Tesadonica 1 2 - El Nuevo Testamento en matsés

II. TESADONICA YACNOSHON PABADON CHUIBANAID ( 2.1—3.13 ) Pabadon ambi chuibannëdaid tantiauaid

¹ Cun utsibo, mibitedi yacno tauambuec abembi mibi isec nidambo iccondambi. Adenquio icquin umbi Esus chuibansho mimbi tantiabenondac.

² Nadembidi mimbi tantiec. Shubu dadpen icquid Pidipos yacnoshon ubi icsambuen chuishunquin mëyanaqui mibi yacno nidshun Chiaid Bëda Esusën naid mibitedi dacuëdenquiocquin chuibanondambi. Utsibo dadpenshun chieshënnubi Nuquin Papan namiacpadombuen dacuëdenquio icquin mibitedi Esus chuibanondambi.

³ Adembidi abimbo chuiquin Esusën naid chuibanondambi. Bëdambuen namenuen bëdambuen chuibanondambi. ¿Min piucquid bednuen mua uaquindambi mibitedi chuibandionda? Padenquio.

⁴ Mambi mibitedi abimbo chuibampondac. Matsesën tantiaidtedi tantiaquidquio icquin Nuquin Papan: Nëidën abimbo chuibantsiashe. Cun Mado Esusën naid Chiaid Bëda chuibennequid icmenu, caidquio nebi. Adoaid yec matses: Mibi bëdambo iquec, cameteuidi bunenquio iquebi. Nuquin Papa umbi tantiaidtedi tantiaquid icsho: Mibi bëdambo iquec, camenuembimbi ambi chiacpadombuen naic.

⁵ Umbi tantiacpadombuen mibitedi namenuen: Mibi bëdambo iquec, quequin chienquio iccondambi. Mibi piucquid bedshunnuen muaquin chiambo iccondambi. Nuquin Papan isquin tantianubi abimbo chuibanondambi.

⁶ Pabado bëdambuen chuiquidquio nec, ¿matses camenuendambi chuibanonda? Mibitedi adometiapimbo icquimbi utsibotsen adometiapimbo iccondabi.

⁷ Ubi chuibenneta, Esuquidistun caidquio nebi. Adoaid icquin chuiquid tapan chiacbimbuen: Ubi nashunta, quequin ¿ancabudquindambi mibitedi chuibandionda? Mambi padenquio iccondac. Anin aton bacuë nëishmenquio icquin bëdambuen namiacbimbuembimbi nëishmenquio icquin mibitedi chuibanondac.

⁸ Mibitedi tantiaquioquin Nuquin Papan Chiaid Bëda chuibanec iuec mibëd tabadondabi. Aden umbi chuibanaido icsho utsibon mibi chieshënquin: Cuessunnenu: casho tantiash: Ubiquien na, quetsenondabi.

⁹ Cun utsibo. Aden Esusën naid chuibanquimbi nëish iua bitsi tuscaquimbi shubumpi nacnendedniondambi. Badiadën naquimbi inchëshëntsen adembidi nadedniondambi. Mibitedi caic: Ubi menianniac aton piucquid naimëdnushe, quiash cun piucquid bednuec chonoadtedniondabi. Mimbi isnubi adondabi.

¹⁰ Esus tantiaquido icquin mibitedishun isnubi Nuquin Papan Chiaid niaquenquio yec bëdambuec tabadondabi. Utsibo: Pabado chedo icsambuec tabadquido nec, quetiapimbo icnuc bëdambuec tabadondabi. Adshobini mimbi ispondac. Adembidi Nuquin Papantsen ispanëdashi.

¹¹ Amën aton mado: Naden na, quequin nëishmenquio icquin bëdambuen chiacbimbuen mibitedi abentse abentsen bëdambo icmenuen bëdambuen chuibanondambi. Adembidi mibitedi shubisho isash uënësquiocquimbi mibi bëdambo icmiondambi.

¹² Nuquin Papan: Bëdambuec tabadquid icmeshun umbi namiacno bëdamboshëcquid yacnombo tabadtequid icmembi, quequin Esus tantiamiaido mibitedi nec. Adquido yec Nuquin Papa bunacpadec bëdambuec tabadquid neque. Ambi Chiaid niaquenquio yec bëdambuec tabadnuna, quequin mibitedi chuidenniondambi.

¹³ Aden Nuquin Papan Chiaidquio umbi chuibanac: Ambembi chiaidpenquio chuibanosh. Ma Nuquin Papan Chiaidquio Pabadon chuibamboc, mibitedi quianondac. Ai, aden Nuquin Papan Chiaidquio tantiash Esus tantiaquido yanash aidquiobidi chuisho tantiash mibi bëdambo yanec. Adec mibitedi bëdambuec tabadaid tantiaquin Nuquin Papa naden chiannembi: Tesadonica yacnocquido bëdambuec tabadmequid yec mibi bëdamboshë iquec, Papa, quequin Nuquin Papa chiannembi.

¹⁴ Cun utsibo, nidaid Udea caid yacnocquido yacpadquiec chieshtoenquio icquin mimbi Esus tantiec. Udea yacnoshon Esus tantiaquido icsho aton matses isadaidbon cuestiadquio icquin chieshënac chieshtoenquio iccondash. Adombuembidi min matsesën chieshënac mibitedi chieshtoenquio iccondac.

¹⁵ Isadaidbombidi Nuquin Papan oncamiaido cuessun secapampic. Adembidi Nuquin Icbo Esus uënës uamepondash. Adombuembidi chieshënquin aton nidaidënshun cuenmepondashi. Adembidi chieshënquin mibi yacnoshontsen ubitedi cuenmeuapondash. Adsho Nuquin Papan bëdambuen istiapimbo yaido icquin matses chieshënquido nec.

¹⁶ Adquid icquin isadaidbon: Matses utsi isadaidpembo chuibannu, quesho ubi chuimenquio icpondash. Esus tantiasho Nuquin Papan bëdambuen isquin mibi cuidenquio iquendac, quequin umbi chuisho: Padi. Aid chienda. Cueschitomane, capondashi. Aden ambi icsambuen naid ënenquio icquin Ambi Chiaid niacniacsho Nuquin Papan aido cumapenen cuidquiendac.

Pabado padpiden istante bunaid

¹⁷ Tantia, cun utsibo. ¿Mibi yacnoshon chieshënquin cuenmiac mibi tantienquiodambi ictionda? Mibi tantiec uënësquiocquin mibitedi padpiden istantiadquio iccondabi.

¹⁸ Adec: Padpiden istannu, quesho Mayan Icsa Satanasën nac padenquio iccondabi. Padpidec: Nidnu, quesho adembidi. Padpidec: Nidnu, quesho Mayan Icsa Satanasën nacbidi padenquio iccondabi. Nëbi adecbidi mibi istantiadquio iquebi.

¹⁹ Nuquin Icbo Esuquidistu choan aidbëd tabadquin ¿tsutsimbi ispatsia? ¿Tsutsi isashini cuishonquepatsia? ¿Tsutsi issumbimbi: Is. Umbi chuibanac Esus tantiabenondaido neque, capatsia? Mibi issumbimbi adoendac.

²⁰ Esus tantiec bëdambuec tabadosh, quesho tantiash mibitedi tantiec cuishonquebi. Adembidi mimbi naid issun Nuquin Icbon: Mimbi chuibanac ubi tantiabenondash, ubitedi caindac.