Timoteo 2 4 - El Nuevo Testamento en matsés

Nuquin Papan Chiaid chuisho tantienquio yaid

¹ Nuquin Papabëtan Esuquidistun mibi iseque. Bëdambuen chuibanta. Esusën padpidec choshon abitedishun Icbombo icquin uënësabi icquidobëta uënësaido uincuenmeshun cuidnumbi chiendac. Nëid ubi tantiaquid ubëdi tabadmembi. Nëid ubi tantiesa cuidembi, quequin chiendac.

² Aidën chiacpadombuen naquin Nuquin Papan Chiaidquio chuibanta, mado. Matses tantiate bunenquio icnuc chuibanquimbi utsibo tantiate bunquid icnuc adembi chuibanta. Esus tantiaquidon icsambuen nasho issun: Esus tantiaquido adesambo neque. Bëdambuequien tabadtiad, quequin chieshënenquio icquin chuita, mado. Utsibo bëdambuec tabadsho: Mibi bëdambuec tabadoc. Adquiequi tabadta, quequin chieshtoenquio icquin chuibanta. Bëdiactsëc tantiactsëcquido bëdambuen tantiamequin: Esus tantiaquidon nadoquid, quequin chuibanta, mado.

³ Iuecshun Nuquin Papan Chiaidquio matses dadpenshun tantiatiapimbo iquendac, quequin tantiashun aden abimbo chuibanta, mado. Aden tantiatiapimbo icquidën Nuquin Papan Chiaidpenquio chuisho tantiash: Ubi bunaidquio mimbi chieque. Tantianu. Ubi chiec cho, quequin muaquid utsi utsien abi yacno puduedmendac.

⁴ Pamumëdacbimbuecquin matsesën Nuquin Papan Chiaid tantienquio icquin tsusedpabon ambembi chiampidbëta ambembi chiaid utsi chuisho tantiendac.

⁵ Aidën nacpadombuen nainda. Nuquin Papan Chiaidquio bëdambuen tantiaquid yec bëdambuec tabadta. Adsho utsibon natiamequin chieshënaqui chieshtoenquio icquin Esusquio tantiata, mado. Adembidi Nuquin Papan Chiaid Bëda Esusën naid Esus tantiesabo chuibanta. Esus chuibanquidën nadoquid, caidtedi nabanta, mado.

Abi uënës uate Pabadon chiaid

⁶ Tantia. Chuinu, mado. Nuquin Papan tantiacpadën Nuquin Papa ismequin nëish iua pichicacbimbuec ubi uënëste uëshë nëbi yanec.

⁷ Utsibon chieshënquin mëyandedniaqui dayacquio icquin Esusën naid chuibenniondambi. Ubi bunaid bednu, quec cumapenec titinquiacbimbuen dayacquiocquin Nuquin Papan Chiaidtedi nabanombi. Nëbi Nuquin Papan tantiacpadën ënembi. Chieshtoenquio icquin Esus tantiaquidquio nebi.

⁸ Adec tabadec uënësacshobini matsesën naid abitedimbo tantiaquin cuidnun chuiquid icquin Nuquin Icbobëtan Nuquin Papan: Umbi chiacpadec mibi bëdambuec tabadoque. Ubi yacno ubëdi tabadmequin chuiquidën mauete bëdamboshëcquid meniacbimbuen mibi bëdamboshë icmendambi, caindac. Abi chote uëshën choshon aden Nuquin Icbon ubi chiendac. Adembidi abi chosho iste bunquioquin abi cainquidotedi Nuquin Icbon bëdamboshë icmequin abëdi tabadmendac.

Timoteo: Ubi isec cho, caid

⁹ Nëbimbobi ubi badedquio isec cho, mado.

¹⁰ Utsibo nidannebon ubentsëqui tsadebi. Demas atona bedteuidi bunquin ubi nianec shubu dadpen icquid Tesadonica caid yacno nidosh. Quedesentebic nidaid cuëshë utsi Cadasia caid yacno nidosh. Titobic nidaid cuëshë utsi Dadmasia caid yacno nidosh. Aidtedi nidannebon

¹¹ Ducas abentsëqui ubëd iquec. Madcos bedbëtsenec cho, mado. Aidën ubi nashunquin ubëtan Nuquin Papan namiacpadombuen natsiashe.

¹² Tiquico cuëmëdquid shubu dadpen icquid Epeso yacno nidmiombi.

¹³ Shubu dadpen icquid Todoade caid yacno Cadpo cuëmëdquidën shubun cuna nianondambique. Choquin cun dashcute umbi dada uaidbëta bedbëtsenec cho mado. Dada uaid abitedi buantiapimbo iquebi, queshun nëish iua bitsi nacnenaidën dada uaiduidtsëqui bëta.

¹⁴ Mibi tabadacno Epeso yacnoshon shocosh nacnenquidën Adejandon Esusbëta ubi cumapenen chieshënondash. Aidi Nuquin Papan cuidendac, mado.

¹⁵ Nuquin Papan Chiaid umbi chuibansho tantiate bunenquio icquin aidën icsambuen chuishunondashibique. Nuquin Papan Chiaid chuisho mibitsen icsambuen chuishunmenda.

¹⁶ Tauambuen bedshun: Quënën tsadunmenu, cac cuidte chuiquid tapa Doma yanocquid umbi naid umbentsëqui chuibampondambi. ¿Atotsi icsambuen nasho issun ubi bedo? Icsambuen nambo iccombi, capondambi. Ubëd icquido umbi nabanaid abimbo chuinuec choambo icpondash. Aid tantiaquin: Nuquin Papan aido cuidenquio icpashun, caimbi.

¹⁷ Nuquin Icbombini nianenquio icpondash. Isadaidpembo matses utsibo yacno nidshun ma Esus abided cuidadec uënës uaid tantiate chuibannu, quequin cuesambo icmepondashi. Adondaid icshobini chieshëmënquidon: Cuessunnenu, cauidpondash. Adshobini bëdi tëbuchoquid tapan bedacsho mënchicacbimbuen Nuquin Icbon nac aid matsesën cuessunnenquio icpondashi.

¹⁸ Padpiden chieshëmënquidon: Chieshtomenu, casho Nuquin Icbon nac chieshtoenquio ictsiabi. Nuquin Icbombidi abi yacno ambi namiacno abuc abëdi ubi tabadmendac, queshun: Nuquin Icbo bëdamboshë iquec, caimbi ënenquio icquin. Amen.

Ënquin chiaid

¹⁹ Mibi yacnocquido chuiquin: Mibi tantiembi, quiosh Pabado, quequin nëidted chuibanta mado. Nëidic Aquida. Nëidic aton chido Pisida. Adshumbic Onesipodobëta aton shubun icquidotedi aden chuibanta.

²⁰ Edastobic shubu dadpen icquid Codinto yacno tëshëdondash. Todopimo cuëmëdquidic nëncuenacsho shubu dadpen icquid Mideto caid yacno nianondambi.

²¹ Ue tsasi iquenuanquid taënushe. Baded cho, mado. Nëidon: Mibi tantiembi, quequin dada ua, caposhi. Nëidic Eubudo. Nëidic Pudente. Nëidic Dino. Nëidic chido Cadaudia. Nëidic Esus tantiaquido nëmbo icquid utsibotedishun. Aidtedishun aden chioshi.

²² Nuquin Icbo Esuquidistu ma mibëd icpanuna, mado. Nuquin Papantsen mibëta Esus tantiaquido ma bëdambuen ispanuna, quequin mibitedi tantiaquin Nuquin Papa chiannembi. Amen. Aidted chuiquin dada uaombi.