Timoteo 1 1 - El Nuevo Testamento en matsés

Mibi tantiembi, quequin chiaid

¹ Pabado nebi. Nuquin Papa yacno iuedanquid Esuquidistu nuqui cainaidën: Ubi chuibenneta, caidquio nebi. Aton Mado tantiasho nuqui bëdambuen isquid icquin Nuquin Papan: Cun Mado Esus chuibenneta, caidquiobidi nebi.

² Tantia. Mibi chuinu, Timoteo. Umbi chuibanac Esus tantiabenondaid yec cun madobimbuecquid mibi neque. Mimbi iste nëid dada uanu. Mibi tantiaquin Nuquin Papa naden chiannembi: Cun Icbo Esuquidistubëtan cun mado icsambuen naquid icsho cuidenquio icquin bëdambuen isquin bëdambuec tabadquid icmeta, Papa, quequin Nuquin Papa chiannembi.

Muaquin chuisho: Aden chienda, cata, quequin chiaid

³ Tantia. Mibi chuinu, mado. Nidaid cuëshë utsi Masedonia caid yacno nidquin umbi chiondacpadquiec Epeso yacno icta. Mibi yacnocquidon: Nuquin Papan Chiaidquio chuinu, quebuedombi aid abimbo chienquio icsho tantiashun naden chuita: Nuquin Papan Chiaid chuiquimbi muaquin ambembi chiaid utsibëta natsusuaquin chuibanenda, cata.

⁴ Nadembidi chuibanta. Tsusedpabon ambembi chiampiduidi chiec tabadenda. Adembidi utsibon: Nuquin matsesën tishaid nepampic. Utsibic nuquin matsesën tishaid cuëmëdquid chuibampac caondash. Utsibic: Aidën tsiuecquidouidtsëqui bëdambo iquec, quequin dadpenquio chuibamposh. Aden chiaiduidi tantiec abembi chushcananec tabadenda, cata. ¿Adenuidi chuiquinda mimbi Nuquin Papan Chiaidquio bëdambuen tantiamepe? Nuquin Papan Chiaidquien chuitiad, cata. Aden chiac Nuquin Papa bunacpaden Esuquidistu tantiatsiash.

⁵ Adshumbic aidobidi naden chuita: Bëdambuen tantiaquid yec ma matses bëdambuec tantianannu, queshun Nuquin Papan Chiaidquio chuita. Adoac Nuquin Papabëta Esus bëdambuen tantiec tabadec matses bëdambuec tantianantsiash, cata, mado.

⁶ Mimbi aden chiacpadombuen nainquio icquidoen Nuquin Papan Chiaid bëdambuen tantienquio yec ambembi chiaid chiec iuec tabadec chushcananec.

⁷ Adquidon: Nuquin Papan: Naden nata, quequin chuiquin Moises dada uamiampid bëdambuen tantiembi. Moisesën chiampicpadombuen namenuec aid chuibanquid icte bunebi, quebuedombi Nuquin Papan Chiaid bëdambuen tantienquio icquimbi icsambuen chuibanec.

⁸ Nuquin Papan: Naden nata, quequin chuiquin Moises dada uamiampid icsambo iquec ¿quequin chiectabi nedi? Padenquio. Ma aidi bëdambo iqueyoc. Nëid tantiashun ma ambi icsambuen naid ënnu, queshun aid isbanshun abimbo chuibanac bëdambo ictsiash.

⁹ ¿Bëdambuen naquidouidtsëqui chuiquinda Nuquin Papan Moises dada uamepampic? Padenquio. Naden icsambuen naquido chuiquimbien adopampic. Nëidic aton chuiquidën chiaid niac niacquido. Nëidic Nuquin Papan Chiaid niac niacquido. Nëidic Nuquin Papa tantiesabo. Nëidic Nuquin Papabëta abi tantiaquido mamënshunquido. Nëidic amëbi cuessunnequido. Nëidic anibi cuessunnequido. Nëidic utsibo cuessunnequido.

¹⁰ Nëidic aton chidopenquio chudquido. Nëidic aton bënëpenquio chudmequido. Nëidic dada daëdi chichudnanquido. Nëidic chido daëdi dachunnanquido. Nëidic iua icmenuen bedshumbi piucquid bedquin matses utsi menequido. Nëidic muaquidombo. Nëidic Nuquin Papan tantianubi abimbo chiec nebi, quequin chiec muaquido. Adquid matses icsambuen naquido chuiquin Nuquin Papan Chiaidquio Moisesën dada uapampic.

