Timoteo 1 5 - El Nuevo Testamento en matsés

Esus chuibanquid icquin bëdambuen chuite

¹ Nuquin Papan Chiaid chuibanquid icquin tsësiobo chushcainda, mado. Esus tantiaquid icsho: Cun pabimbuecquid nec, queshun bëdambuen chuita. Adembidi caniabotsen: Cun utsibimbuecquid nec, queshun bëdambuen chuibanta, mado.

² Cun tabimbuecquid nec, queshun machobo bëdambuen chuibanta. Adembidi chido buntacbotsen: Cun chibibimbuecquid nec, queshun bëdambuen isquin: Nëid chudtiadquio icchitebi, quenquio icquin Nuquin Papan Chiaidquio chuibanta, mado.

Niante nashunte chiaid

³ Tantia, mado. Esus tantiaquidon abëtan Esus tantiaquid niante icsho nashunte chuinu. Niante aton matses nibëdquid: ¿Tsuntsimbini nashumpatsiashba? quequid Esus tantiaquidon nashunquid.

⁴ ¿Ada nianten tishaid aton bacuë icpec? Aidëmbi ani nashuntsiash. ¿Ada aton baba icpec? Aidëmbi aton chichi nashuntsiash. Aidëmbidi aton shanuachotsen nashuntsiash. Ubi nashundenned neque. Aid nashunnu, queshun nashuntsiash. Aden ambi chiacpadombuen nasho isash: Bëdambuen naic, quetsiash Nuquin Papa.

⁵ Padnuen aton matses nibëdquio icquid nianten Nuquin Papa chiannequid: Nuquin Papan ubi nashuntsiash, queshun. Mimbi ubi tantiaquieque. Ubi nashunta, Papa, quequin Nuquin Papa ënenquio icquin chiannequid niante icsho abëtan Esus tantiaquidon nashunquid.

⁶ Niante utsimbien abi bunaiduidi naic. Adquidën uënësacbimbuecquin Nuquin Papa tantienquio iquec. Adquid Esus tantiaquidon nashunenquio iquec.

⁷ Umbi aden niante nashunte chuibued Esus tantiaquido utsibotsen chuita, mado. Aton matses nibëdquid niante nashunenquio icsho: Esus tantiaquido icsambo iquec, utsibon canushe, queshun chuita.

⁸ Aton shubun icquidotsen Esus tantiaquidon nashunquid. Abëd icquido nashunenquio icquin Nuquin Papan chiacpadombuen nainquio icquid nec. Esus tantiesabon icsambuen nanubi Esus tantiaquid icquimbi aton matses nashunenquio icquid yec icsambuenshë naquid nec.

⁹ Nëidtedi niante Esus tantiaquidon nashunaidombo nec, quequin aton cuëmëdquid cuëmëdquidquien mimbi dada uaondac. Nadquid chido: Esus tantiaquidon nashunaid icta, cata. Seta dadpenquio 60ted matanmec machobudaidquio. Aton bënë abentsëc ictennedquio.

¹⁰ Matses nashunquidquio nec, utsibon cadenned. Aton bacuë bëdambuen caniuadenned. Isedanquido aton shubu yacno chosho bëdambuen isquin nashundenned. Esus tantiaquido tantiaquin acten tapandenned. Matses daicsabudaidbëta nënquido natiamiaido nashundenned. Adec bëdambuec tabadtenned icsho issun: Ma Esus tantiaquidon nashunnu, cata.

^11-12 Utsibic niante machobudambo icquid icsho issun aton cuëmëdquid dada uata, cainda. Esus tantiaquido chuiquin: Esuquidistu uidtsëqui tantiaquin abi tantiaquido nashunembi, quebuedëmbi dada bedte bunquin ambi chuibued niacsho issun utsibon: Icsambo icquid nec, catsiashe.

¹³ Adquid shubu utsin utsinquien isedben isedbenec chieshquidquio yanash icsambuen chiec onqueteuidtsëqui buntsiash. Utsibon icsambuen naiduidi chuibennequidquio ictsiash. Ambi chuitemaidtsen chuiquid ictsiash.

¹⁴ Adquid niante machobudambo icquid dadan bedac bëdambo ictsiash, caimbi. Adoac bacuë tishuatsiash. Adshun aton shubun icquido nashuntsiash. Adec bëdambuec tabadsho issun: Icsambuen chuishunquin: Icsambocquid nec, Esus tantiesabon catiapimbo ictsiash.

