Petedo 1 2 - El Nuevo Testamento en matsés

Nuquin Papan Chiaid iste bunquiota, quiaid

¹ Nuquin Papan Chiaid tantiashi chieshëmënec tabadenda. Utsi mua uainda. Esus tantiaquid nebi, quiashi icsambuec tabadenda. Utsina isash adquid cuna nibëdec, quec chieshëmënec tabadenda. Utsibon icsambuen naiduidi chiec tabadenda.

² Adenquio yec tishac chucactsëc bacuëmpi shuma chishte bunquiacbimbuec Nuquin Papan Chiaid iste bunquiota. Bëdiactsëc tantiabuedi canidoacbimbuen aid isban isbanquin aidën chiacpadombuen natiadquio yanec Esus tantiaquidquio yanec aidbëd tabadtequid ictsiabi, queshun Nuquin Papan Chiaid isbanquiota.

³ Nuquin Icbo bëdambo iquec, quiash bëdambo iquebi, queshun Nuquin Papan Chiaid isbanta.

Buintadbimbuecquid Esus nec, quiaid

⁴ Shubu uanun buintad istuidash: Nëid bëdambo iqueque. Nëidquio nitsinembi, quiacbimbuen Nuquin Icbo uënëstiapimbocquid icsho tantiata. Adotiadquidi matses dadpenshunquio chieshëmpondash. Aidi Nuquin Papan tantiaidquio yec bëdamboshëcquidquio chopaccondash.

⁵ Aden Esus tantiaquido yec buintad tsasimbocquid yacbimbuecquido mibitedi nec. Adquid icsho Nuquin Papan aton shubun tabadtequido mibitedi icmendac. Adoac: Nuquin Papa bëdamboshë iqueque. Aidën chiacpadombuenuidi nate bunebi, queshun Esuquidistu uidtsëqui tantiec bëdambuec tabadquid mibi yanendac. Adsho isash nuadte bëda pichicasho shëdacbimbuec: Bëdambo iquec, quependac Nuquin Papa.

⁶ Adshumbic Nuquin Papan chuiquin dada uamiampid nad iquec: Buintad bëdambocquid istuidash nëidquio shubu uanun teshun nitsinembi, quiacbimbuen ambi tantiaidquio yec bëdamboshë icquid Edusaden yacno ubi bëdambuen ismequidquio isadaidbobëd tabadmendambi. Nëid tantiasho Nuquin Papan abi yacno nuqui tabadmendac, quequin aid tantiec uënësacsho ubi yacno tabadmendambi, quequin Nuquin Papan Ambi Chiaid dada uamepampic.

⁷ Aden Chiampid tantiaquin Esus tantiec: Aid bëdamboshëcquid nec, mibitedi quendac. Utsibombien aid tantienquio icquin chieshënendac. Ëndenquimbo adquid chuiquin Nuquin Papan naden dada uamiampid iquec: Buintad bëdambocquid istuidash: Nëidquio shubu uaquin nitsinnun tenu, quetiadquidi isuidposh. Aden isuidaidi utsin teshun shubu uaquin aidba nitsinaid iquendac, quequin Nuquin Papan dada uamepampic.

⁸ Adembidi naden chuiquin dada uamiampid iquec: Cute mabud iquec, quequin tantienquio yec nidec tocoshquetanec uebudendac, quequin Nuquin Papan dada uamepampic. Aido tocoshquetanec uebudacbimbuen Nuquin Papan Chiaid tantienquio yec cuidadtequid iquec abibi chian annëdënquiacno nidendac.

Nuquin Papan cun matses caido chiaid

⁹ Padnuen mibitedi Nuquin Papan: Cun matses nec, caido nec. Adquid icquin Nuquin Papa bëdambuen ismenuen nëish iua pichicaquidbimbuecquido mibitedi nec. Nuquin Papan chiacpadombuenuidi nate bunebi, quequin aid nashunquin: Nadquio Nuquin Papa iquec, quequin chuiquido mibi nec. Adquido yec Nuquin Papan iuabo mibitedi nec. Adquid icsho Ambi: Cun matses caido yec bëdamboshëcquido nec. Ënden Nuquin Papa tantiesa yec icsamboshë iccondaidi nëbi: Nuquin Papa bëdamboshë iquec, quequin paposhquiacbimbuecnuc tantiamequin mibitedi abi chuibanquido icmepondash.

¹⁰ Ënden mibitedi Nuquin Papan: Cun matses nec, cainquio icpondash. Adquid iccondaidi nëbi Nuquin Papan: Cun matses caido mibitedi nec. Ënden Nuquin Papan mibi bëdambuen istiapimbo icpanëdash. Adobuedëmbi nëbi mibitedi tantiaquin Nuquin Papan mibi bëdambuen isec.

