Santiaco 4 - El Nuevo Testamento en matsés

Esus tantiesabobimbuec tabadenda, quiaid

¹ ¿Atotsi quiash Esus tantiaquido yequi mibitedi chieshëmënec chushcanante buncuededpe? Mibibi icsate bunacpadequi aiduidquio ënenquio icquin tantiabudequi chushcanante bunec chushcanancuededec. Adecbidi cuesnante yanendac.

² Aid bedte bunebi, quebuedëmbi bedadtiapimbo icsho issun chieshënquin mimbi cuessunnepec. Adecbidi: Utsi dëniacnu, quiash chushcananec cuesnampec. Mimbi bedte bunaid tantiaquin Nuquin Papa chuitiadquidi chienquio icquin mimbi bedtiapimbo iquec.

³ Icsambuen Abi chiannesho Nuquin Papan mibitedi menetiapimbo iquec: Nashunac abi bunaiduidi naic icsatsiash, queshun.

⁴ Chidon aton bënëpen chudmequidbimbuen Nuquin Papa tantiesabo yec icsambuec tabadquido mibitedi nepayoc. Adec tabadquin abi tantiesabon nacpadombuen nadennequid yec Nuquin Papa chieshënquid nec, ¿quequinda mibitedishun tantienquio icpe?

⁵ Adquid chuiquin naden dada uamiampid iquec. Nuquin Papan nuquitedi tantiaquin aton Mayan meniash nuqui cudasendac, quequin chuipampic.

⁶ Aidëmbi nuquitedi tantiaquioquin nashunec. Adquid icnuc Nuquin Papan dada uamiampid nad iquec: Utsibo tantienquio icquin aton nauidtsëqui nasho: Icsambo iquec, caindac Nuquin Papan. Utsimbien atonauidtsëqui tantienquio icquin utsibotsen tantiaquin nashunsho Nuquin Papan bëdambuen isquin nashunendac, quequin chuiquin dada uamepampic.

⁷ Aden chiampid icnuc Nuquin Papan chiacpadombuen nata. Mayan Icsa Satanasën tantiamiacpadombuen nainda. Mimbi aden nainquiocsho isash aidi cuenendac.

⁸ Nuquin Papan dayunquio tsadacbimbuecquid icta. Adsho isash Nuquin Papa mibëd iquendac. Min mëdanten icquid bëchish ucacbimbuen icsambuen naid ënta. Nuquin Papa tantiaquid nebi, queshumbi Nuquin Papa tantiesan nacpadombuen nainquio icquin Nuquin Papan chiacpadombuen nabanquid icta.

⁹ Icsambuen naombi, quiash uënësquio yec shubita. Cuishonquec mamëmbuedi uënësquio yec shubita.

¹⁰ Icsambocquid nebi, Icbo. Mimbi chiacpadec tabadte bunebi, quiash bëdambuec tabadquid icsho utsibo ismequin: Nëid bëdambocquid nec, caindac.

¹¹ Cun utsibo, mibëtan Esus tantiaquid utsibobëd icsambuec chuishunnanenda. Aden icsambuen chuishunquin mimbi: Nuquin Papan: Naden nata, quequin Chiampid icsambocquid nec, cacbimbuen naindac. Adec utsibobëd icsambuec chuishunnanenquio icquin Nuquin Papan chiacpadombuen naquid icta.

¹² Nuquin Papanuidtsëqui: Naden nata, quequin dada uamepampic. Adquid icquin matsesën naidtedi tantiaquin cuidquidquio nendac: Nëid icsambocquid neque. Cuidnu, quequin cuidendac. Nëid bëdambocquid neque. Ubëdi tabadmenu, quequin chuiquin cuidenquio iquendac. Adquid icnuc mibëtan Esus tantiaquido icsambuen chuishunenda.

Ubiuidtsëqui tantiaquidquio nebi, quiacbimbuec onquenda

¹³ Tantia. Matses onquiaid mibitedi chuinu: Nëid uëshën nidenquio yash badiadash shubu dadpen icquid yacno nidendabi. Ambo nidash seta abentsëc matanmec piucquid dadpen bednuec chonoadendabi, quequid icpec.

¹⁴ Ma adquid badiadash ictequid tantiesa neyoc. Badiadbudnuc pushudquid cuencuempambo icbuedi badedquio nidacbimbuec mibitedi nibëdanendac.

¹⁵ Adquid icnuc naden tantiec onquiac bëdambo iquec. Nuquin Papan tantiacpadec uënësabi icquin naden naimbi, quequin chuita.

¹⁶ Aden chienquio yec mibitedi: Aid badiadën umbentsëqui aden naimbi, quec onquec: Ubiuidtsëqui bëdambocquid nebi, quiacbimbuec onquiaid icsambocquid nendac.

¹⁷ Bëdambuen nabanquin tantiembi, queshun adombuen nabanenquio icquid icsambuen naquid iquendac.