Tesadonica 2 3 - El Nuevo Testamento en matsés

Nuquin Papa chianneta, quequin Pabadon chiaid

¹ Tantia, cun utsibo. Mibitedi ënquin chuinu. Ubitedi tantiaquin Nuquin Papa chianneta. Nidaid utsi utsiec yacno nidmeshun Pabadobëta abëd nidquido Esusën naid matses dadpenquio bëdambuen chuibanme. Mimbi bëdambuen chuimiac ubitedishun Esus tantiabenondacpadombuembidi ma utsibontsen dadpenshun Esus tantiabennu, quequin Nuquin Papa chianneta.

² Adembidi Esus chuibansho issun abi chieshënquidon: Pabado mëyannu, casho mëyanmenda, Papa, quequin ubitedi tantiaquin Nuquin Papa chianneta.

³ Nuquin Icbo bëdamboshë icquid nec. Muesambo icquin ambi chiacpadombuen naquid icquin nuquitedi bëdambuen dayun uaindac. Ubi tantienquio yannushe, queshun nuqui chieshtomenquio icquin Mayan Icsa Satanas nuqui iuametiapimbo iquendac.

⁴ Aden Nuquin Icbon bëdambo icmiac umbi chuibocpadombuen mibitedishun abi nabanendac, quequin tantiembi.

⁵ Naden mibitedi tantiaquin Nuquin Papa chiannembi: Cun Icbo Esuquidistun tantiamiac: Nuquin Papan ubi tantiec, quiash Tesadonica yacnocquido utsibobëd tantiananmeta, Papa. Chieshënaqui Esus chieshtoenquio icnëdacpadquiecbidi aido chieshtoenquio icquid icmeta, quequin Nuquin Papa chiannembi.

Chieshenquio yec chonoadta, quequin chiaid

⁶ Tantia, cun utsibo. Nuquin Icbo Esuquidistun: Ubi chuibenneta, caidquio icquin mibitedi chuinu. Esus tantiaquido utsi utsiec umbi mibi chiondaid niacniaquec chieshuidequi icsho isash aidbëd tabadenda.

⁷ Ubëd tabadec Pabado dayacquio iccondash, quequin tantiec chieshenquio yec tabadac bëdambo ictsiash, quequin mimbi abimbo tantiec. Mibëd tabadec chieshenquio yec chonoadtedniondabi.

⁸ Mimbi pete meniac ¿cun piucquid mibi menenquiodambi ictionda? Bedquin mambi mibi meniannepondac. Aden: Ubi menequin atona uesnushe, quiash cunabi piucquid bednuec badiadën chonoadtedniashic inchëshëntsen adecbidi chonoadtedniondabi.

⁹ Esus tantiaquidon abi chuibanquid menenquio icquid ¿quectabi ique? Padenquio. Esusën naid chuibanquid ambi chuibanaidon meniaquien bëdambo ictsiash. Chieshenquio icquin umbi nacnensho issun ma adembidi mibitedishuntsen: Nanu, quiashini chonoadtenniondac.

¹⁰ Mibëd tabadquin naden chiondambi. Chonoadte bunenquio yec chieshuidequi icsho pemenquio icquid, quequin mibitedi chiondambi.

¹¹ Mibitedi caic: Utsi utsiec chonoadenquio yec tabadquin utsin icsambuen naiduidi chiec tabadosh, quequin chuisho tantiombi.

¹² Chieshquido icsho Nuquin Icbo Esuquidistun chiaidquio mibi chuinu. Chieshuidequi tabadenda. Min petebëta mitsana utsi bednuec chonoadta.

¹³ Cun utsibo, Nuquin Papan chiacpadombuen naquin chieshtoenquio icquin bëdambuenuidi nata.

¹⁴ Nëid dada uaquin umbi chuibambued niac niacsho ista. Aden chiaid niacquin icsambuen nasho isash: Icsambuen nachitombi, quequin dacuëdtanquin ma tantiabennu, quiash aidbëd onquec tabadenda.

¹⁵ Aid chieshënenquio iquequi adta. Mibi padquid Esus tantiaquid min utsibimbuecquid icsho naden chui: Esus tantiaquid adec tabadesa neque. Bëdambuequien tabadtiad, quequin chuita.

III. ËNQUIN CHIAID ( 3.16-18 )

¹⁶ Mibitedi tantiaquin Nuquin Papa naden chiannembi: Bëdambo icmianquidquio icquin Cun Icbonquio ma aido bëdambuec tabadquid icmepanuna, Papa. Aidobëd ma Esus tëshnanenquio icpanuna, Papa, quequin tantiaquin Nuquin Papa chiannembi.

¹⁷ Mibi tantiembi, quequin umbimbo dada uaid nëid neque. Ista, quequin umbi nëidtedpactsëc dada uaid issun: Pabadon chiaidquio nec, quequin mimbi tantiendac.

¹⁸ Nuquin Icbo Esuquidistun ma mibitedi tantiaquin bëdambuen ispanuna, caimbi. Amen. Aidted chuiquin dada uaombi.