Tito 1 - El Nuevo Testamento en matsés

I. BEDANQUIN CHIAID ( 1.1-4 ) Mibi tantiembi, quequin chiaid

¹ Pabado nebi. Nuquin Papan namiaidquio nebi. Adembidi Esuquidistun: Ubi chuibenneta, caid nebi. Nuquin Papan: Nëido cun matses nendac, caido yec Esuquidistu tantiaquidombo ma icpanuna. Adquid yec ma Nuquin Papan chiacpadec bëdambuec tabadpanuna, quequin chuibanec nebi.

² Nuquin Papa muesambo nec. Adquid yec ëndenquimboshë nidaid uabi yequi onquec: Umbi chiacpadombuen Esuquidistu tantiaquido icsho ënenquiocquin ubëdi tabadmendambi, quequin ambi chiampicpadombuen ma nëidon tantianu, queshun Esuquidistu chuibennequidquio icmiondashi.

³ Nëbi ambi tantiacpadënquio Nuquin Papan matses bëdambuen ismequid Esuquidistu tantiamequin chuibenneta, caidquio nebi.

⁴ Umbi chuibanac Esuquidistu tantiaquid mibitsen yampondac, Tito. Adquid yec cun madobimbuecquid icsho mibi chuiquin dada uaimbique. Isec onqueta. Mibi tantiaquin mibi Nuquin Papabëd tabadmequid Esuquidistubëta Nuquin Papa naden chuiquin: Tito bëdambuen isquin bëdambuec tabadmeta, quequin chiannembi.

II. NUQUIN PAPAN NAMIAID ICQUIN NIDAID QUEDETA YACNOSHON TITON NABANAID ( 1.5—3.14 ) Quedeta yacnocquid Esus tantiaquidon chuiquid icmiaid

⁵ Umbi Esus tantiaquido iccuededsho chuiquin nauidbued: Bëdambuec tabadta, quequin ma nainquin chuinu, queshun mibi acte nënantan nidaid nacnëdquid Quedeta caid yacno nianondambi. Adembidi umbi chiondacpadombuen shubu dadpen icquid yacno yacnombuec capucuennequin umbi chuibanondacpadombuen ënden caniaido Esuquidistu tantiaquidombo istuidshun chuiquin: Mibëtan Esuquidistu tantiaquido namequid icta, quequin chuita, Tito.

⁶ Mimbi Esuquidistu tantiaquid utsibo isbanquin bëdambuen tabadmequin chuibanquid icta, caid nadquio icquid, quequin chuita, Tito. Bëdambuec tabadquin ismequid icta. Adecbidi chido abentsëc inquid icta. Min bacuëbobëdi Esuquidistu tantiaquido icta. Adquidën bacuëbo bëdambuec tabadquin aton papan chiaidbëta aton titan chiaid niaquenquio icquin bëdambuen nabanquid, quequin chuita.

⁷ Abëtan Esus tantiaquido namequid Nuquin Papan icmiaid yec bëdambuec tabadquid nendac. Utsin: Icsambuen naquid nec, cacmaid nendac. Utsibon chiaid tantienquio icquin ambi tantiaiduidi naquidpenquio nendac. Badedquio nëishesa nendac. Adecbidi tantiadennuen acte paë uaid aquesa nendac. Adecbidi cuesnante bunesa nendac. Adecbidi atona dadpen bednuec muaquidpenquio nendac.

⁸ Adquid icquin Esuquidistu tantiaquid isedquid chosho issun aton shubun iuedquid nendac. Adecbidi utsibobëd bëdambuec tabadte bunquid nendac. Adecbidi bëdambuen tantiaquin: Aden naic icsambo ictsiabi, quequid nendac. Adecbidi: Naden naic bëdambocquid yantsiabi, queshun bëdambuen naquidquio nendac. Adecbidi abimbo chuiquidquio icquin icsambuen nabi icquid cuidenquiocquid nendac. Adecbidi Nuquin Papan namiaid yec aidën chiacpadombuen nabanquid nendac. Adquid icquin ambi icsambuen nate bunaid nainquiocquid nendac, quequin chuita, Tito.

⁹ Ambi tantiaid Nuquin Papan Chiaidquio utsi uainquiocquin tantiamequidquio nendac. Adquid icquin utsibo chieshtomenquio icquin tantiaquid icmenuen bëdambuen chuibanquid nendac. Tantiesabobi: Icsambuen naquid nebi, camenuen bëdambuen chuiquid nendac.

Muaquido iquendac, quequin chiaid

¹⁰ Tantia. Chuinu. Nuquin Papan chiacpadombuen naisabo dadpen iquec. Abimbo caic, camenuec abimbo chiacbimbuec aido onquec. Dadpenshun isadaidbon nacpadombuen ma nanu, quequin: Shui dëbid dëtemeta, quequin muaquin chuibanec.

¹¹ Adquidon shubu utsin utsinquiec puduedcuennequin ambi icsambuen tantiaid chuibansho tantiash aid shubun icquido utsi utsiec cuëshëdec. Adembidi piucquid bedte bunquin adquidon muaquin icsambuen chuibaneque. Aden chuibanenda, cata, mado.

¹² Nidaid nacnëdquid Quedeta caidën tabadquidon matses ënden yampid cumapenen tantiaquid abentsëcshun naden aton matsesën naid chuipampic: Cun matses quedetabo ënëdenquio yec muaic chuinanquidombo nec. Aben icquid nëish piante bunacbimbuec chieshëmënquido nec. Chonoadenquio yec chieshuidequi icquin nua pequido neuaic, quequin chuipampic.

¹³ Aden abimbo chuipampic, quequin muaquin chuiquid ambi icsambuen tantiaid ënmenu, quequin: Aden chuibanenda, quequin chuita ma Esuquidistumbo tantiaquid yampanu, queshun.

¹⁴ Aden mimbi chiac Esuquidistu tantiaquid yanash isadaidbon Nuquin Papan Chiaid utsi uain ambembi chiaid chuisho tantiesa ma icnu. Adembidi Nuquin Papan Chiaid tantiate bunesan ambibi tantiaquin chiaid chuisho tantiesa ma icnu, queshun Esusquio chuita.

¹⁵ Bëdambuen tantiaquid yec bëdambuec tabadquin nabanquid nendac. Icsambuen tantiaquidien bëdambuen nate tantienquio icquin Nuquin Papa tantiesabo nendac. Icsambo iquec, quenquio icquin icsambuenuidi nate bunquin aiduidi tantiaquid nendac.

¹⁶ Aido: Nuquin Papa tantiaquid nebi, quebuedi utsibo ismec Nuquin Papa tantiesabimbuec tabadec. Nuquin Papan Chiaid niacquid yec chieshëmënquido nec. Bëdambuen tantiatiapimbo icquido icquin bëdambuen natiapimbo icquido nendac, Tito.