Tesadonica 2 2 - El Nuevo Testamento en matsés

II. ICSAMBOSHË ICQUIDBA CHOTE CHIAID ( 2.1—3.15 )

¹ Tantia, cun utsibo. Mibitedi chuinu. Abi yacno tabadmenuen buannuec Nuquin Papa yacnouësh Nuquin Icbo Esus ënden choac, quesho tantiash

² dacuëdtanenda. Mibi yacnoshon ¿tsuntsin aden muaquin chuipash? Aidon: Tantia. Nuquin Icbo Esus ënden choac, quequin Nuquin Papan Mayan Bëdan tantiamioshi, quequin chiec muec niashe. Adec muasho tantienda. Aidon: Aden Pabadon chiaid iquec, quequin umbi dada uaidbimbuecquid isquimbien muaquin chuichitash.

³ Aden muaquin chiaid tantiash: Abimbuen cachitec, quequin tantienda. ¿Nuquin Icbobada chopadic? Padenquio. Icsamboshëcquidoba choendac. Nuquin Papa caidën chiaid tantiatiapimbo iquebi, quec matses icsambuec tabadnubien Nuquin Papa chieshënquidquio icsamboshë icquidba choash matses abitedishun chuiquid tapa iquendac. Aid Nuquin Papan cuidtequidquio nendac.

⁴ Aid chuiquid tapa yanashic: Utsibon papa quequin tantiaid nibëdec, quendac. Nuquin Papa dëniacte bunquiec Nuquin Papa tabadte shubu dapan puduedshun: Nadatiambocquid yec ubi nashunquidquio nec, quequin mimbi Nuquin Papa caid nibëdeque. Ubiuidtsëqui papa cata, quequin chuiquid tapan tsadten tsadquin matses abitedimbo namendac.

⁵ Aden mibëd tabadquin umbi mibitedi chuidenniondaid ¿tantienquioda ique?

⁶ Nuquin Papan ambi tantiacpadënquio chomenuen uidënuac icsamboshë icquid nëbi choenquio iquec. Nuquin Papan tantiacpadënquio choendac. Umbi chiondaid abi chomenquio icquid mibitedishun tantiec.

⁷ Nëbi ambi tantiaidtedi tantiamenquio icquin Mayan Icsa Satanasën namiac matsesën Nuquin Papa chieshënquin Aidën Chiaid niac niacbededec. Padnuen icsamboshë icquid choabi iquec. Aid chomenquio icquin uidën uaquid chicabi icnuc icsamboshë icquid chuiquid tapa yantiapimbo iquendac.

⁸ Abi chomenquio icquid chicambien icsamboshë icquid matsesën chuiquid tapa iquendac. Adshobien Nuquin Icbo Esusën: Ubien nadatiamboquid yec abitedishun Icbombo nec, quec matses abitedishun isnuc bëchamauanquiec choshon icsamboshë icquid dabushcaquinuidtsëqui nibëdanmendac.

⁹ Adec Esus padpidec choabi icnuc icsamboshë icquid chuiquid tapa yanendac. Adquid yanshumbic Mayan Icsa Satanasën tantiamiacpadombuen naic: Cumapenen tantiaquidquio nebique. Istac, quequin ambembi muaquin chiaid tantiamenuen aden nadatiambo icquin nabanquin dadpen ismendac.

¹⁰ Adec icsauidequi tabadquid yec cumapenec muaquin ismedednesho isash: Abimbo caic, quependac Esus tantiesabo Nuquin Papan ënenquio icquin cuidtequido yec. Aidon Esus chuibanquidën: Nuquin Papa yacno tabadte iquec, quequin abimbo chuisho pamumëdacbimbuen tantiatiapimbo icquin ambembi muaquin chiaiduidtsëqui tantiendac.

¹¹ Aden Ambi Chiaid tantiate bunenquiocsho Nuquin Papan: Abi bunaidquio ambembi chiaidquio chuisho ma adembi tantiapanu, quequin tantiamiac: Muec nec, quequin tantienquio iquendac.

¹² Aden Ambi Chiaidquio tantiatiapimbo icquin aid niacniaquec icsambuen nateuidi bunsho Nuquin Papan cuidquiendac.

Nuquin Papa tantiec bëdambuec tabadte chiaid

¹³ Tantia, cun utsibo. Nuquin Icbon tantiaidombo icsho mibitedi naden chuinu: Ëndenquimboshë matses uabi yequi Nuquin Papa nuqui caic: Ubi yacno tabadmenuen Esus tantiameshun aido bëdambo icmendambi, quepampic. Adshumbic ambi chiampicpadombuen aton Mayanën tantiamiac Nuquin Papan Chiaidquio tantiash Esus tantiec mibi bëdambuec tabadcuenondac. Abi bëdambuec tabadosh, quesho tantiashun Nuquin Papa naden chiannembi: Aden aido bëdambuen namequid yec mibi bëdamboshë iquec, Papa, quequin chiannembi mibitedi tantiaquin.

¹⁴ Nuquin Papan Chiaid Bëda Esusën naid umbi chuibansho tantiashun mimbi Esus tantiabenondac. Abi yacnoshon Nuquin Icbo Esuquidistupadquid bëdamboshëcquid icmenuen Nuquin Papan mibi Esus tantiamiac.

¹⁵ Cun utsibo, umbi aden chuisho tantiashun chieshtoenquio icquin Esus tantiata. Umbi mibitedi bëisquin chiondaidbëta umbi dada uaquin abimbo chuibued bëshunenda.

¹⁶ Nuquin Icbo Esuquidistubëtan Nuquin Papan nuqui tantiaquin bëdambuen isec. Adembidi: Nuquin Papa yacno Esusbëd iquendabi, quequin tantiamequin nuquitedi bëdambo icmec.

¹⁷ Adquid icsho naden chiannembi: Aido chieshtomenquio icquin Esus tantiamequin bëdambuec tabadquid icme. Adembidi bëdambuec chuinanquid icmequin nashunnanquid icmeta, Papa, quequin Nuquin Papa chiannembi mibitedi tantiaquin.