Petedo 2 1 - El Nuevo Testamento en matsés

Mibi tantiembi, quequin chiaid

¹ Simon Petedo nebi. Abëd icquid yec aton iuambo icsho Esuquidistun: Ubi chuibenneta, caondaidquio nebi. Umbi tantiaidbidi bëdamboshëcquid Esuquidistu tantiaquido icsho mibitedi tantiembi, quequin chuiquin dada uaic nebi. Nuquin Papapadquidquiobidi yec Nuquin Papa matses cuidmenquiocquid Esuquidistu nec. Adquid icquin abimbo chuiquin cuidquidquio nec.

² Mibitedi Esus tantiaquido icsho: Ma Nuquin Papabëtan Nuquin Icbo Esusën abi tantiasho bëdambuen isquin bëdambuec tabadmequin: Nadquio Nuquin Papabëd Nuquin Icbo Esus iquec, quequin tantiamequiota, quequin mibitedi tantiaquin Nuquin Papa chiannembi.

Nuquin Papa bunacpadec bëdambuec tabadte chiaid

³ Nadatiambocquin nabanquid icquin Nuquin Papan Esus tantiamiaido nuqui nec. Aden tantiamiac aidën chiaid niac niacte bunenquio yec Esus tantiec nuqui bëdambuec tabadendac. Abipadquid utsi nibëdnuc bëdamboshëcquid icquin Nuquin Papan Esus tantiamequin ambi namiaido nuqui icmiac.

⁴ Aden ambi chuinëdacpadombuen bëdamboshëcquid nuqui menec. Adoac aidën tantiamiac Nuquin Papan Chiaid isbanec Nuquin Papabimbuec icsate bunenquio yec nuqui bëdambuec tabadendac. Utsibo icsateuidi bunec icsambuen naic tabadnubi cuenacbimbuec mibitedi bëdambuec tabadendac.

⁵ Aden Nuquin Papan Esus tantiamiaido yec dayacquio icquid yacbimbuen ënenquio icquin aid tantiec bëdambuec tabadnuna. Adecbidi Nuquin Papan Chiaidquio tantiaquiec tabadnuna.

⁶ Aden Nuquin Papan Chiaidquio isquin tantiec nuqui icsate bunacpadec icsainquio icquin ënnuna. Aden ënash nuqui chieshënquidbëd chieshënnanenquio icquin Esus tantianuna. Nuquin Papatsen tantiaquiec bëdambuec tabadnuna.

⁷ Aden Nuquin Papabëta Esus tantiaquido yec tantiananec nashunnanquionona. Adec nashunnanec tabadquin nuquin shubun icquido tantiaquiacbimbuen matses abitedi tantianuna.

⁸ Umbi chuibuedtedi tantiaquin chieshtoenquio icquin nabanec mibitedi bëdambuec tabadquid yanendac. Adec tabadquin bëdiactsëc tantiactsëcbuedëmbi chieshtoenquio icquin Nuquin Icbo Esuquidistu tantiaquidquio mibi yanendac.

⁹ Aden umbi chuibocpadombuen naisa yec pamumëdacbimbuec iquec. Adquido icquin ambi icsambuen naid ënshun tantiabenacsho icsaisabimbuecnuc Nuquin Papan nuqui bëdambuen isec, quebuedëmbi aid tantienquio yanec bëshunash tantiesa yanuaindac.

¹⁰ Tantia. Cun utsibo, mibitedi chuinu. Nuquin Papan: Cun matses canu, quequin Esus tantiamiaido mibitedi nec. Aden tantiamiaido icquin cute tapun nidaid ëquëducquio nidacbimbuen aid ënenquio icquin tantiaquid yec Esus tantiesa mibi yanuainquio iquendac.

¹¹ Adec bëdambuec tabadec uënësacsho: Ubi tantiaquid mibi neque. Ubëdi tabadec cho, queshun ambi ënenquio icquin namiacno abëdi tabadmequin Nuquin Papa matses cuidmenquiocquid icquin Nuquin Icbo Esuquidistun nuqui bëdambo icmendac padpidec uënëstiapimbo icnuc.

Abimbo chuibanquin tantiamete chiaid

¹² Umbi aden chuibuedtedi mibitedishun tantiondac. Aden tantiash chieshtoenquio yec Esus tantiec bëdambuec mibitedi tabadanondac. Aden abimbo chiaid tantiondaid icsho mibi adembi chuiquin tantiamedednendambi.

¹³ Uënësabi icquin umbi chuibambued mibitedi adembi chuiquin tantiamedednendambi.

¹⁴ Nëbi mibi uënësendac, quequin Nuquin Icbo Esuquidistun tantiamiondashibique. Nëbi uënësendabi.

¹⁵ Ubi uënësan umbi chuibued ma bëshunenquio icquin tantiadednenu, queshun mibitedi padpiden chiec nebi.

Esus isondambi, quequin chiaid

¹⁶ Nadatiambocquin nabanquid yec Nuquin Icbo Esuquidistu: Padpidec chouaindabi, quiondash, quequin ubitedishun chuibanaid ambembi muaquin chuibanaidpenquio nec. Umbimbo bëchamauanquiecsho isondaidquio mambi mibitedi chiec nec.

^17-18 Nadquio icpondash. Macuësh tapan dectatoash Esus bëchamauanquiec yampondash. Adnubien bëchamauanquiec yacnouësh nadec Nuquin Papa onquesho tantiapondambi: Nëidquio Umbi tantiaidquio yec Umbi namiaidquio Cun Madombo nec. Aid isec bëdambo iquebi, quec auëshquio onquesho ubitedishun tantiapondambi.

¹⁹ ¿Umbentsëquidambi Esus chuibanquin nape? Padenquio. Ëndenquimboshë Esus chote tantiamequin Nuquin Papan Ambi Chiaid ambi oncamiaido dada uamepampic. Inchëshquio yacno tabote taboshon dectanac uëshëmbo chënquebuedi badiadec uëshëmbo yanec chënquecunnuc tabote taboaid mibitedishun istiapimbo iquec. Uispa dapa badiadte anoentsëc choec chënquecunacbimbuen Esuquidistun nidaidën chouashon Nuquin Papan oncamiaidon dada uampid chuiquin bëdambuen mibitedi tantiamepondash.

²⁰ Tantia, mibitedi chuinu. Nuquin Papan nadoendac, quequin ambi oncamiaido dada uamiampid isbanquin ¿abi bunacpadombuen tantiaquin chuibanshoda: Bëdambo iquec, capec? Padenquio.

²¹ Ambembi chiec onquenquio icquin Nuquin Papan oncamiaidon chuibampampic. Nuquin Papan Mayan Bëdan tantiamiac abimbo aidon chuipampic.