Pidemon 1 - El Nuevo Testamento en matsés

Mibi tantiembi, quequin chiaid

¹ Pabado nebi. Esuquidistu chuibennesho bedshun quënën tsadunaid nebi. Ubëtan Nuquin Papabëta Esuquidistu chuibennequid icsho mibi tantiec tsadebi, Pidemon. Nuqui: Cun utsi caid Timoteontsen mibi tantiec tsadec.

² Adembidi mibëd icquid Apia cuëmëdquid Esuquidistu tantiaquidquio icsho umbi cun chu caid nec. Mibëd icquidbidi Adquipo cuëmëdquid sondadobimbuen Nuquin Papan chiacpadombuen naquin Esuquidistu chieshtoenquio icquin tantiaquid icsho umbi cun utsi caidbidi nec. Aidobëd min shubun Esus tantiec iccuededquidotedi caic: Pabado chedon mibitedi tantiec, cata.

³ Nuquin Papabëtan Nuquin Icbo Esuquidistun ma mibitedi bëdambuen isquin bëdambuec tabadmepanuna, quequin mibi tantiaquin chiannembi, Pidemon.

Nuquin Papa chiec onquiaid

^4-5 Pidemon Nuquin Icbo Esus tantiaquidquio nec. Adquid icquin Nuquin Papa tantiaquid utsibo tantiaquin nashunquid nec, quequin utsibon chuisho tantiombi. Aden tantiash: Bëdambo iquebi, queshun mibi tantiaquin ënenquio icquin Nuquin Papa chiannembi.

⁶ Nuquin Papa nadembidi chiembi: Ubëtan Esus tantiaquid nec. Adquid icsho ma Esusën bëdambuen isquin ambi nabocpadombuen bëdambuen nabanmec bëdambuec tabadmeta, quequin mibi tantiaquin Nuquin Papa chiannembi.

⁷ Aden umbi chianniacpadombuen mimbi bëdambuen nabanec. Aden Nuquin Papa tantiaquido chieshtomenquio icquin bëdambo icmec, quequin tantiec cuishonquec bëdambo iquebi.

Onesimo bëdambuen ista, quequin chiaid

⁸ Esuquidistun: Ubi chuibenneta, cashun Esus tantiaquido namequidtsen icta, caid nebi. Adoaid icquin aidën chiacpadombuen utsi tantiaquin nashunta, quequin mibi chuite bunquimbi aden chiambo iccombi.

⁹ Mibëd tantiananquid icquimbi naden chiembi: Pabado nebi. Tsësiobudobi. Esuquidistu chuibansho quënën tsadunondac tsadec nebi.

¹⁰ Adoaid icquin mibi chuinu. Tantia. Umbi Esus chuibanac aid tantiaquid yanondaid yec Onesimo cun madobimbuecquid ubëdi quënën tsadunaid nec.

¹¹ Ënden min iua icquin mimbi chiacpadombuen nainquio yec icsambocquid Onesimo icpanëdash. Adquid icnëdaidi nëbi adquidpenquio yanshun nëshunquio ubi nashunec. Adombuembidi mibi nashunendac.

¹² Aidi umbi tantiaidquio yec cun madobimbuecshobi mibi yacno nidmeuaimbique. Ubi chosho issun iuedacbimbuen bëdambuen isquin iuedta.

¹³ Esusën naid chuibansho quënën tsadunaid nec, queshun mimbi ubi nashuntiapimbocnobi ubi nashunquid Onesimo nec, queshun nidmenquio ictiadquidi mibi yacno nidmembi.

¹⁴ Mimbi: Adonona, quequin chiabi icnuc umbi tantiacpaden nate bunenquio iquebi. Ma ubëd tabadnu. Bëdambuen chuita, mibi catiapimbo iquebi. Mimbi tantiacpadombuen aidi chiac bëdambo ictsiash.

¹⁵ Iuecash cuëshëdenquio yec Pidemombëd Onesimo tabaduaindac, quequin tantiacpadquiec cuennëdaidi nëbi mibi yacno nidash cuenenquio yec mibëd bëdambuec tabaduaindac.

¹⁶ Onesimo min iua iccondaidi Esus tantiaquid yanacsho mimbi cun utsi caidquio aidi nendac. Adquid icsho umbi tantiaidquio neque. Mimbitsen tantiaquiota. Mibi yacno nidshun Esuquidistu tantiaquid icquin mimbi chiacpadombuen chieshenquio icquin bëdambuen mibi nashunendac.

¹⁷ Esus tantiaquid yec cun buchibimbuecquid nec, queshun mimbi ubi iuedondacpadomboembidi Onesimo iuedta, Pidemon.

¹⁸ Ubi icsambo icmequin cun piucquid bedaccondash, queshun chieshënenquio icquin ubi chuita. Mimbi chiactedi mibi meneuanu.

¹⁹ Aidtedi meneuaimbi, quequin abimbo chuiquin umbimbo cun mëdanten dada uaimbique. Isec onquequin tantiaquiota. Umbi nashunquin Esuquidistu chuibanac aid tantiaquid yanash Nuquin Papa yacno puduedtequid Pidemon nec, queshun ubi cuidquin mimbibi ubi mene, quetiadquidi mibi chienquio iquembi.

²⁰ Tantia, cun utsi Pidemon. Umbi chuibocpadombuen ubi nashunta. Nuquin Icbo Esuquidistu tantiaquin Onesimo bëdambuen nashunta. Aden nashunquin Esusën namiacpaden mimbi ubi uënësquio icsho bëdambo icmendac.

²¹ Umbi chuibocpaden aid nashunquimbi umbi chiabi yaid tantiaquin udictsëc nabantsiash, quequin tantiaquin mibi chuiquin dada uaic nebi, Pidemon.

²² Utsitsen chuinu. Tantia. Umbi tantienquio icnuc chonoshe, queshun ubi ushte nacnenta. Mibitedishun ubi tantiaquin chianniacpadombuen badedquio Nuquin Papan mibi yacno nidmiac mibi isec nidendabi.

Ënquin chiaid

²³ Epapadas ubëd iquec. Aidbidi Esuquidistu chuibansho bedshun quënën ubëta tsadunondash. Aidëmbi: Mibëd icquidotedi tantiec tsadebi, quequin chuita, cac dada uaimbi.

²⁴ Adembidi Madcos yec Adistadco yec Demas yec Ducas yec quec ubëtan chuibanquido icquin: Mibi tantiembi, quequin chuita, cac dada uaic nebi.

²⁵ Ma Nuquin Icbo Esuquidistun mibitedi bëdambuen isquin bëdambo icmepanuna. Aidted chuiquin dada uaombi.