Timoteo 2 3 - El Nuevo Testamento en matsés

Icsambuecshë tabadte uëshë choendac, quiaid

¹ Tantia, mado. Mibi chuinu. Nuquin Papan abitedi cuidte uëshë yanabi icnuc natiamiantequid dadpenquio iquendac.

² Nadquido iquendac. Nëidic utsi tantiatiapimbo yec abiuidtsëqui datantiadquido. Nëidic piucquid bedte cumapenec bunquidombo. Nëidic: Is. Umbimbo naiduidi bëdambo iqueque, quequido. Nëidic: Bëdambuec isadquid nebique. Is, quequido. Nëidic Nuquin Papa chieshënec icsambuen chuishunquido. Nëidic amëbëtan anin chiaid niac niacquido. Nëidic utsibon nashunaqui: Mimbi bëdambuen naoc, quenquiocquido. Nëidic Nuquin Papa tantiesa yec: Nuquin Papa bëdambo iquec, quesabo.

³ Nëidic utsibo natiambo icmequido. Nëidic cuesnante bunquido matses tantiesabo. Nëidic utsibon icsambuen naid chuiquido. Nëidic ambi icsambuen nate bunaid ëntiapimbo icquido. Nëidic abembi chieshëmënquido. Nëidic utsibo abembi natiamequido. Nëidic bëdambocquid chieshënquido.

⁴ Nëidic bëdambocquid danmianashi mua uanquido. Nëidic bëdambuen tantienquio icquin ambi natemaid naquido. Nëidic: Ubiuidtsëqui bëdambo iquec, quec abibi datantiadquido. Nëidic ambi naiduidi bunquin Nuquin Papa tantiesabo.

⁵ Nëidic: Nuquin Papa tantiaquid nebi, quec muaquin aidën chiaid niac niacquido. Adquidtedi: Icsambuen naic tabadquido neque. Adquidobëd onquec tabadenda, caimbi.

⁶ Adquidon mibi yacnoshon shubu utsin utsinquien isedben isedbenac caosh. Adec chidouidquio yacno shubun puduedcuennequin ambembi chiaid chuibanac caosh. Aden chuisho tantiashun: Padi catiadquidi chidobon: Mimbi chiaid tantianu, quequin badedquio tantiashumpac caosh. Aid chidobo Nuquin Papan Chiaid niacash adecbidi icsate bunquiec tabadpac caosh.

⁷ Aden icsambuen naquidën ambembi chuidednesho tantiadednequid icquin chidobon Nuquin Papan Chiaidquio bëdambuen tantiatiapimbo icpac caosh.

^8-9 Chidobo chiec muaquid yec nëidon icsambuen nampidpadquid nec. Abentsëc Anes cuëmëdnubi utsi Ambades cuëmëdpampic. Isadaidbo tsusedpa Moisesën Nuquin Papan Chiaidquio chuisho tantiashumbi aidon: Muequi nec. Umbimbo nadatiambocquin nabanquin ismenu, quebuedombi bëdiactsëc tantiaquin nauidpampic. Adsho issun: Muambo nec, capampic matsesën. Adembidi chido chiec muaquido Nuquin Papan Chiaid chiesa nendac. Icsambuen tantiaquin Nuquin Papambo tantiesa nendac. Adembidi aidon muaquin chuisho tantiashun matses dadpenshun: Muequi nec, capendac.

Nuquin Papan Chiaid isbanec bëdambuec tabadte Timoteo chiaid

¹⁰ Umbi mua uainquio icquin abimbo chuibanondaid mimbi tantiec. Ma Esus tantianu, quequin Esusën naid chuibanec bëdambuec tabadondabi. Esus tantiaquidquio icquin matses tantiaquin Esusën naid chuibenniondambi. Chieshënaqui chieshtoenquio iccondabi.

¹¹ Aden chuibennesho issun chieshënondashi. Nëidted shubu dadpen icquid yacnoshon ubi chieshënondaid mimbi tantiec. Antioquia yacnoshon. Adembidi Iconio yacnoshon. Adshobini shubu dadpen icquid utsi Disteda yacnoshonquio cuessunneuidquiopondash. Adshobi Nuquin Icbon nac uënësenquio icpondabi.

¹² Ubipadquido Esus tantiaquidotedi bëdambuec tabadsho issun adembidi utsibon cumapenen chieshënendac, quequin nuqui tantiec.

¹³ Padnuen chieshëmënquidobëd bëdambocquid danmianquiec muaquido icsambo icbuedi utsibontsen mua uaid icbuedi buëdanquiec muauannanec abitedi icsamboshë yanendac.

¹⁴ Adquidpenquio mibi nec, mado. Umbi isondaidon abimbo tantiamequin chuibanondashi, quiash Nuquin Papan Chiaid niaquenquio yec bëdambuec tabadta, mado.

¹⁵ Ënden bacuëmpi icquimbi Nuquin Papan Chiaidquio min matsesën chuibansho mimbi tantianëdac. Adshun: Aton Mado Esus tantiaquid uënësacsho abëdi Nuquin Papan tabadmendac, quequin mimbi tantiabennëdac. Aden Nuquin Papan bëdambuen isquin cuidenquiocte tantiametembo Nuquin Papan Chiaid nendac.

¹⁶ Nuquin Papan Chiaid aton Mayanën tantiamiacpadombuen matsesën dada uapampic. Aidën chiaid abitedimbo bëdamboshëcquid nec. Aid isec onquequin: Nuquin Papan chiacpaden naic bëdambuec tabadnuna. Esus tantiaquido icquin icsambuen nainquien ictiad, quequin abi chuibanquidën chuibanec. Adembidi: Esus tantiaquido adec tabadesa neque. Padi. Bëdambuequien tabadtiad, quequin chuibanec.

¹⁷ Nuquin Papan: Ma umbi namiaidon umbi chiaidquio isban isbanquin Esus tantiaquin matses nashunec ma bëdambuen naic tabadnu, quequin Ambi Chiaidquio dada uamepampic.