Santiaco 1 - El Nuevo Testamento en matsés

Mibi tantiembi, quequin chiaid

¹ Santiaco nebi. Nuquin Papan namiaidquio yec Nuquin Icbo Esuquidistun namiaidquiobidi nebi. Adquid icquin nuquin tsusedpa Acobon mado docetedshun tsiuecquido yec uanno uannuec nidanniash tabadquin Esus tantiaquido icsho mibitedi tantiembi, quequin chiec nebique. Isec onqueta.

Natiamiac chieshtoenquiocte chiaid

² Tantia, cun utsibo. Mibitedi chuinu. Natiamiantequid utsi utsiec icnubi chieshtoenquio yec cuishonquec tabadta.

³ Mibitedi abi tantiaquido icsho Nuquin Papan: ¿Ubi tantiaquidquiobida neque? Isnu, quequin tanquin natiamiaqui mëmunec chieshtoenquiocquid yanebi, quequin mimbi tantiendac.

⁴ Aden natiamiaqui chieshtoenquio yec tabadsho bëdambuec tabadte bëdambuen tantiamequin ambi chiacpadombuen nabanquidquio mibitedi icmendac.

⁵ Bëdambuen tantienquio iquembique. Ubi dadpen bëdambuen tantiaquid icmeta, quequin Nuquin Papa chuita. Aden abi chuisho: Ma bëdambuen tantianu, queshun chushcainquio icquin mibi dadpenquio bëdambuen tantiamendac.

⁶ Umbi aden chuinun naden tantiaquin: Ubi Nuquin Papan tantiaquin umbi chuisho tantiashun ubi nashunendac, quequin tantiaquioquin chuita. Ubi tantienquio ictsiash, quequin tantienda. Aden tantienquiocquid yec cunquequidën acte ishcunquin tëccuascacbimbuec icquid mibi nendac.

⁷ Adquid matses icsho Nuquin Icbon aidën chiacpadombuen nashunenquio iquendac.

⁸ Adquid: Nëbi Nuquin Papan ubi nashuntsiash, quebuedi badedquio: Ubi nashunenquio ictsiash, quequin utsi utsien tantiec bëdambuec tabadtiapimbocquid nec.

Atona nibëdquidbëta atona dadpenquiocquid chiaid

⁹ Esus tantiaquid atona nibëdquid icsho Nuquin Papan: Mibi bëdambo iquec, caindac. Adoac: Nuquin Papan bëdambo icmiaid nebi, quendac.

¹⁰ Utsi Esus tantiaquid yec atona dadpen icquid icshobi Nuquin Papan atona nibëdquio icmeshunac: Bëdambo iquebi, quequin ma tantiapanuna. Atona dadpen icquid cute bacuë tuashquiash bëdambo isadbuedi badedquio nibëdanacbimbuecquid nendac.

¹¹ Tanunquio yec uëshë cumapenec chënquequidën cute bacuëec tuashquiaid bëdamboshë isadbuedi badedquio tididiquiash nibëdquiec chodquetequid nendac. Adquiecbidi atona dadpen icquid abi atona bedbanequi uënësec nibëdquio yanendac.

Natiamiantequid chiaid

¹² Adecbidi natiamiantequid icnuc Nuquin Papan Chiaid niaquenquio yec chieshtoenquio icquin abi tantiaquid icsho Nuquin Papan bëdambo icmendac. Adoshombic ambi chiampicpadombuen: Bëdamboshëcquid menequin Umbi chiaid niaquenquio yec mibi ubi tantiaquiec tabadoque. Ubëd ënëdenquio yec tabadtequid mibi icmenu, caindac Nuquin Papan abi tantiaquido chuiquin.

¹³ Icsambuen namenu, quequin tanac icsambuen nashun: Nuquin Papan namiac naombi, quenda. Utsin: Icsambuen namenu, cac Nuquin Papa: Icsambuen nanu, quenquiocquid nec. Adecbidi: Matses icsambuen namequin tannu, quesa nec.

