Pidipos 1 - El Nuevo Testamento en matsés

I. BEDANQUIN CHIAID ( 1.1-11 ) Mibi tantiembi, quequin chiaid

¹ Esuquidistun iuambo Pabado nebi. Aidën iuabidi Timoteo ubëd iquec. Aidbëtan shubu dadpen icquid Pidipos yacnoshon Esus tantiaquido icsho mibitedi tantiembi, quequin dada uaimbi. Nuquin Papa tantiaquido yec Esuquidistubëd daëdash abentsëc yacbimbuecquido mibitedi nec. Adembidi chuiquid tapabobëta mibi nashunquido tantiembi.

² Nuquin Papabëtan Nuquin Icbo Esuquidistun ma mibitedi bëdambuen isquin bëdambuec tabadmepanuna, quequin tantiembi.

Nuquin Papa bëdamboshë iquec, quequin chianniaid

³ Adembidi mibitedi tantiadednequin: Aden aido mibi tantiamec mibi bëdamboshë iquec, Papa, quequin chiannembi.

⁴ Aden mibitedi tantiaquin Nuquin Papa chiannec cuishonquebi.

⁵ Umbi Esus chuibanac aid tantiaquid yanshun mimbi ubi nashunondac. Aden naondashumbic: Ma Pabadon matses utsibotsen Esusën naid chuibannu, queshun nëbi adembidi naquin mimbi piucquid bëmiac.

⁶ Nuquin Papan tantiamiac mimbi Esus tantiabenondac. Aden abi tantiasho mibitedi bëdambuec tabadmec. Adoac Esuquidistu nidaidën padpidec choacnobi cuësquec bëdambuec tabadquidquio yanendac.

⁷ Adquid yanshun ubi chieshënenquio icquin mimbi ubi tantiaquiec. Adsho mibitsen tantiaquiembi. Nëbi quënën tsadunondac abi tsadebi. Aden quënën tsadunaqui Nuquin Papan Chiaid Bëda chuibanquin tantiamiac: Abimbo caic, queshun ma tantiabennu, quequin chuibanembi. Adembidi chuiquid tapabo tantiamequin chuidenniondambi. Adquid icsho mibitedishun ubi tantiaquin mimbi ubi nashunoc.

⁸ Esuquidistun tantiamiacpadombuen mibitedi tantiec: Aido uënësquio iquec, ubi quesho Nuquin Papan: Abimbo caic, quequin tantiec.

⁹ Naden mibitedi tantiaquin Nuquin Papa chiannembi. Aido bëdiactsëc tantianansho canidoacbimbuec utsibobëd tantiananmequiota. Adembidi mimbi naid bëdiactsëc tantiasho tantiamebenquiota.

¹⁰ Aden tantiamiac: Nadec tabadec bëdambo ictsiabi. Adec tabadenquio yec icsambo ictsiabi, quequin bëdambuen tantiendac. Aden tantiaquid yec chieshtoenquio icquin Esus tantiec bëdambuec tabadendac. Adec tabadnubi abi chote uëshën choshon Esuquidistun: Bëdambuec mibi tabadoc, mibi caindac.

¹¹ Adec mibitedi Esuquidistu tantiec bëdambuec tabadsho isash: Bëdambocquido nec, quetsiash utsibo. Adash: Aido bëdambuec tabadmequid yec Nuquin Papa bëdamboshëcquid nec, quendac, quequin mibitedi tantiaquin Nuquin Papa chiannembi.

II. MATSES UTSIBON ESUS TANTIABENAID ( 1.12-26 ) Utsibon Esus chuibenniaid

¹² Tantia, cun utsibo, mibitedi chuinu. Natiamiac umbi chuibennetiapimbo icnubi utsibon Esusën naid chuibenniac utsin utsinquien tantiabenaccaosh, quiash bëdambo iquebi.

¹³ Nëshunquio quënën tsadunaid cuennushe, quequin ubi isquidon chuiquid tapan sondadobëtan utsibon: Esuquidistun naid chuibansho quënën tsadunaid nec, quequin tantiec.

¹⁴ Aden ubi quënën tsadunaid icnuc: Aidën naondacpadombuen dacuëdenquio icquin Esusën naid chuibennenu, queshun Esus tantiaquido dadpenshun dacuëdbuedombi Esuquidistu tantiec dacuëdenquio icquin Nuquin Papan Chiaidquio chuibanac caosh.

