Petedo 1 4 - El Nuevo Testamento en matsés

Bëdambuec tabadte chiaid

¹ Utsibon chieshënquin natiamequin aton dada mëyanaqui Esuquidistu chieshtoenquio icpanëdash. Adembidi mibitedi chieshënquin natiamiac chieshtoenda. Aden mëyanaqui icsambuen nate bunenquio mibi iquendac.

² Aden mimbi tantiacpadombuen nainquio icquin Nuquin Papan tantiacpaden nate bunquidquio mibitedi iquendac.

³ Ënden Nuquin Papa tantiesabon nacpaden Nuquin Papan Chiaid niacniaquec mibitedi icsambuen naic iuec tabadpanëdac. Adec icsateuidi bunec mëmuntiapimbo mibitedi icpanëdac. Adquid icquin utsin chido chudquid dada icnubi chido aton bënëpenquio chudmequid icpanëdash. Badiadquidën badiadquidënquien nua peshun tantiadennuen acte paë uaid acquid mibi icpanëdac. Nëid papa canu, quequin matsesbimbuecnuc nacnenshun mimbi tantiapanëdac.

⁴ Adec tabadondaidi nëbi bëdambuec tabadsho issun mibëtan icsambuen nabanondaidon: ¿Atotsi queshun nuqui naondacpadombuen nainquio ique? quequin mibitedi icsambuen chuishunendac.

⁵ Aden mibitedi icsambuen chuishunquido Nuquin Papan cuidendac. Cuidnumbi matsesën naidtedi tantiaquid icquin Nuquin Papan: ¿Mitsipaden nabano? ¿Ada bëdambuec tabado? cac uënësaidobëtan uënësabi icquidotedishun ambi nabanaidtedi uesquin chiendac.

⁶ Aden abëd tabadtequid tantiaquin Nuquin Papan matses uënësaid tabadacno nidmiac Chiaid Bëda Esusën naid Nuquin Papan bëdambuen iste chuibampanëdash. Aden chuisho tantiec uënësaidën mayan tabadpanëdash.

III. NUQUIN PAPAN ABITEDI CUIDTE UËSHË ANUENTSËQUI YANNUC ESUS TANTIAQUIDO ICTE CHIAID ( 4.7-19 ) Utsibo tantiaquin nashunta, quiaid

⁷ Tantia, mibitedi chuinu. Nuquin Papan abitedi cuidte uëshë nëbi yanec, queshun mimbi icsambuen naid ënash bëdambuec tabadquin ënenquio icquin Nuquin Papa chianneta.

⁸ Nëbi mibëtan Esus tantiaquid utsibobëd tantiananquiota. Adec mibëd tantiananquidën mibi icsambuen nashunsho isash adecbidi tantiananquiec aidën icsambuen naid tantienquio yec bëshunendac.

⁹ Utsibo mibi yacno isedec chosho issun: Mibi iuedtiapimbo iquebi, quenquio icquin bëdambuen isquin min shubun iuedta.

¹⁰ Mibitedi utsi utsien Nuquin Papan ambi tantiamiacpadombuen namiaido icquin mibëtan Esus tantiaquid utsibotsen tantiaquin nashunta.

¹¹ ¿Ada Nuquin Papan ambi Chiaid chuibanquid mibi icmiac? Adquid icmiaid icquin Nuquin Papan Chiaidquio chuibanta. ¿Ada Nuquin Papan mibëtan Esus tantiaquid utsibo nashunquid mibi icmiac? Adquid icmiaid icquin: Nuquin Papan tantiamiacpadombuen utsi nashunquiembi, queshun nashunta. Mimbi adosho isash ma utsibo: Abi namequid Nuquin Papa bëdamboshë iquec. Ambi tantiaid Esuquidistu bëdamboshëcquidbidi yec abitedishun Icbombo nec. Adquid yec nadatiambocquidquio nec, ma quenu, queshun ënenquio icquin tantiata. Amen.

Natiamiaqui chieshtoenquio icte chiaid

¹² Tantia, cun utsibo. Umbi tantiaido icsho mibitedi chuinu. ¿Atotsi quiash ubi natiametequid icpec? ¿quecta ique? Adquid icnuc natiec chieshtoenda. ¿Mibentsëquida aden natiamepadic? Ma Esus tantiaquid dadpen natiamiaid icpayoc.

¹³ Esuquidistu chieshënquin natiamenëdacpadombuembidi aid tantiaquido icsho ubitsen natiamec, quiash cuishonqueta. Abi yacno ubi buannuec nadatiambocquid yec Cun Icbo Esus padpidec choec, quiash aidbëd cuishonquequionosh bëdambuec tabadta.

¹⁴ Esuquidistu tantiaquid nec, queshun chieshënquin icsambuen chuishunshobi Nuquin Papan mibi bëdambo icmendac. Adoshon Nuquin Papan aton Mayan Bëdamboshëcquid mibëd cuëshëdmenquio icquin tabadmendac.

¹⁵ Mibitedi utsi utsiec cuessunnianquid yec ampequid yec chuiquidën chiaid niacquin icsambuen naquid yec utsibo icsambuen namequid yec quequidpenquio icshobi cuidte chuiquidën cuidsho issun: Icsambo iquec, catsiambi.

¹⁶ Esus tantiaquid icsho utsibon chieshënquin natiamiaqui chieshtoenda. Dacuëdec chieshtoenquio icquin: Nuquin Papa bëdamboshë iquec. Esus tantiaquid yec bëdambo iquebi, quequin tantiata.

¹⁷ Nuquin Papan matsesën naidtedi tantiaquin cuidte uëshë nëbi yannuc Esus tantiaquid icquimbi icsambuen naquid icsho mibi natiamendac. Adsho issun chieshëmënquidën natiamiac umbi tantiacpadombuen ambi icsambuen naid ëntsiash, queshun mibitedi Nuquin Papan: Natiamenda, cainquio iquec. Aden abi tantiaquidoba natiametequid icquin ¿abi tantiesabo icquin Esusën naid Chiaid Bëda niacniacquid icsho bëdiactsëcta cuidpec? Cumapenquien Nuquin Papan cuidendac.

¹⁸ Natiamiantequid icnubi chieshtoenquio icquin ambi chiacpadec bëdambuec tabadquido icsho Nuquin Papan abëd tabadmetequid icnuc ¿Ambi Chiaid niacniacquec icsambuec tabadquido bëdiactsëcta natiamepec?

¹⁹ Nuquin Papan tantiacpaden natiamiac mëyadec Esus tantiaquido ma nadpanuna. Ubi uaquid icquin Nuquin Papan ambi chiampicpadombuen ubi dayun uaquin bëdambuen namec. Aid tantiec bëdambo iquebi, quiash ma bëdambuec tabadpanuna.