Tesadonica 1 5 - El Nuevo Testamento en matsés

¹ Tantia, cun utsibo. Mibitedi chuinu. Nëidtedec ushash Esus padpidec choec, quequin chuitiapimbo iquebi. Adembidi: Nëidted seta matanmiash choec, quequin dada uatiapimbo iquebi. Tantienquio iquembi.

² Nëid inchëshëmbi ampequid choec, quequin tantiatiapimbo yacbimbuec: Aid uëshën Nuquin Icbo choec, quequin tantiatiapimbo icnuc Esus chouaindac, quequin umbi chiondaid mibitedishun tantiec.

³ Esus tantienquio yequi matses dadpen: Cuesnanenquio yec nuqui bëdambuec tabadec, queshobien: Nëbi ubi cuidec choec, ambi cacmaidënquio padpidec choshon cuidquiendac. ¿Mitsipadquio chido bacuë usunquid icpec? Aid uëshënquio tishembi, quequin tantiatiapimbo icnubi badedquio nëncuenec. Adacbimbuec ambi: Nëbi choec, cacmaidquio Esus badedquio chosho abi tantiesabon cuenëntiapimbo iquendac.

⁴ ¿Esus chonoda mibi dacuëdpe? ¿Esus tantiesaboda mibi nedi? Esus tantiaquidoen mibitedi nec. Adquido yec: Nëbien Esus chochitec, quec bëdambuec tabadnubi ampe choacbimbuec Esus chonoc mibitedi dacuëdenquio iquendac.

⁵ ¿Pamumëdacbimbuecquidoda mibitedi nedi? Padenquio. Paposhquiacbimbuecnuc Esusën bëdambuen tantiamiaido yec bëdambuec tabadquido ma nuqui neyoc. Adoaido yec bëdambuec tabadnuna.

⁶ Ushquin tantienquio yacbimbuen utsibon Nuquin Icbo Esus tantiatiapimbo iquec. Adec tabadenquio icnuna. Esus tantienquio yanmane, queshun nuqui icsate bunaid nainquio icnuna. Nuquin Icbo Esus chosho iste bunquin cainec bëdambuec tabadnuna.

⁷ Esus tantiesabuen inchëshën ushquin tantienquio yacbimbuec tabadquido nec. Adquiecbidi inchëshën tabadquin tantiadennuen acte paë uaid acquido nec.

⁸ Padnuen nuquitedi Esus tantiec bëdambuec tabadquido nec. Adquid icquin nuqui icsambuen nate bunaid nainquio icnuna. Sondado: Shocosh tsasimbo icquid shictonquenu. Sicsenushe, quiacbimbuec icnuna. Mayan Icsa Satanasën Esus tantiamenquio icnushe. Esus tantiaquioquin matsestsen tantiaquionona. Adecbidi sondado: Masenushe. Shocosh tsasimbo icquid mauete mauenu, quiacbimbuecbidi icnuna. Mayan Icsa Satanasën icsambuen tantiamequin chieshtomenushe. Esus tantiasho cuidenquio icquin Nuquin Papan abi yacno ubi tabadmendac, quequin tantiec bëdambuec tabadnuna.

⁹ ¿Cuidnuenda Nuquin Papan nuquitedi Esus tantiamediac? Padenquio. Abëdi tabadmenuembien Nuquin Icbo Esuquidistu nuqui tantiamiac.

¹⁰ Aidi nuquitedi cuidmenquio icnuec abided cuidadec uënëspanëdash. Aidëmbidi abi tantiaquidotedi beduanshun abëdi tabadmendac. Uënësaid uincuenmiaidobëta uënësabi icquidotedi adoendac.

¹¹ Umbi aden chuisho tantiashun mimbi nabocpadombuembidi Esus tantiec bëdambo icnuec utsibobëd umbi chuibued chuinanquiota. Adec bëdambuec tabadec: Adequi tabadnuna, cananta.