¹⁴ Padnuen matses icquin icsambuen nate bunquin ambibi tantiacpaden icsambuen naindac.

¹⁵ Aden abi icsate bunacpadombuen tantiaquin nabanequi icsaindac. Adec icsashun ambi icsambuen naid ënenquio yec tabadec uënësacsho ënëdenquio yec chian annëdënquiacno nësecatequid iquendac.

¹⁶ Cun utsibo, umbi tantiaido mibitedi neque. Mibibi mua uadenda.

¹⁷ Nuquin Papa icsa nibëdquid yec bëdamboshëcquidquio icquin nuquitedi bëdambocquid menendac. Aidëmbi badiadën uëshëbëta inchëshën uëshë uatanquin uispatedi uapampic. Nuquin Papa utsi ictiapimbo icquid yec iuecash adquiouidi iquendac. Inchëshnuc abuc icquid chënquebuedi chënquenquio yanacbimbuecpenquio utsi ictiapimbo iquendac.

¹⁸ Chiaid Bëda Esusën naid abimbo chuibansho tantiashun ubi tantiabenquido chuca uaquin: Cun bacuëbo nec. Ëbëd tabadtequid nec, caindambi, quequin Nuquin Papan tantiapampic. Ambi matses uaidotedi chienquio icquin abi tantiaquidouidtsëqui tantiaquin aden chuipampic.

Nuquin Papan Chiaid tantiaquin nabanta, quiaid

¹⁹ Tantia, cun utsibo. Umbi tantiaido icsho mibitedi chuinu. Utsin chuibansho bëdambuen tantiaquid icta. Adquid icquin utsibon chuibannubi badedquio onquequin chienda. Adecbidi badedquio nëishenda.

²⁰ Badedquio nëishquidën Nuquin Papan chiacpadombuen bëdambuen nainquio icquid nec.

²¹ Icsambuen naic tabadtequid dadpenquio icnuc mimbi icsambuen tantiacpaden naidtedi ënquiota. Aden: Ënnu, quiash: Icsambuen naombique. Mimbi chiaid tantianu. Ubi bëdambuen tantiame, queshun Nuquin Papan Chiaid chuibansho tantiata. Aden chiaid Nuquin Papabëd nuqui tabadmetembo nendac.

²² Nuquin Papan Chiaid tantiashun nabanenquio iquequi: Ambi chiaid bëdambo iquec, quec mibibi mua uadenda. Nuquin Papan Chiaid mimbi tantiabocpadombuen nabanta.

²³ Nuquin Papan Chiaid tantiashumbi aid nabanenquio icquid yec isnanten bëisadec matses:

²⁴ Adquio iquebi, quebuedi bidiadanec nidec badedquio bëshunacbimbuecquid nec.

²⁵ Padnuen Nuquin Papan Chiaid tantiashun bëshunenquio icquin tantiaquidën aidën chiacpadombuen nabanendac. Nuquin Papan Chiaid icsa nibëdquid yec bëdamboshëcquid nec. Ubi cuidmenquiocte chiaid nec, queshun tantiaquin nabanquid yec Nuquin Papan bëdambo icmiaid iquendac.

²⁶ Nuquin Papan Chiaid tantiaquidquio nebi, quebuedi: ¿Adabi bëdambuec onquepeba? quenquiocquin utsibo icsambuen chiannequid abibi muauadquin icsambuen chuiquid icsho Nuquin Papan bëdambuen istiapimbo iquendac.

²⁷ Nuquin Papan Chiaid bëdambuen tantiaquid nebi, quequid icquin utsi tantiaquin nëidtedi mëyadsho nashunquid. Nëidic menabo. Nëidic shiadibo. Nëidic niantebo. Aidtedi nashunquido icquin Nuquin Papa tantiesabon nabanacpaden icsambuen nabanenda.