Timoteo 2 2 - El Nuevo Testamento en matsés

Natiamiaqui chieshtoenquio icquin chuibanta, quiaid

¹ Chieshtoenquio icquin Esus chuibanta, mado. Esuquidistunuidtsëqui Nuquin Papa ubi bëdambuen ismec. Aidën bëdambo icmiac dayacquiocquin naimbi, queshun Esus chuibanta.

² Matses dadpenshun tantianuc umbi chuibansho mimbi tantiondac. Umbi aden chiondaid utsibotsen chuiban. Adshun mimbi chuibanaido abentse abentsen: Aidon chieshtoenquio icquin Esus bëdambuen tantiamequin chuibantsiash, queshun: Mimbitsen chuiban, cata, mado.

³ Sondado dayacquiocquidën chieshenquio icquin nacbimbuen chieshtoenquio icquin bëdambuen nabannuna. Matsesën natiamequin chieshënaqui Esuquidistun chiacpadombuen chieshtoenquio icquin nabannuna.

⁴ Sondadon: Mibi bëdambo iquec, camenuen aton chuiquid tapan chiacpadombuenuidi naquid. Ambibi tantiaid nainquiocquinc utsibon chiacpadombuen nainquiocquinc caquin aton chuiquid tapan chiacpadombuenuidi naquidquio sondado nec.

⁵ Ma nuquin matses titinquequidquio. ¿Mitsipadquio icpec? Aton uidën tanec aton matsesën chiaction abia titinquec chosho: Uidënquio titinquiosh, queshun mauete menequid. Ambi chiaction titinquiabi icsho mauete menenquio icquid.

⁶ Ma nuquin matses tied uaquidquio. ¿Mitsipadquio icpec? Dayacquio yec chonoadquidënquio aton tied uashun ambi nitsinaid caniash sinacsho ambia pequin tauaquid.

⁷ Aden umbi chuibuedtedi tantiata. Adsho aidtedi Nuquin Icbon mibi bëdambuen tantiamendac.

Esuquidistu tantiata, quiaid

⁸ Esuquidistu tantiata. Aidi matsesash isadaidbo tsusedpa Dabidën tsiuecquid nepanëdash. Aidi uënës uacsho Nuquin Papan uincuenmepanëdash, quequin Chiaid Bëda Esusën naid umbi chuibambuedquio abi iqueque. Aidquio tantiaquiota.

⁹ Aden Chiaid Bëda Esusën naid chuibennequidquio icsho chieshënquin bedshun cuessunnianquid uidën uacbimbuen shocosh bucu nacnenaidën mëtaniac mëyadebi. ¿Ubi aden uidënuaquin mëtaniacpadenda Nuquin Papan Chiaid uidën uapadic? Padenquio.

¹⁰ Aden chuibannubi Nuquin Papan ambi tantiamiaidtedi Esuquidistu tantiamendac. Aid tantiaquido uënësacsho cuidenquio icquin abëdi tabadmendac, quequin tantiec quënën tsadunondaid yequi chieshtoenquio iquebi.

¹¹ Naden abimbo chiaidquio tantiash chieshtoenquio iquebi: Nuquin Icbon chiacpadombuen naquid chieshëmënquidën uënës uacsho Nuquin Icbon abi yacno abëdi tabadmendac.

¹² Aden chieshënquin natiamiaqui chieshtoenquio icquin abi tantiec uënësacsho Esusën ambi namiacno tabadmendac. Esus tantiaquidpenquio nebi, quequid icsho: Adembidi Umbi tantiacmaido nec, quequin Esusën Nuquin Papa chiendac.

¹³ Matses icquin Nuquin Papan chiacpadombuen natiapimbo nuqui icnubi Esusien aidën chiacpadombuen naquidquio nec. Adquid icquin ambibi chiaid niaquesambo nec, quequin chuipampic.