¹⁵ Adquid niante machobudambo icquidën utsin utsinquien Esus tantienquio yanshun Mayan Icsa Satanasën tantiamiacpadombuen nabanec tabadac caosh.

¹⁶ Niantebëd icquid aton matses ¿ada Esus tantiaquid chido icpec? Aidëmbi niante nashunac bëdambo ictsiash. Umbi nëid nashumbannuc niante utsi aton matses nibëdquidquio icsho Esus tantiaquidon ma nashunnu, queshun abëd icquid niante nashunac bëdambo ictsiash.

Esus tantiaquido chuibanquid chiaid

¹⁷ Tantia, mado. Esus tantiaquidon abi chuibanquid nashuntetsen mibi chuinu. ¿Ada Esus chuibanquidën bëdambuen naosh? Adquidën Nuquin Papan Chiaid bëdambuen tantiamequin Esus bëdambuen chuibansho ambi chuibanaidon bëdambuen isquin nashunquin dadpen menequid nendac. Ma bëdambo icnu, queshun piucquid menequid nendac.

¹⁸ Adquid chuiquin Nuquin Papan Ambi Chiaid dada uamiampid nad iquec: Min tiedën caniquid ma baca bënën ëshchicnu, queshun tintincamequin min baca dëpuquenda. Ma penu, quequin chuipampic. Adembidi chuiquin Nuquin Papan Chiaid dada uamiampid nad iquec: Naic cho. Mibi cuidquin menenu, cac chonoadacsho abi chonoa uaquidën menequid, quequin Nuquin Papan chuipampic. Adembidi Esus tantiaquidon abi chuibanquid nashunquid nendac.

¹⁹ Utsibic Esus chuibanquid caic: Nuquin Papan Chiaid niacquin icsambuen nasho isombi, quequin matses abentsëcshun chuisho tantiashun: Abimbuen cachitec, cainda. Daëdshun chuisho tantiashun: Abimbuen cachitec, cata. Adembidi 3tedshun chuisho tantiata.

²⁰ Esus chuibanquidën Nuquin Papan Chiaid niacacsho: Nuquin Papan Chiaid niacquin mimbi icsambuen naoc. Aden nainda, cata. Esus tantiaquido dadpenshun tantianubi aden chushcata. Aden chuisho tantiash dacuëdec: Ubitsen adembidi chushcapanundac, queshun ma utsibon Nuquin Papan Chiaid niaquenquio icnu, queshun chuita.

²¹ Esuquidistubëtan Nuquin Papan nuqui isec. Adembidi Nuquin Papabëd icquidon nuqui iseque. Umbi chuibocpadombuen nata. Min matsesën mimbi tantiaidënquiobi Nuquin Papan Chiaid niacacsho adembidi: Mimbi icsambuen naique. Padi, cata. Shubu utsin icquidon Nuquin Papan Chiaid niacacsho adembidi: Cun matses umbi tantiaidquio neque. Chienquio iquembi, cainda.

²² Nuquin Papan Chiaid chuibanquid icmenuen nuqui naondacpadombuen badedquio mamishenda. Ambi naid iuen isquioshon ambi chiaid iuen tantiaquioshon: Bëdambo icquid nec, queshun nata. Esus chuibanquid icta, mimbi badedquio cabuedën Nuquin Papan Chiaid badedquio niacsho isash: Ambi: Adquid icta, caidbëd Timoteo icsamboshë iquec, utsibo quenushe. Ubëtan chuibanquid icta, badedquio cainda. Bëdambuen nata.

²³ Pucu paëmbo yan yanebi, mibi quesho tantiashun chiec nebi mado. Acteuidi acashien mibi niaque. Actequid utsi uba chinaid paë uaid pistsëc acta: Pucu ma bëdannu, queshun.

²⁴ Tantia. Mibi padpiden chuinu. Ubëtan chuibanquid icta, canuen aidën naid utsibon naden chuisho tantiata. Aton matses ismequin icsambuen nasho: Icsambuen naquid nec, badedi catsiash aton matsesën. Utsimbic aton matses ismenquio icquin icsambuen nasho issun: Icsambuen naquid nec, quequin badedquio tantienquio icquin iuecshumbi chuisho tantiatsiash.

²⁵ Utsimbien bëdambuen nabanquin ismiac: Bëdambo icquid nec, badedi catsiash aton matsesën. Utsimbic ismenquio icquin bëdambuen nabansho: Bëdambo icquid nec, quequin badedquio tantienquio icquimbi iuecshun chuisho adembidi tantiatsiash. Ubi adsho tantiashun: Nuquin Papan Chiaid chuibanquid icta, badedquio cainda.