II. ESUS TANTIAQUID ICQUIN NABANTE CHIAID ( 2.11—4.6 ) Bëdambuec tabadquin ismete chiaid

¹¹ Tantia, cun utsibo, umbi tantiaido icsho mibitedi chuinu. Nëid nidaidën iuec tabadtiapimbo icquido mibi nec. Adquid icnuc Esus tantiesabo abi icsate bunacpadec icsainda. Aden naic cuidadtequid yanmane, quiash bëdambuec tabadta.

¹² Nuquin Papa tantiesabobëd bëdambuec tabadta. Ma aidontsen: Tantiabennu, quiash adta. Adec mibitedi bëdambuec tabadsho issun mibi chieshënquin icsambuen chuishumbuedombi Nuquin Papa tantiabenshun naden chiendac: Papa, Mimbi tantiamiaido bëdambuec tabadsho issun mibi tantiabenombi, quequin Nuquin Papan matses abitedi chuimequin cuidte uëshëmbi aden chiendac.

Chuiquidon chiacpadombuen nate chiaid

¹³ Esus tantiaquid icquin: Cun Icbo Esus icsambuen chuishunnushe, queshun matsesën chuiquidtedishun chiacpadombuen nata. Aden nuquin matses iuaquido Doma yacnocquidon chuiquid tapanquio empedadod caidën chiacpadombuen nata.

¹⁴ Aidën: Mibitsen matsesën chuiquid icta, caidon chiacpadombuentsen nata. Aido: Icsambuen nasho issun cuidquid neque. Adecbidi bëdambuec tabadsho issun: Bëdambocquid nec, caquid neque. Aidën chiacpadombuen nata.

¹⁵ Nuquin Papa mibitedi bëdambuen naic tabadmete bunquid nec. Adquid icsho tantiesabo icquin mibitedi icsambuen chuishunte bumbuedombi mibi icsambuen chuishunenquio iquendac.

¹⁶ Mayan Icsa Satanasën iuaido icsho Esusën bedshunaid yec nëbi Satanasën iuaidpenquio mibi nec. Adquid yequi icsanuec: Ubi bunaiduidi naimbi, quenda. Nuquin Papan iuabo yec bëdambuec tabadta.

¹⁷ Matses abitedi bëdambuen ista. Mibëtan Esus tantiaquido tantiaquiota. Nuquin Papa bëdamboshë iquec, quequin aid tantiec bëdambuec tabadta. Nuquin matses iuaquid chuiquid tapambo empededod caid bëdambuen isquin aidën chiacpadombuen nabanta.

Matses iuabon nate chiaid

¹⁸ Tantia, matses iuabo. Esus tantiaquid icsho mibitedi chuinu. Mibi iuaquidën chiacpadombuen nata. Mibi iuaquid mibi tantiaquid yec bëdambocquid icnuc adota. Mibi iuaquid icsambo icquid icnubi adembidi nata.

¹⁹ Adec Nuquin Papa tantiaquid yec bëdambocquid icsho cuesaqui chieshëmënenquio icsho: Aid iua bëdambo iquec, quequin Nuquin Papan mibitedi bëdambuen istsiashe. Mibi iuaquidën chiacpadombuen nata.

²⁰ ¿Icsambuen nasho natiamequin cuesac chieshtoenquio icshoda Nuquin Papan: Aid iua bëdambo iquec, capatsiash? Padenquio. Nuquin Papan chiacpaden bëdambuen naquid natiamequin cuesaqui chieshtoenquio icsho: Aid iua bëdambocquid nec, caindac Nuquin Papan.

²¹ Tantia, mibitedi chuinu. Icsambuen nambo icshobi Esuquidistu chieshënquin natiamiac mibitedi tantiec mëyamëdpondash. Ma umbi adomiaid tantiasho chieshënquin natiamiaqui ma chieshtoenquio icnu, queshun Nuquin Papan mibi Esus tantiamepanëdash.

²² Esuquidistu muesambo yec icsambuen naisambo nepondash.

²³ Adquid icsho abi chieshënquidon mamënshunaqui cuidquin chushcainquio icpanëdash. Aidon natiamequin mëyanaqui: Mibitsen cuidendambi, cainquio icpanëdash. Adenquio yec nadpanëdash: Nuquin Papan matsesën naidtedi tantiaquid icquin bëdambocquido abëdi tabadmequin icsambocquido cuidquin chian annëdënquiacno ma nidmepanu, quiash chieshëmënenquio icpanëdash.

²⁴ Esuquidistu nuqui icsaid bedshunash abided cuidadec cueste napotiaidën diadec uënëspondash. Nuquitedi icsaquido icbuedi ma icsaid ënash bëdambuec tabadnu, quiash uënëspondash. Adecbidi abi tantiaquido bëdambuen isnuec Esuquidistu mëyamëdpondash.

²⁵ Ënden mibitedi obeca nëish iua bënnudacbimbuec tabadpondac. Adquid icbuedi nëbi mibitedi icbon aton iua istuidshun dayun uacbimbuen abi tantiasho Esuquidistun bëdambuen isquin dayun uaindac.