Timoteo 2 1 - El Nuevo Testamento en matsés

Mibi tantiembi, quequin chiaid

¹ Pabado nebi. Nuquin Papan tantiacpadombuen Esuquidistun: Ubi chuibenneta, caidquio nebi. Ambi chiampicpadombuen aton Mado Esuquidistu tantiaquid uënësacsho Nuquin Papan abëdi tabadmendac, quequin Esus chuibennequidquio nebi.

² Cun madobimbuecquid umbi tantiaidquio mibi icsho mibi chuiquin nëid dada uanu, Timoteo. Nuquin Papan Nuquin Icbo Esuquidistubëtan icsambuen naquid icsho cuidenquio icquin bëdambuen isquin ma bëdambuec tabadmepanu, quequin mibi tantiaquin Nuquin Papa chiannembi.

Mibi tantiaquin Nuquin Papa chiannembi, quiaid

³ Cun tsusedpabon nampicpadombuen Nuquin Papa tantiaquin aidën chiacpadombuen naquid nebi. Adquid icquin Nuquin Papa ënenquiocquin badiadquidën badiadquidënquien mibi tantiaquin naden chiannembi: Mibi tantiaquid Timoteo bëdambo icmec mibi bëdamboshë iquec, Papa, quequin chiannembi.

⁴ Ubi nidnu, quesho tantiash mibi shubiondaid tantiec mibi iste bunquiebi, mado. Mibi isec cuishonquetsiabi.

⁵ Naden mibi tantiembi. Tauambuen aton chichi Doidabëtan aton tita Eunisen Esus tantiabenondacpadombuen Timoteontsen nëbi Esus tantiaquiec, quequin mibi tantiembi.

Dacuëdenquio icquin Esus chuiban, quiaid

⁶ Aden tantiaquid icsho mimbi tantiondaid padpiden mibi chuinu. Naden chiondambi: Min Mayan nëidbëd tabadmequin cuesambo icmequin Esus chuibanme, Papa, quequin mibi mamishquin Nuquin Papa chiondambi. Adoac aton Mayan mibëd tabadmiaid icquin dacuëdenquio icquin Esus chuibanta, mado.

⁷ ¿Nuquin Papan aton Mayan nuquibëd icmiacta nuqui natia dacuëdpe? Padenquio. Nadatiambocquin nabanquid nuquibëd icquin nuqui cuesambo icmec. Adembidi Nuquin Papan Mayan Bëdan tantiamiac nuqui utsibobëd tantiananec bëdambuec tabadec. Adembidi nuqui icsambuen nate bunaid namenquio icquin nuqui bëdambuec tabadmec.

⁸ Adquid nebi, queshun dacuëdenquio icquin Nuquin Icbo Esuquidistun naid chuibanta. Adembidi dacuëdenquio icquin: Quënën tsadunaidi Pabado tantiaquiembi, cata. Utsibon chieshënquin natiamiaqui Nuquin Papan namiacpadec chieshtoenquio icquin Chiaid Bëda Esusën naid chuibanta.

⁹ Nuquin Papan: Cuna nec, quequin aton Mado Esus tantiamiaido icquin adonona. ¿Nuqui bëdambuec tabadshoda Nuquin Papan nuqui bëdambuen isbempondash? Padenquio. Ëndenquimboshë nidaidbëta matses uabi yequi Nuquin Papa: Umbi chiaid niac niacquin icsambuen naquidëmbi cun Mado Esuquidistu tantiasho cuidenquio iquendambi, quequin ambi chiampicpadombuen nuqui Esus tantiaquid icmiac.

¹⁰ Aden ambi bëdambuen iste tantiamiabi icshumbic nëbi Esuquidistu matsesmeshun matses tantiamiac. Adoac: Abi tantiaquid uënësacsho cuidmenquio icquin uënëstiapimbo icquid icmequin Nuquin Papa yacno abëdi Esuquidistun tabadmendac, quequin Esusën naid Nuquin Papan Chiaid Bëda nuqui tantiec.

¹¹ Aden tantiaquid icsho Nuquin Papan: Esus chuibennequid icta, capondashi. Adoac nidaid utsi utsiec yacno nidshun Nuquin Papabëta Esus chuibennequin tantiamebennequidquio nebi.

¹² Aden chuibenneshobini chieshënquin natiamequin quënën tsadumpondash. Adoaqui dacuëdenquio yec chieshtotiapimbo icquin Esus tantiembi. Umbi tantiaidquio nadatiambocquin nabanquidquio Esus nec. Adquid icquin: Umbi naid chuibanenquio yannushe, queshun abi tantiamequin Esusën ubi chieshtomenquio iquendac. Aidëmbi nidaidën choabi icquin abi chuibanquid chieshtoenquio icquid ubi icmendac, quec dacuëdenquio iquebi.

¹³ Tantia, mado. Mibi chuinu. Umbi abimbo chiondaidquio chuiban: Nuquin Papan Chiaidquio nec, queshun. Esuquidistu tantiaquid icquin matsestsen tantiec bëdambuec tabadta, mado.

¹⁴ Nuquin Papan Mayan Bëda nuquibëd iqueque. Aidën tantiamiac umbi chiondacpadombuen Nuquin Papan Chiaidquio chuiquin Esusën naid chuibanta, mado.

Onesipodo chiaid

¹⁵ Mibi tabadaid nidaid cuëshë Asia caid yacnocquido dadpen ubi nianec cuëshëdondaid mimbi tantiec, mado. Piquedobëd Edmoquenes adecbidi ubi nianec ubëd cuëshëdondash.

¹⁶ Onesipodo caidëmbien ubi bëdambuen ispondash. Abëd icquidobëtan ubi quënën tsadunacsho issumbi dacuëdenquio icquin isuan isuanquin bëdambo icmioshi. Adsho issun: Aton shubun icquidobëta aid bëdambuen ista, Papa, quequin Nuquin Papa chiannembi.

¹⁷ Aidëmbi nëmbo shubu dadpen icquid Doma yacno choshon: ¿Mitsimbo Pabado icpec? quequin iuen nibëmbennequin istuidpondashi.

¹⁸ Epeso yacnoshon aidëmbidi baded badedquien nuqui nashundedniondaid mimbi tantiec. Aden ubi nashunondaid tantiaquin: Nidaidën padpidec choshon Cun Icbon ambi matses cuidte uëshë chonoc: Onesipodo bëdambuen isquin mëyadte yacno nidmenda, Papa, caimbi.