Petedo 1 3 - El Nuevo Testamento en matsés

Aton bënëbëta chido chiaid

^1-2 Tantia, chidobo. Bënëchoquid icsho mibitedi chuinu. Esus tantiaquid icquin min bënën chiacpadombuen nabanta. Esus tantiec ubi bëdambuec tabadsho issun Nuquin Papan Chiaid tantienquio icbuedëmbi cun bënën Esus tantiabentsiash. Mimbitsen Esus tantiabenta, quequin umbi chiambobi Esus tantiabentsiash, queshun min bënën chiacpadombuen nabanta.

³ Bëdambuec tabadte bunquin casëdo shocosh bëshpiu bëshpiucquid odo caid nacnacquiocquid payuteuidi bunenda. Adecbidi dashcute bëdamboshëcquid dasiuidteuidi bunenda. Bëdambo isadnu, queshun manëdaid nacnenteuidi bunenda.

⁴ Adenquio icquin: Bëdambocquid nec, camenuec bëdambuec tabadta. Nacnemëdteuidi bunenquio icquin bëdambuen nabanec bëdambocquid icta. Mimbi aden nasho isash: Mibi bëdambo iquec, quendac Nuquin Papa.

⁵ Adecbidi ëndenquimboshë tsusedpabon chidobo bëdambuen Nuquin Papa tantiaquid yec adquio icpampic. Adquido icquin aton bënën chiacpadombuen naic bëdambuec tabadpampic.

⁶ Adec tabadquid Sada icpampic. Aidëmbi: Cun bënë cun icbobimbuecquid nec, queshun aton bënë Abadauanën chiacpadombuen napampic. Mibitedi aidën champicbimbuecquido yec bëdambuec tabadquin dacuëdenquio icquin aidën nanëdacpadombuen naic bëdambuec tabadta.

⁷ Tantia. Bënëtsen chuinu. Abia uinmabudquid icsho min chido bëdambuen ista. Mibëtan Esus tantiaquid yec Nuquin Papa bëdamboshëcquid yacno mibëdi tabadtequid neque. Min chido bëdambuen ista. Ubi bëdambuen ista, Papa, quequin mimbi chianniaid Nuquin Papan tantienquio icnushe. Min chidobëd bëdambuec tabadta.

Esus tantiaquidon nate chiaid

⁸ Tantia. Nëbi Esus tantiaquid abitedimbo chuinu. Nuquin Papan chiacpadombuen nanuna, quiash utsibobëd tantiananec bëdambuec isnanta. Cuishonquequidobëd cuishonqueta. Uënësquio yec shubiquidobëd shubita. Adec tantiananquiota. Umbi naiduidi naimbi, quenquio icquin utsibon chiacpadombuentsen nabanta.

⁹ Chieshënac cuidnanec chieshënnanenda. Chieshënquin icsambuen chuishunac cuidnanec icsambuec chuishunnanenda. Adenquio icquin aido bëdambuen ista. Umbi bëdambuen isaidon ma aton matses bëdambuen isnu, queshun Nuquin Papan abi tantiaquido mibi icmiaque. Bëdambuec tabadta.

¹⁰ Naden chuiquin Nuquin Papan dada uamiampid iquec: Bëdambuec tabadte bunquid yec cuishonquec tabadquid iquendac. Adquidën utsibo mua uainquio iquendac. Chieshënquin utsibo icsambuen chuishunec onquenquio iquendac.

¹¹ Icsambuec tabadbuedi bëdambuec tabadnuna. Utsibo chieshënnansho issun: Padi, chieshënnanenquio yec bëdambuec tabadnuna, caindac.

¹² Ambi chiacpadombuen naic bëdambuec tabadquido icsho Nuquin Icbon dayun uaindac. Aidon: Ubi bëdambuen isquin nashunta, Papa, quequin Abi chiannesho tantiendac. Padnuen icsambuen naic tabadquido icsho bëdambuen istiapimbo iquendac, quequin chuiquin dada uamepampic.

