Petedo 1 1 - El Nuevo Testamento en matsés

Mibi tantiembi, quequin chiaid

¹ Petedo nebi. Esuquidistun: Ubi chuibenneta, caidquio nebi. Esus tantiaquido icquin mimbi iste dada uanu. Isadaidbo icsho nuquin nidaidënshun ënden cuenmenëdac maismaisnëdash nëidtedi nidaid cuëshë yacno mibitedi tabadec. Nëidic Ponto yacno. Utsibic Cadasia yacno. Utsibic Capadosia yacno. Utsibic Asia yacno. Utsibic Bitinia yacno quec tabadec. Aidtedi yacno tabadquidon iste nëid dada uaic nebi.

² Ëndenquimbo Nuquin Papa: Umbi tantiactedi ubi tantiaquid icmendambi, quepampic. Nëbi ambi tantiampicpadombuen aton Mayanën tantiamiac: Aidën chiacpadombuen nate bunebi, quec mibi bëdambuec tabadte bunendac. Icsambuen naquid icsho cuidmenquio icnuec abided cuidadec intac chididiquec uënësondaid Esuquidistun Nuquin Papa bëdambuen ismequin bëdambuec tabadquid ma mibitedi icmepanuna.

Esus tantiaquidon Nuquin Papan naid chiec cuëdënte chiaid

³ Nuquin Papa, Nuquin Icbo Esuquidistun Papa, bëdamboshë iquec, canuna naden tantiaquin: Icsambuen naquido cuidte bunenquio icquin uincuenmequin chuca nuqui icmenuen Nuquin Papan abided cuidadec uënësaid Esus nuqui tantiamiondash. Adoac nuqui naden tantiec: Esuquidistu uënësacsho chococac uincuenash padpidec uënëstiapimbo iquendac. Adembidi Esus tantiec uënësacsho uincuenmeshun Nuquin Papan abi yacno nuqui tabadmendac padpidec uënëstiapimbo icnuc.

⁴ Ambi chiampicpadombuen bëdamboshë yacno Esusbëdquio ubi tabadmendac. Uënëstequid nibëdec icsabudtequid nibëdec, chodquetequid nibëdec quiacnombo Esusbëdquio abuc ubi tabadmendac, quequin nuqui tantiec.

⁵ Aden Nuquin Papa tantiaquidombo icsho isash: Aid tantienquio yannushe, quiash nadatiambocquin nabanquid icquin Nuquin Papan nuquitedi dayunuaic: Abitedimbo cuidquin chuibante uëshëmbi Esusën bedtanacsho: Ubi yacno tabadmendambi, quequin Nuquin Papan nuqui dayun uaindac.

⁶ Umbi aden chuisho tantiash mibitedi cuishonquendac. Esus tantiesabon natiamequin chieshënac natiec shubitiadquio icbuedi mibitedi bëdambo yanendac. Nuquin Papabëd tabadtequid nebi, quec natienquio mibi iquendac.

⁷ Esus tantiaquid nebi, quequin mimbi tantiaid matses bedte bunaidquio odo caid shocosh bëshpiu bëshpiucquidbimbuecquid nec. Aidquiobida neque. Isnu, queshun icbon cute nëdëncadoshon pichicaquin aid shocosh tauiquin tanec. Adembidi: Esus tantiaquidquiobida neque. Isnu, queshun Nuquin Papan utsi utsien natiamendac. Aden natiamiaqui chieshtoenquio icquin tantiaquid icsho Esuquidistun padpidec choshon: Mibi bëdambocquid neque. Ubëdi tabadec cho, quequin utsibo tantiamequin chuishun abi yacno buanendac.

⁸ Aden mimbi isacmaidi Esuquidistu tantiaquido mibitedi nec. Nëbi aid isambo icquimbi mimbi tantiaquiec. Adash utsibon tantiatiapimbo icnuc mibi cumapenquiec cuishonquendac.

⁹ Adec cuishonquec mibitedi: Esusën abi yacno ubi iuedendac, quequin aid tantiec mibi cuishonquequiendac.

¹⁰ Ëndenquimboshë Nuquin Papan tantiamiac: Naden naindambi, quequin chiaid ambi oncamiaidon Esusën matses cuidmenquio icquin Nuquin Papabëd tabadmete chuiquin dada uapampic. Abitedi tantienquio icquin daëdpactsëc tantiaquin Nuquin Papa tantiaquidquio icquin ¿Mitsipadquidquio matses cuidmenquiocquid chomepec? quequin tantiaquin chuidennepampic.

¹¹ Esuquidistu choabi icnuc Aidën Mayanën tantiamiac aidon naden chuipampic: Nidaidën choacsho matsesën chieshënquin natiamequin uënës uaindac. Aden uënës uacsho uincuenmiac bëdamboshëcquid yec abitedishun Icbombo icuaindac, quequin Esusën nate chuipampic. Aden chuiquin: ¿Tedtsi yash chopec? ¿Mitsiuëshquio chopec? quequin tantiate bunquiopampic.