Bëdambuec tabadte chiaid

¹² Cun utsibo, Esus tantiamequin mibi chuibanquido bëdambuen ista. Aidi chieshtoenquio icquin mibi bëdambuec tabadte chuibanquid neque. Bëdambuen ista.

¹³ Aido Nuquin Papan Chiaid bëdambuen tantiamequidombo nec, quequin tantiaquioquin bëdambuen ista. Adec chieshëmënenquio yec utsibobëdtsen bëdambuec tabadta.

¹⁴ Cun utsibo, mibitedishun nabante chuinu. Chieshquid icsho: Mibitsen chonoadta, cata. Utsibo chieshtotiadquio icsho: Esus tantiec bëdambo icnuna, cata. Esus bëdiactsëc tantiactsëcsho bëdambuen chuiquin Esus tantiamequiota. Dada padishquio icquid icsho nashunta. Badedquio chieshtoenquiocquin abitedi bëdambuen ista.

¹⁵ Utsin icsambuen chuishunquin chieshënac cuidnante bunsho: Padi. Esus tantiaquid adesa neque. Bëdambuec tabadnuna, cata. Mibëtan Esus tantiaquidobëd bëdambuec isnanquin utsibotsen bëdambuen ista.

¹⁶ Aden Esus tantiec ënëdenquio yec cuishonqueta.

¹⁷ Adembidi ënenquio icquin Nuquin Papa chianneta.

¹⁸ Nadec tabadquin: Nuquin Papa bëdambo iquec, cata. Bëdambuec tabadquin nac bëdambo ictsiash. Daicsabudshumbi adembidi nac bëdambo ictsiash. Paëmbo icnubi adembidi. Mitsana icnuc adembidi. Mitsana nibëdnubi adembidi. Utsibon chieshënaqui adembidi: Mibi bëdamboshë iquec, Papa, cac bëdambo ictsiash. Aden Nuquin Papan: Ma Esus tantiaquidon adono, quequin tantiacpadembi mibitedishun chiannendac.

¹⁹ Nuquin Papan Mayan Bëdan: Bëdambuen tantiamenu, cac pamumëdacbimbuec tabadenda.

²⁰ Aden Nuquin Papan Mayan Bëdan tantiamequin oncamiaid icquin chuisho: Muequi nec, quequin mamënshunenda.

²¹ Adoenquio icquin: ¿Nuquin Papan Chiaidquiobida chuibaneque? Tantiabono, cata. Aden tantiashun Nuquin Papan Chiaidquio isbanta. Aden isbanshun abimbo chiaid icsho issun: Ai, Nuquin Papan Chiaidquiobi chiec niosh, quequin aidën chuisho bëdambuen tantiata.

²² Adembidi Nuquin Papan Chiaidpenquio chiec, queshun aidën chuisho tantienda. Aidën chiacpadombuen nainda.

²³ Mibitedi tantiaquin Nuquin Papa naden chiannembi. Bëdambuec tabadmianquid icquin mimbi chiacpadombuen naic bëdambuec tabadquid icme. Adembidi aton tantiate yec aton mayan yec aton dada yec quenuc bëdambo icmequin bëdambuen dayun ua, Papa. Adoacsho Cun Icbo Esuquidistu choshon aido bëdambouidquio icsho istuidendac, quequin chiannembi.

²⁴ Nuquin Papambi: Cuna nec, queshun nuqui Esus tantiamequid yec muesambo icquin ambi chuinëdacpadombuen naindac.

IV. ËNQUIN CHIAID ( 5.25-28 )

²⁵ Cun utsibo, ubitedi tantiaquin Nuquin Papa chianneta.

²⁶ Ambocquido Esus tantiaquidotedi chuiquin: Pabado chedon nuqui tantiaquiec, quequin chuibanta.

²⁷ Nuquin Icbon tantiamiacpaden chuiquin dada uaombique. Umbi dada uabued isec onquequin ambocquido Esus tantiaquidotedi chuibanta.

²⁸ Nuquin Icbo Esuquidistun ma mibitedi bëdambuen ispanu, quequin tantiembi. Amen. Aidted chuiquin dada uaombi.