Tesadonica 1 1 - El Nuevo Testamento en matsés

I. BEDANQUIN CHIAID ( 1.1-10 ) Mibi tantiembi, quequin chiaid

¹ Pabado nebi. Ubëdi Sidbanobëd Timoteo nëmbobi iquec. Aidobëtan mibi tantiaquin: Mibi tantiec tsadebi, quequin dada uaimbi. Shubu dadpen icquid Tesadonica yacnocquido Nuquin Papabëta Nuquin Icbo Esus tantiaquido icsho mibi chuiquin dada uaic nebi. Nuquin Papan Esuquidistubëtan bëdambuen isquin ma mibitedi bëdambuec tabadmepanuna, caimbi.

Nuquin Papa bëdambo iquec, quequin chianniaid

² Naden mibitedi tantiaquin ënenquio icquin Nuquin Papa chiannembi. Tesadonica yacnocquido bëdambuen namequid yec mibi bëdamboshë iquec, Papa.

³ Aidon Esus tantiaquin mimbi chiacpadombuen matses tantiaquin nashumbanondash, Papa, quequin Nuquin Papa chiannembi. Abi yacno abi tantiaquido buannuec Nuquin Icbo Esuquidistu padpidec choec, quesho utsibon chieshënaqui chieshtoenquio icquin Esusën naid abi chuibanondash, quequin ubëd icquidobëtan ënenquio icquin mibitedi tantiembi.

⁴ Cun utsibo, mibitedi tantiaquin ambi tantiacpadombuen Nuquin Papan: Cuna nec, quequin mibitedi Esus tantiamepondash, quequin tantiembi.

⁵ Chiaid Bëda Esusën naidquio mibitedi chuibanondambi. Chuiquinuidtsëqui chuibanenquio icquin Nuquin Papan Mayan Bëdan nadatiambocquin namiac umbi nabansho issun: Abimbo caic, queshun mimbi Esus tantiabenondac. Aden Esus tantiamenuec mibitedibëd ubitedi bëdambuec tabadsho issun: Aido abimbo chuibanquido nec, queshun umbi chuisho mimbi tantiondac.

⁶ Aden tantiaquid yec ubi Nuquin Icbo yacpadec chieshtoenquio icsho isash mibitsen chieshtoenquio iccondac. Umbi Nuquin Papan Chiaid chuibanac Nuquin Papan Mayan Bëdan namiacpadec cuishonquequin mimbi Esus tantiabenondac utsibon chieshënquin natiamequionobi.

⁷ Adec mibi bëdambuec tabadaid chuisho tantiash min nidaid cuëshë Masedonia caidën tabadquido Esus tantiaquido mibi yacpadquiec tabadtiadquio icpac caosh. Adembidi tantiash nidaid cuëshë Acaya caid yacno tabadquido Esus tantiaquidobidi yec bëdambuec tabadtiadquio icuapac caosh.

⁸ Adash mibëd icquido Esus tantiaquido mibi yacnouësh nidshun Esus chuibennepanëdash. Aden nidaid Masedonia yacno nidshun chuibanshumbic nidaid cuëshë Acaya yacnotsen nidshun chuiuashumbic nidaid utsi utsiec yacno nidshun Esus chuibennepanëdash. Aden chuibenniacnoshon tantiombi. Tesadonica yacnocquido Nuquin Papa tantiaquidombo nec, quequin chuisho tantiashun mibitedishun naid umbitsen chienquio iccondambi.

⁹ Ambocquidombien ambo nidacsho ubitedi mimbi naid chioshi naden: Ambi papa canun ambi nacnenaidtedi aidon tantienquio yanac caosh. Adshumbic: Matses uaquid Nuquin Papambo uënëstiapimbocquid neque. Aidën chiacpadombuen nanuen aid tantiembi, quequin mimbi naidtedi tantiashun aidon chioshi.

¹⁰ Adshumbic: Nuquin Papa yacnouësh aton mado Esus nidaidën padpidec chosho istiadquio iquebi. Ubi cuidmenquio icnuec abided cuidadec uënësacsho Nuquin Papan uincuenmiaid Esus choec, queshun aidquio tantiabenac caosh, quequin mibitedishun naid chioshi.