^15-16 Aidon ubi bëdambuen tantiaquin Esuquidistun naid chuibanec. Aid tantiembi, queshun aidën naid chuibennesho bedshun quënën tsadunac chuibantiapimbo icnuc: Umbitsen chuibannu, quequin ubi bëdambuen tantiaquin Esuquidistun naid chuibanac caosh. Nuquin Papan namiac quënën tsadunaid icquin: Esusën naid chuiquin: Abimbo caimbi, quequin utsibo chuibanac, quequin aidon umbi naid tantiac caosh. Padnuen utsibon ubi chieshënquimbi: Umbimbo bëdambuen namenu, quequin Esuquidistun naid chuibanac caosh.

¹⁷ Aden chuibanec: Umbentsëqui chuibanac tantiashun: Mibi bëdambo iquec, ma ubi canu, quequin Esus tantienquio icquimbi aidën naid chuibanec. Adembidi umbi naid utsibon chuituidac: Ma Pabado uënësquio yampanu, queshun chuibanec ubi quënën tsadnubi.

¹⁸ Ubi chieshënec ¿quiashtabi nëishpe? Padenquio. Ubi chieshënquidobëtan ubi tantiaquidon Esuquidistun naid chuibanec, quiash bëdambo yec cuishonquebi.

¹⁹ Mibitedishun ubi tantiaquin Nuquin Papa chuibedednuc mimbi chianniacpadombuen Esuquidistun Mayanën bëdambo icmiac chieshtoenquio iquendabi. Aidën nac quënën tsadenquio yec puduenendabi.

²⁰ Aid tantiec dacuëdenquio yanshun abi tantiasho Nuquin Papan icsambuen namenquio icquin bëdambuen isec. Umbi naondacpadombuen dacuëdenquio icquin Esusën naid chuibante bunec chieshtotiapimbo iquebi. Ma utsibon: Esuquidistu bëdambo iquec, canu, quiash uënësabi yec chieshtotiapimbo iquebi.

²¹ Uënësabi icquin Esuquidistu tantiec bëdambo iquebi. Cuessunniac uënësash abi yacno tabadec bëdamboshë iquendabi.

²² Uënësabi icquin umbi chuibanac utsibon Esus tantiabentsiash, quiash ¿uënësenquio yec tabadtedabi bumpeba? ¿Mitsipadtebi bumpeba?

²³ Umbi aden tantiaid daëd icnuc ubi adtequid tantienquio icquimbi: Nëbimbobi uënësmepashuni, quequin tantiabuedi: Esuquidistubëd tabadec nidnu, quequin tantiembi. Adash bëdamboshë ictsiabi.

²⁴ Aden tantiabuedi: Mibitedi bëdambuen tantiamenuec nidtsiabi, quequin tantiec uënëste bunenquio iquebi.

²⁵ Uënësambo yec mibëd tabadquin Esusën naid bëdambuen chuibantsiambi. Adoac mibitedi bëdiactsëc tantiactsëcbuedobi Esus tantiaquiec udi cuishonquec mibitedi bëdambo yantsiac, quiash mibi yacno nidte bunebi.

²⁶ Ubi padpidec mibi yacno nidacsho isash: Bëdamboshë iquec, quec Esuquidistu tantiec mibitedi cuishonquetsiandac.

III. ESUQUIDISTU TANTIAQUIDON NABANTE CHIAID ( 1.27—2.18 ) Chieshtoenda, quequin chiaid

²⁷ Naden mibitedi chuinu: Esuquidistun chiacpadec chieshtoenquio yec bëdambuec tabadta. Mibi yacno nidshun bëdambuec tabadsho isash: Umbi Esuquidistun naid chuibanac tantiabenondaido nec, quetsiabi. Adembidi mibitedi istanquidon mimbi naid chiec: Chieshtoenquio icquin Esus tantiec abentsëc yacbimbuec bëdambuec tabadosh. Adecbidi chieshtoenquioquin Esusën naid chuibansho tantiec bëdambuec tabadosh, quequin chuisho tantiate bunebi.

²⁸ Mibi chieshënquidon chieshënac natienda. Nuquin Papan mibi chieshënquido uënësacsho chian annëdënquiacno nësecaindac. Ambi chiacpadombuen Esus tantiec uënësashien mibitedi Nuquin Papa yacno tabadendac.

²⁹ Esus tantiaquido icsho natiamiaqui mibitedi bëdambo iquendac. Adecbidi Esuquidistu tantiec bëdambo icuaindac.

³⁰ Ubi chieshëmbocpadombuembidi mibitedi chieshënec. Mimbi isnubi natiamequin chieshënondashi. Adembidi nëbi abi chieshënebi, quequin mimbi tantiendac.