Tesadonica 1 4 - El Nuevo Testamento en matsés

III. BËDAMBUEN NABANTA, CAID ( 4.1—5.24 ) Nuquin Papa bunacpadec tabadte chiaid

¹ Tantia, cun utsibo. Bëdambo mibi iquec, Nuquin Papa camenuec bëdambuec tabadta, quequin umbi chiondacpadquiequi tabadta. Nuquin Icbo Esus tantiaquiec adec tabadta. Bëdambuec tabadosh, quesho tantiashun: Adquiequi tabadta, mibitedi caimbi.

² Nuquin Icbo Esusën tantiamiac aid tantiata, quequin mimbi nabante mibitedi chuibanondambique. Aid tantiaquiec bëdambuec tabadta.

³ Nuquin Papa bunacpadquiec bëdambuec tabadquido nadquiec tabadquid nendac. Chido utsi chudenquio icquin aton chidouidtsëqui chudquid nendac. Adembidi chidon dada utsi chudmenquio icquin aton bënëuidtsëqui chudmequid nendac.

⁴ Aden Nuquin Papan Chiaid niaquenquio yec abi bunaid mëmunec dada ambi inaidquio aton chidobëduidtsëqui iquec bëdambuec tabadsho matsesën: Bëdambuec tabadquido nec, canubi Nuquin Papantsen: Bëdambo iquec, caindac.

⁵ Nuquin Papa tantiesabimbuec tabadenda. Esus tantiesambien abi bunacpaden nabanec tabadquin dadan chido utsi bunquin aton chidopenquio chudendac. Adembidi chidon dada utsi bunquin aton bënëpenquio chudmendac. Aden nabanec tabadenda.

⁶ Bëdambuec tabadquid danmianec muaquin mibëtan Esus tantiec iccuededquid chido ompodshon chudenda. Adquid icsho umbi chuibocpaden Nuquin Papan cuidquiendac.

⁷ Ma icsambuen naic tabadnu ¿queshunda Nuquin Papan Esus tantiaquido nuquitedi icmediac? Padenquio. Ma bëdambuen nabanec tabadnu, queshumbien Esus tantiaquido nuqui icmiaque. Bëdambuec tabadnuna.

⁸ Aden chuisho tantiashun umbi chuibambued niacquin matsesën chiaidpenquio mibitedishun niaquendac. Aton Mayan nuqui menequidën Nuquin Papan Chiaidquio mimbi niaquendac.

Tantiananquiota, quequin chiaid

⁹ Bëdambuec tantiananta, quequin chuiquin padpiden dada uainquio iquembi. Nuquin Papambi tantiamiac Esus tantiaquido yec utsibobëd mibitedi tantiananendac.

¹⁰ Cun utsibo, min nidaid cuëshë Masedonia caidën tabadquin Esus tantiaquido utsibotedi mimbi tantiec. Adec mibi yacpadquiequi tantiananquiec tabadtenneta.

¹¹ Umbi chiondacpadquiec chieshëmënenquio yec bëdambuec tabadta. Utsin icsambuen naiduidi chienquio yec bëdambuec tabadta. Chieshenquio yec dayacquio yec chonoadec tabadta.

¹² Adec tabadec: Cuna nibëdeque. Mitsana bec cho, quenquio mibi ictsiac. Mibitedi adquid icsho isash Esus tantiesabo: Esus tantiaquido bëdambuec tabadec, quetsiash.

Esus chouate chiaid

¹³ Tantia, cun utsibo. Mibëd icquido Esus tantiaquido uënësacsho isash: Padpiden isenquio iquembi, quequin Esus tantiesabon tantiacpaden tantiec uënësquio icnuc baded ënëdenquio yec shubinushe, queshun mibi abimbo chuinu.

¹⁴ Uënës uaqui Esus uincuempanëdash, quequin nuquitedi tantiec. Adembidi: Esus tantiaquido yec uënësaido Nuquin Papan uincuenmendac, quequintsen nuquitedi tantiauaic.

¹⁵ Tantia. Nuquin Icbo Esusën chiaidquio mibitedi chuinu. Nuquin Icbo Esus nidaidën padpidec chonoc aid bëquedec Esus tantiaquido uënësabi icquido abia abuc nidenquio iquendac.

¹⁶ Padenquio icnubien Nuquin Papan namiac Nuquin Papabëd icquidon chuiquid abi yacnouësh choec nuambo cuëdtuidsho tantiendac. Adnubien Nuquin Papan chiacpadombuen abëd icquid utsin nua shoncaindac. Aden shoncanubi Esus abucuësh budnubi Esus tantiec uënësaidotedi abia uincuenendac.

¹⁷ Adashic Esus tantiaquido uënësabi icquidobëd uincuenmiaido tsidadash aidotedi abuctoendac Nuquin Papabëd tabadec nidec. Abitedi abuctoquimbi abi bëquedec Esus chosho istuidendac. Adash Esusbëd Nuquin Papa yacno nidash anobi nuqui quenenendac.

¹⁸ Umbi aden chuibued tantiashun abëtan Esus tantiaquid uënësaid tantiec uënësquio yec shubiquido bëdambo icmenuen umbi chuibambued chuita.