Santiaco 3 - El Nuevo Testamento en matsés

Ana chiaid

¹ Cun utsibo, Nuquin Papan Chiaid tantiamequid icte dadpen bunenquien ictiad. Nuquin Papan Chiaid tantiamenu, queshumbi aidën chiaidpenquio icnuc chuibanquin tantiamequid icsho issun cumapenquien cuidendac, quequin nuquitedi tantiec.

² Nuquitedi icsa uatanquido nendac. ¿Tsutsi bëdambuecuidi onquequid icpatsiash? Utsi icsambuen chuishunesa icsambuen naisa ictsiash. Adquid abibi datantiadquin icsambuen chiec onquenquiocquid iquendac.

³ Cabachu annëshquin dëchëdëdcaidën uidënuash catsadquin nidmequin dëbidiacbanec.

⁴ Adembidi dëbidiacbante aniactsëcquidën cano dapa dëbidiacuaic. Cunquequidën cumapenen bëcunnetiadquiocnobi adembidi icbon ambi tantiacno nidmec.

⁵ Cabachubëd cano dapa nua icnuc abi dëbidiacbante aniactsëc iquec. Adecbidi nuquin ana aniactsëcquid nec. Adquidëmbi icbon bëdambuen chuibanmequimbic icsambuen chuibanmequin oncamec. Cute isquidquiocquid aniactsëcquidëmbi nëdënquedotanec cute abitedi pichiquec.

⁶ Cute nëdënquequidbimbuecquid ana nec. Icsambuen chuibanec onquequin nabanec aton dada icsabudquin utsibo icsamequiendac. Adquid Satanasën namiaid iquec adequi icsate bunec abibi cuidadtequido nendac. Icsambuec chuishumënquid icsambuec tabadquid nendac.

⁷ Nëish yec podon shucquec capuquid yec tacbidën capuquid yec acten icquid yec quenuc matsesën iuaid quenenash cuenenquiocquid nec.

⁸ Adquidpenquio ana nec. Quenenenquio yec ana onquebudec. Onquiaid icsa adecbidi ënëdtiapimbo iquec. Abi icsambuec onquiaid dauë icsa uënës uantebimbuecquid icnuc icsabudquiec tabadendac.

⁹ Nuquin anan onquequin: Nuquin Icbo Nuquin Papa bëdambo iquec, quequin chuishumbic Nuquin Papan abibimbuecnuc uaid matses icshobi icsambuen nuqui chuishunec.

¹⁰ Adembidi nuquin ananshun utsi bëdambuen chuishumbic utsi icsambuen chuishunuaic. Cun utsibo, nuquitedi aden chiec onquenquien ictiad.

¹¹ Adecbidi ¿acte pududquequidënuështa batambocquidbëd mucambocquid chopadic?

¹² Tantia, cun utsibo, adecbidi cute icuedan bacuë uba ictiapimbo iquec. Adecbidi uban bacuë ico ictiapimbo iquec. Adecbidi acte pududquequidënuësh batambocquidbëd mucambocquid chotiapimbo iquec.

Nuquin Papan bëdambuen tantiamiaidquio chiaid

¹³ Mibitedi utsi utsiec: Bëdambuen tantiaquidquio nebi, quequid icquin: Ubiuidtsëqui bëdambuen tantiaquidquio nebi, quenquio icquin ma bëdambuen naic tabadquin utsibo ismepanuna.

¹⁴ Padnuen nadquid bëdambuen tantiaquidpenquio nendac. Nëidic: Ubi bunacpaden: Umbi nanu, cabuedi aidën naic, quiash chieshëmënquid. Nëidic chushcanante bunquid. Nëidic: Ma utsibon ubi bëdambuen isquin aton chuiquid icmenu, quequin tantiaquid. Adec tabadquid yec abimbo chiaidquio tantiesabo nendac.

¹⁵ Aden icsambuen tantiaquid Nuquin Papan tantiamiacmaid nec. Esus tantiesabon tantiacbimbuen tantiaquid nec. Adecbidi Mayan Icsa Satanasën tantiamiaid nendac.

¹⁶ Adec nëishnanash tabadec: Umbiuidtsëqui namenu, quec tabadquid icnuc utsi utsiec: Ubi bunacpadombuenuidi ma nabannu, quec tabadquid iec chieshënnanec icsambuecshë tabadanendac.

¹⁷ Padnuen Ambi tantiacpadombuen Nuquin Papan bëdambuen tantiamiaid yec nadquio iquec. Icsambuen nate bunesa nec. Adecbidi utsibobëd bëdambuec tabadquid nec. Adecbidi utsi nashumënquid nec. Adecbidi chushcanesa nec. Adecbidi utsi natiambo icsho uënësquiocquid nec. Adecbidi chuiquidën: Nanuna, cac badedquio: Ai, adonona, quequid nec. Adecbidi cuidmenquiocte bunquid nec. Adecbidi bëdambuen nabanquid nec. Adecbidi: Nëid bëdambuen isquimbi utsi chieshënembi, quesa nec. Adecbidi: Esus tantiaquid nebi, quec muesa nec.

¹⁸ Aden naic bëdambuec tabadquin ismiac adecbidi utsibobëd aidën chiacpadombuen naic bëdambuec tabadquid dadpen yanendac.