Petedo 1 5 - El Nuevo Testamento en matsés

IV. NADEN NATA, QUEQUIN CHUIBANAID ( 5.1-11 ) Esus tantiaquidon chuiquid chiaid

¹ Tantia. Esus tantiaquidon chuiquido icsho mibitedi chuinu. Mibi padquid Esus tantiaquidon chuiquid nebi. Mëyanquioquin Esuquidistu natiamequin uënës uasho isondambi. Aidi abitedishun Icbo iquec padpidec nidaidën chouashun bëdamboshë yacno ubi tabadmendac, quiash bëdambo iquebi.

² Icbon aton nëish iua obeca dayun uacbimbuen mibëtan Esus tantiaquido dayun uata. Nuquin Papan Chiaid niaquenquio yec bëdambuec tabad, quequin chuibanta. Nuquin Papan: Ubi tantiaquido chuibanquid icta, caid icquin mibi bunacpadombuen chuibanenda. Aden chuibanquid icquin piucquid dadpen bednun nanu, quenquio icquin Nuquin Papa bunacpadombuen Esus tantiaquido chuibanquid icta.

³ Adoaid icquin mimbi chuibanaido chushcainda. Aidon icbopenquio mibitedi neque. Adenquio yec: Ubi yacpadec ma tabadnu, quequin aido ismec bëdambuec tabadta.

⁴ Aden Esus tantiaquido chuibanquidën bëdambuen nabannubien aton Chuiquid Tapambo yec Nuquin Icbon nidaidën padpidec chouashun utsibo ismequin: Mimbi bëdambuen nabanoc, queshun chunidtiapimbo ictequid shocosh mauete bëdamboshëcquid mibitedi menendac.

Esus tantiaquidon nabante utsi chiaid

⁵ Tantia, caniabo. Mibitsen chuinu. Min chuiquid tapa Esus tantiaquido chuibanquid neque. Aidën chiaid niaquenquio icquin nabanta. Ubi nashunta, quec chuinanec nashunnanta. Umbi tantiacpadembi naimbi, quenquio icquin utsin chiacpadombuentsen nabanta. Adquid Nuquin Papan chuiquin naden dada uamiampid iquec: Utsibo tantienquio icquin aton nauidtsëqui nasho: Icsambo iquec, caindambi. Utsimbien atonauidtsëqui tantienquio icquin utsibotsen tantiaquin nashunsho Nuquin Papan: Aid bëdambuen isquin nashunendambi, quequin chuiquin dada uamepampic.

⁶ Aden atonauidtsëqui tantienquio icquin nabanquid icsho issun nadatiambo icquid yec abitedishun Icbombo icquin Ambi tantiacpadën utsibo ismequin: Ubi tantiaquidquio mibi neque. Ubëdi tabadec cho, caindac Nuquin Papan.

⁷ Aidi mibi tantiaquidquio neque. Mimbi utsi utsien natiaquin uënësquiocquin tantiaidtedi Nuquin Papa chuita.

⁸ Mibi icsate bunacpadec icsainquio icquin isucunacbimbuen Esusquio tantiata. Aid tantiaquido icsho Mayan Icsa Satanasën mibi icsamete bunquin bëdin nëish penuen nibëmbenniacbimbuen ambi icsambuen nametequid ënenquio icquin nibëmbenneque.

⁹ Icsamenda. Chieshtomenda. Icsamenushe, queshun Nuquin Papa tantiaquin aidën chiaid niaquenquio yec bëdambuec tabadta. Ubi chieshënquin natiamiacpadombuembidi Esus tantiaquid utsibo nidaid utsi utsiec yacno tabadquido natiamec, quequin tantiec chieshtoenda.

¹⁰ Aden utsibon chieshënquin natiamiaido yec iuec iuecpactsëc mibitedi mëyadec tabadendac. Adec tabadsho Nuquin Papan bëdamboshëcquid icmequin dayacquiocquid yacbimbuecnuc chieshtoenquio icquid mibi icmendac. Adembidi nuqui tantiaquidquio icquin ambi Esus tantiamiaido icsho abi yacno buanshun nuqui bëdamboshëcquid icmiac ënëdenquio yec Esuquidistubëd daëdash abentsëc yacbimbuecnuc tabadmendac.

¹¹ Aidi nadatiamboshëcquid yec nibëdantiapimbo icquid nec, queshun: Mibi bëdamboshë iquec, canuna ënenquio icquin. Amen.

Ënquin chiaid

¹² Umbi daëdpactsëc chuiquin Sidbano dada uamebued mibi yacno buanmembi: Ma mibitedishun isnu, queshun. Aidi chieshtoenquio icquin Esus tantiaquidquio icsho umbi cun utsi caid nec. Ma nëid isash: Ubitedi tantiaquidquio icquin Nuquin Papan ubitedi bëdambuen isquin bëdambo icmec, quequin ma tantianu, quequin abimbo mibitedi chuibanondambique. Chieshtoenquio icquin Nuquin Papa tantiec tabadta.

¹³ Nuquin Papan tantiamiac nuquibëtan Esus tantiabenondaid Doma yacnocquido: Aido tantiembi, quiosh mibitedi caic. Adecbidi cun madobimbuecquid Madcostsen: Aido tantiembi, quiosh mibitedi caic.

¹⁴ Esus tantiaquido nebi, quiash: Mibi tantiembi, cananta. Nuquin Papan mibitedi Esuquidistu tantiaquido icsho ma bëdambuec tabadmepanu, quequin mibi tantiaquin Nuquin Papa chiannembi. Aidted chuiquin dada uaombi.