¹¹ Adombuembidi: Esus bëdamboshëcquid yec abided cuidadec uënësaid tantiasho Nuquin Papan bëdambuen isendac, quequin Nuquin Papa bëdamboshëcquid icquin Esus chuibanquid icmiondashi.

Nuquin Icbon Pabado bëdambuen isbenaid

¹² Tantia, mado. Mibi chuinu. Nuquin Icbo Esuquidistun: Ubi bëdambuen chuibantsiash, queshun: Ubi chuibennequid icta, Pabado, cashun ubi bëdambuen namec. Adoaid icquin: Ubi namequid yec mibi bëdamboshë iquec, Icbo, quequin Nuquin Icbo Esus chiannembi.

¹³ Ënden Nuquin Papan Madopenquio danquin tantiesa icquin Esus icsambuen chuishunondambi. Abi tantiaquido chieshënquin cuessun secate bunquiondabi. Aton Mado Esus tantiasho Nuquin Papan ubi bëdambuen istsiash, quenquio icquin adopondambi. Adshobini: Pabadon abimbo tantiabi iquec, queshun Nuquin Icbon umbi icsambuen naid bëshunquin cuidenquio icpondashi.

¹⁴ Aden icsambuen naquid icshobini cuidenquio icquin Nuquin Icbo Esusën ubi tantiaquidquio icquin tantiamiac: Abi tantiasho ubi bëdambuen istsiash, queshun Esusquio tantiabenondambi. Adshun matsestsen tantiaquiembi.

¹⁵ Tantia, mado. Naden chiaid abimbo iquec. Icsambuen nabuedombi abi tantiasho matses cuidmenquio icnuec Esuquidistu chopanëdash, quequin abitedishumbi tantiac bëdambo ictsiash. Utsibon Nuquin Papan Chiaid bëdiactsëc niac niacnubi umbimbo icsambuenshë naquin cumapenen niac niaccondambi.

¹⁶ Aden iuen icsambuen naquid icshobi Nuquin Papabëtan Cun Icbo Esusën baded cuidenquio icquin abibi tantiamequin bëdambuen isbempondashi. Pabado bëdambuen isaid chiac utsibo: Pabado icsambuen naquid icshobi Nuquin Papan bëdambuen isbenac. Adembidi Esus tantiasho Nuquin Papan ubitsen bëdambuen isendac, quequin ubi bëdambuen isaid tantiendac. Adquid uënësacsho ubi yacno tabadmendambi, queshun abi tantiamequin Esusën bëdambuen isbempondashi.

¹⁷ Aden tantiaquin: Nuquin Papauidtsëqui abitedi namequid yec abitedishun Icbombo nec. Uënëstiapimbo icquid nec. Isadesambo nec. Adquid abentsëcquiobi icnuc abipadquid utsi nibëdec. Adquid icsho abitedishunquio: Mibi bëdamboshë iquec, Papa, quequin ënenquio icquin chiac bëdambo ictsiash. Amen.

Matsesën mibi ënden chiondacpadombuen nata, quiaid

¹⁸ Tantia, Timoteo, cun madobimbuecquid icsho mibi chuinu. Umbi chiacpadombuen Nuquin Papan Chiaidquio chuibanta, mado. Ënden mibi Esus chuibanquid yanabi icnuc Nuquin Papan oncamiac ubipadquidobëtan Esus tantiaquidon mimbi Esus chuibante chuipanëdash. Aidon chiondacpadombuen chieshtoenquio icquin Nuquin Papan Chiaidquio chuibanta. Adec sondadobimbuecquid mibi ictsiac.

¹⁹ Adquid icquin Nuquin Papan Chiaid niaquenquio icquin Esus tantiaquiec bëdambuec tabadta. Utsiboen cano cuëshnudtannuc ampaëdacbimbuec: Adec icsambuec tabadtsiabi, quebuedëmbi Nuquin Papan Chiaid niac niacquin Esus tantienquio yanosh.

²⁰ Adejandobëtan Imeneyo caidën aden Esus tantienquio yanosh. Aid daëdshun Nuquin Papa mua uaquin icsambuen chuishunsho nadopombi. Adquid icsho Mayan Icsa Satanasën natiamiac: Nuquin Papa mua uaquin icsambuen nachitombi, quequin ma tantiabennu, queshun Esus tantiaquidobëd tabadmenquio icpombi.