¹³ Bëdambuen nabanec tabadquid icsho ¿tsuntsin mibitedi icsambo icmequin cuespatsiash?

¹⁴ Adec bëdambuec tabadsho issun icsambo icquidën natiamequin mëyanacsho mibitedi Nuquin Papan mibi bëdambo icmetsiashe. Utsibo dacuëdënec natiec tabadenda.

¹⁵ Dacuëdenquio icquin: Cun Icbo Esuquidistu nec, quequin tantiaquin aidën chiacpadombuen nata. Aden mimbi tantiasho isash utsibo: ¿Mitsipaden tantiaquin Esus tantiaquin nai? quesho tantiashun: Ambi chuinëdacpadombuen abi tantiec uënësacsho abi yacno ubi tabadmendac, queshun Esus tantiembi, quequin utsibo chuibanta.

¹⁶ Aden chuibanquid yec: Ubiuidtsëqui bëdambo iquebi, quenquio icquin bëdambuen isquin chuibanta. Aden icsambuen naid ënash bëdambuen nabanec mibitedi tabadsho isash chieshëmënquid nadtsiash: Esus tantiec bëdambuec tabadquidobi icsambuen chuiquin muauachitombi, quec dacuëdendac.

¹⁷ Nuquin Papan tantiacpadec Esus tantiaquid yec mëyadsho: Icsambo iquec, catiapimbo iquec. Icsambuen naquid yec mëyadac bëdambo ictsiash.

¹⁸ Chieshënquin natiamiaqui Esuquidistu mëyadquiec nuqui icsaid bedshunec abided cuidadec abentsequi uënëspondash. Aidi icsaisambo iquequi icsambuen naquido tantiec mëyadbudec uënëspondash: Ma Nuquin Papa yacno tabadtequido icpanu, quiash. Adec aton dada icsabudec uënësambi aton mayan uënësesambo icnuc aton dada uincuempanëdash.

¹⁹ Adash nidshun cuidquin uënës uampidon mayan uidënuaquin quënën sauedampicno nidshun Esusën abi uënës uabuedbëta abi uincuembued chuibampanëdash.

²⁰ Ëndenquimboshë aton matsesbëd tabadec Noe bëdambo icnubi aido Nuquin Papan Chiaid niacniacquec icsambuecshë tabadpampic. Noen cano dapa baded nacnenenquio yacpadembi: Ma ambi icsambuen naid ënshun ubi tantiabennu, queshun Nuquin Papan badedi cuidenquio icpampic. Adenquio icnubi cano dapa nainquin nacnenan ue sequec acte cubudtonoc matses 8tedpactsëc cano dapa antabëdtopampic.

²¹ Aid acte cubudnëdaid tantiaquin acten mentomete nec, quequin nuqui tantiec. Nëbi nuqui bëdambuen isquin mënchicaido icquin acten mentomec. ¿Nuquin dadan icquid bëchish ucquinda nuqui acten mentomedi? Padenquio. Nuquitedi acten mentomec Nuquin Papa naden chuiquin: Umbi icsambuen nabanaidtedi bëchish ucacbimbuen mibi tantiembique. Ubi bëdambuen ista, quequin acten mentomec. Aden abi tantiasho Nuquin Papan uincuenmenëdaid icquin Esuquidistun nuqui cuidmenquio iquec.

²² Aidi uincuenash abuc nidash Nuquin Papan dayun abiucquio tsadtuidpanëdash. Adash abitedishun Icbombo yampanëdash. Nuquin Papabëd icquidon chuiquid tapabëtan Mayan Icsa Satanasbëtan aton iua podobitsi icsabon chuiquid tapa icquin ambi chiacpadombuen abitedi namendac. Adquido icbuedombi abitedishun Icbombo icsho aidën chiacpadombuen naindac.