Nuquin Papan Chiaid isban isbanta, quequin Timoteo chiaid

¹⁴ Umbi dada uaquin chuibued mibëd icquido naden chuibanta, mado. Nuquin Icbon isnubi Esusquio chienquio yec ambembi chiaid chiec mibi chushcananeque. Adenda. Adec chushcanansho tantiashun matsesën icsambuen tantieque. Padi, cata, mado.

¹⁵ Mimbi bëdambuen naoc, Nuquin Papa camenuen bëdambuen nata dacuëdenquio icquin. Umbi naid ma Nuquin Papan isnu, queshun adota. Ambi chiaid bëdambuen isban isbanshun chieshtoenquio icquin Nuquin Papan Chiaidquio chuibanta, mado.

¹⁶ Ambembi chiaid chiec onquequidobëd icsambuec onquec tabadenda. Adec onquequido icsambuen nabuedi buëdanquiec Nuquin Papan Chiaid niac niaquec icsambuenshë naquid yaneque.

¹⁷ Nënaid icsa bedash daicsabudacbimbuec adquidën chiaid tantiaquido dadpen yaneque. Adquidën chuisho tantienda. Aden chuiquid Imeneyobëd Pideto caid nec.

¹⁸ Aidon Nuquin Papan Chiaidquio chienquio icquin muaquin chiec: Uënësabi icquin Esus tantiaquido yequi uincuenaidquio nuqui nec, quequin muaquin chuisho tantiashun utsin utsinquien Nuquin Icbon Chiaidquio tantienquio yanendac.

¹⁹ Padnuen shubu uanun buintad nitsinacbimbuecquid Nuquin Papan Chiaidquio nec. Aidi Esus tantiaquido uidënquio icmete nec. Ambi dada uamequin chiampid nad iquec: Abi tantiaquido Nuquin Icbon tantiec. Adquid icnuc abi tantiaquidon: Cun Icbo nec, queshun ambi icsambuen naid ënendac, quequin chuipampic.

²⁰ Dadpen dayun uaquidën shubun shocosh bëdambocquid nacnenaid icnubi utsi icsactsëcquid iquec. Bëdambo icquidën codocaic. Icsactsëcquid icsa secanun sandote nec.

²¹ Adquid icnuc Esus tantiaquidquio icte bunebique. Nëbi muaquin chuisho tantiatiapimbo icquin Nuquin Icbon chiacpadombuen naimbi, quiash Nuquin Icbon iuambo yantsiash shocosh bëdambocquid yacbimbuec. Adsho Nuquin Icbon bëdambuen nametsiash.

²² Caniabon abi bunacpadombuen icsambuen naquid tanenda, mado. Adenquio yec bëdambuec tabadte bunquiota. Adec tabadquin matses ambi icsambuen naid ënmenuen abimbo chuita. Chieshtoenquio icquin Esus tantiata. Utsibobëd tantiananec bëdambuec tabadta. Nuquin Icbo Esus bëdambocquid nec, quequin tantiaquidobëtan Esus tantiata.

²³ Mibi yacnoshon ambembi chuiquidon chianesho tantiash matses chushcananondashe. Adquidën chuisho tantienda.

²⁴ Nuquin Papan Chiaid chuibanquid utsibëd chushcananenquio icquid nendac. Chieshëmënenquio icquin aton matses bëdambuen isquid nendac. Adembidi nëishenquio icquin Nuquin Papan Chiaidquio bëdambuen tantiamequidquio nendac. Badedi chieshtoenquiocquid nendac.

²⁵ Esus tantiesabon: Mimbi Nuquin Papan Chiaid chuisho tantiatiapimbo iquebi, caqui adembi chieshtoenquio icquin Nuquin Papan Chiaidquio mimbi chuibanendac. Nuquin Papan Ambi Chiaidquio tantiamiac: Icsambuen naombi, quequin ma Esus tantiesan tantiabennu, quequin abi chuibanendac.

²⁶ Aden Nuquin Papan Ambi Chiaidquio tantiamiac Esus tantienquio icbuedëmbi Esus tantiabenshun abi iuaquid Mayan Icsa Satanasën icsambuen namiacpadombuen nabuedëmbi ënendac.