¹² Naden Nuquin Papan tantiamepampic: Mibitedi nibëdanan umbi chuibued umbi cun matses caid icsho utsibon isendac, quequin Esus chote chuipampic. Aden chiampicpadec choshon Esusën chuibampondash. Adembidi nëbi Nuquin Papan abucshun chomiac aton Mayan Bëdan nadatiambocquin tantiamiacpadombuen Esus chuibennequidon aidën naid mibitedi chuibampanëdash. Aden chuibanaid icnuc Nuquin Papabëd icquidotsen Esusën naid tantiate buncuededec.

I. ESUS TANTIEC BËDAMBUEC TABADTE ( 1.13—2.10 )

¹³ Aden umbi chuibued tantiashun Esus tantiaquido icquin bëdambuen chiaidquio tantiata. Mibi icsate bunacpadec icsainquio yec tabadta. Nuquin Papa bëdamboshëcquid icquin abi yacno tabadmenuen: Bedtan, cac Esuquidistun chouashun abi tantiaquido beduanendac, quequin ënenquio icquin tantiata.

Nuquin Papan tantiamiacpadec bëdambuec tabadte chiaid

¹⁴ Ënden Nuquin Papa tantiabenabi yec mibi bunacpaden naic mibitedi icsanëdacpadec icsainda. Nuquin Papan: Cun mado nec. Cun champi nec, caido icquin Aidën chiacpadombuen naic tabadta.

¹⁵ Mibi tantiamequid icsaisambo Nuquin Papa neque. Aidën chiaid niaquenquio yec bëdambuecshë tabadta.

¹⁶ Nuquin Papan naden chuiquin dada uamiampid iquec: Icsaisambo nebique. Mibitedi icsainquio yec bëdambuecshë tabadta.

¹⁷ Mibitedishun Papa quequin chianniaid Nuquin Papa matsesën naidtedi tantiaquid icquin: Nëid bëdambocquid nec. Nëid icsambocquid nec, quequin ambi naid abitedi chuibanquin matses cuidquidquio nec. Adquid icsho uënësabi yec nidaidën tabadquin: Mibi bëdamboshëcquid nec, Papa, quequin Nuquin Papa ënenquio icquin tantiata.

¹⁸ Min tsusedpabon chiaiduidi naquin Nuquin Papa tantienquio mibitedi tabadpondac. Aden naquid icsho Nuquin Papan mibitedi bëdambuen istiapimbo icpanëdash. Aden icsambuen naic tabadsho issun mibitedi ¿bedshunnuenda odobëta shocosh ushu Nuquin Papan menepanëdash? Padenquio. Adquid chunidec icsatequid menenquio icquin

¹⁹ Esuquidistu icsaisambo icshobi chieshënquin nëish iua obeca bëdambocquid cuessunniacbimbuec matses abitedi cuidmenquio icnuec cueste napotiaidën dectanac abided cuidadec intac chididiquec uënësaidquio mibitedi tantiamepanëdash.

²⁰ Ëndenquimboshë abitedi uabi yequi Nuquin Papa nadpampic: Umbi tantiacpadën matsesash matses cuidmenquio icnuec mibided cuidadec mibi uënësendac, quequin Esuquidistu chuipampic. Aden ambi chiampicpadombuen cuidadmeshun nëbi Esus tantiasho mibitedi bëdambuen isec.

²¹ Aden abi tantiasho Esuquidistunuidtsëqui Nuquin Papa mibitedi tantiamec. Adoac mimbi naden tantiec: Esus uënësacsho uincuenmeshun abëdi tabadmequin abitedishun Icbombo Nuquin Papan icmepanëdash. Ambi tantiacpadombuen naquidquio Nuquin Papa nec, quequin mimbi tantiec.

²² Nëbi mibitedi ambi chiacpadec tabadquin ambi Chiaidquio tantiasho Nuquin Papan bëdambuen isaid yec bëdambocquid yanshun mibëtan Esus tantiaquido utsibo mimbi tantiaquiec. Adecbidi mua uananenquio yec utsibobëd tantiananquiota.

Nuquin Papan chucauaido mibitedi nec.

²³ Ambi chiaidquio tantiamequin chucauaido mibitedi nec. Dadan chudac bacuë usundoshon tishac chuca uaid ictiapimbo yec uënëstequid icnuc Nuquin Papan chucauaido mibitedi nec. Aden mibi chuca uaquid Nuquin Papa nibëdantiapimbo icquid icnuc ambi Chiaid adecbidi bënnudtiapimbo iquec.

²⁴ Nuquin Papan chuiquin dada uamiampid nad iquec: Matses abitedi uasimbimbuecquid nec. Adecbidi matsesën: Cunatedi bëdamboshëcquid nec, caidi cute bacuëec bëdambo isadacbimbuecquid nec. Cute bacuëec tuashquiaid bëdamboshë isadbuedi tididiquiash badedquio chodquequid nec.

²⁵ Padnuen Nuquin Papan Chiaid nibëdantiapimbo icquid yec ucudtiapimbo icquid nec, quequin abimbo chuipampic. Aidën Chiaid Bëda Esusën naid mibitedi tantiamequin chuibampanëdash.