, quequin caimbudec bëdambuec tabadta, quequin chuiquin tantiameuata.

¹⁴ Nuqui cainaid nuqui icsambuen naidtedi bedshunec abided cuidadec Esus uënëspanëdash. Adec uënësaid tantiaquid yansho: Cun matses caido yec bëdambuec tabadquid nendac, quequin chiaid tantiameta, Tito.

¹⁵ Umbi chuibuedtedi chuibanquin tantiameta. Mimbia tantiaquid icquin: Umbi chiacpadombuen nabanec tabadtedneta, quequin Quedetabo chuibanuata. Mimbi chiacpadombuen nainquiocsho issun: Aden naic tabadenda, quequin chuibanuata. Adec bëdambuec tabadquin bëdambuen chuibansho issun utsibon mibi icsambuen chuishuntiapimbo iquendac.