Tesadonica 1 3 - El Nuevo Testamento en matsés

Istan, quequin Timoteo chiaid

^1-2 Aden mibitedi tantiec: ¿Mitsipadequien tabadpec? quequinuidtsëqui tantiec tsadtiapimbo ubitedi iqueque. Istan, caondambi Timoteo chuiquin. Adshumbic shubu dadpen icquid Atenas caid yacno tabadquin ubëtan chuibanquid utsi chuiquin: Timoteo nidan nuquiuidtsëqui icnuna, caondambi. Umbi nidmiaid Timoteo Esus tantiaquid yec nuquin utsi nec. Aidi ubëtan Esus chuibennequidquio nec. Adquid icsho nadopondambi. Tesadonica yacno nidshun Esus bëdambuen chuibanta. Adembidi: Esus tantiec chieshtoenquio yec bëdambuec tabadquid nendac, quequin umbi: Chuibanec nid, caid Timoteo nec.

³ Ma ubi tantiaquido chieshënquin natiamenu, quequin Nuquin Papan tantiacpadombuen natiamiac chieshtoshon Esus tantienquio yannushe. Chuitan, caondambi. Aden Nuquin Papan tantiacpaden Esus tantiaquid icsho mibitedi natiametequid iquendac, quequin umbi chuibansho mimbi tantiondac.

⁴ Aden mibëd tabadquin chuidenniondambi. Adsho umbi chiondacpadombuen nuquitedi chieshënquin natiamiondash.

⁵ Umbi istanenquio yac utsin chieshënac ¿adecbidida Tesadonica yacnocquido chieshtoenquio icpatsiashba? quequinuidtsëqui tantiec tsadtiapimbo iquebique. Istan, caondambi Timoteo chuiquin. Ubitedi adometsiash, quequin tantienquio icshobi: Icsamequin tannu, quequid Mayan Icsa Satanasën namiac chieshtoshon Esus tantienquio yanacsho isash abembi chonoadquin chuibanondambi, quequin tantiamane, queshun: ¿Ada umbi chuibanac Esus tantiabenondaido bëdambuec tabadeque? Istan, caondambi Timoteo chuiquin.

Timoteon istanshun chuituidaid

⁶ Adoac mibi tabadacno istanec choshon nëbi Timoteon mimbi nabanaid naden chuituidoshi: Esus tantiaquido yec utsibobëd tantiananquiec tabadosh, quequin chuiposhi Timoteon. Adashic: Pabado chedo bëdambo iccondash. Aido padpiden iste bunebi, quiosh Tesadonica yacnocquido, queposh Timoteo. Adecbidi mibitedi istante bunquiebi.

⁷ Cun utsibo, aden Timoteon chuibambued tantiash bëdambo yanobi. Nëmbo icquidon chieshënquin natamiac shubitiadquio iccobi. Adbuedi mibitedi caic: Chieshtoenquio icquin abi Esus tantiosh, quesho tantiash bëdambo yanobi.

⁸ Mimbi aden nabanaid tantiash uidënquio yec dayacquio yanobi.

⁹ Aden tantiash dayacquio yanshun cuishonquequin Nuquin Papa naden chiannembi: Tesadonica yacnocquido bëdambo iccosh, quesho tantiash cuishonquebi. Mimbiuidtsëqui namiac chieshtoenquio iquec. Aden namec mibi bëdamboshë iquec.

¹⁰ Aido istantiadquio iquebi. Mimbi chiaid bëdiactsëc tantiasho aidobëd tabadquin mibi tantiaquidquio icmenuen bëdambuen chuibantsiambique. Ubi ambo nidmeta, Papa, quequin Nuquin Papa ënenquiocquin badiadquidën badiadquidënquien chiannembi. Adembidi inchëshquidën inchëshquidënquien chiannembi.

Pabadon Nuquin Papa chianniaid

¹¹ Nuquin Icbo Esusbëta Nuquin Papa chuiquin: Istantiadquio iquebique. Ubitedi nashunquin ambo ubi nidme, Papa, quequin chiannembi.

¹² Adec mibëd tabadtiadquio icquin Nuquin Papa mibitedi tantiaquin naden chiannembi: Esus tantiaquidombo icmequin aton matsesbëd tantiananmequiota. Umbi aido tantiaquiacpadombuembidi abëtan Esus tantiaquid utsibobëd tantiananmequiota, Papa.

¹³ Adembidi mibi bëdambuen tantiamequioquin chieshtoenquio icmeta. Adsho mibi tantiaquido mimbi bëdamboshëcquid icmequin icsaisa icmiaidobëd nidaidën padpidec choshon cun Icbo Esusën: Tesadonica yacnocquido icsambo iqueque. Cuidnu, catiapimbo ictsiash, Papa, quequin mibitedi tantiaquin Nuquin Papa chiannembi.