Mateo 8 - El Nuevo Testamento en matsés

IV. ESUSËN NADATIAMBOCQUIN NABANAID ( 8.1—9.38 ) Esusën daicsaid bëdanmiaid

¹ Ambobi macuësh poctse tsadquin ënquin chuibantanequien Esus macuësh budpanëdash. Adec budanec nidsho issun matses dadpenshun tsibanampanëdash.

² Adnubien dada aton dada daush daushpambo yec daicsaidquio choquin Esus ismec dannëshën tinquebudec shuebudshun chiec: Ubi bëdanmete bunquin mimbi ubi bëdanmetsiaque. Ubi bëdanme, Icbo, caquien

³ Esus: Ai, mibi bëdanmete bunebi, quequin mishtemaidquiobi mishnubi badedquio bëdampanëdash daicsaid nibëdquio yanec.

⁴ Aden bëdanmetanquin Esusën: Umbi mibi bëdanmebued utsibo chuibanenda. Adenquio icquin nëish iua cuessunneshun pichicaquid yacno nidshun min dada ismeta. Adembidi Moisesën chiampicpadombuen nanuen Nuquin Papa ismetequid buanec nidta. Ma adosho issun nëish iua pichicaquidon: Aton dada daush daushpambo yec daicsaidquio icbuedi bëdanmiaid nec, quequin ma tantiapanu, quequin Esusën chuipanëdash.

Doma yacnocquidon sondadon chuiquid tapan iua Esusën bëdanmiaid

⁵ Shubu dadpen icquid Capednaun yacno nidash Esus tabadpanëdash. Adnubien Doma yacnoquid sondadon chuiquid tapa capitan caidën naden Esus chuituidpanëdash:

⁶ Icbo, cun shubun icquid cun iua natiambo yec shëquëquenquio iccosh,

⁷ quesho tantiashun: Ai, bëdanmec nidnunid, caquien

⁸ sondadon chuiquid capitanën: Padi, Icbo. Mibi bëdamboshë icquidquio nec. Ubi icsambocquid icquin mibi cun shubun puduedmetiapimbo iquebique. Nidenquio icquin nëshunquiobi mimbi tantiacpadombuen chuiquin: Bëdanta, cac cun iua bëdantsiashe, Bëdanmeta.

⁹ Ubibic cun chuiquid tapan namiaid icquin sondado utsibo namequid nebi. Umbi: Baded nid, cac badedi nidec. Umbi: Baded cho, cac badedquio choec. Cun iuan umbi: Nata, cac umbi chiacpadombuen naic. Mibi adquidquiobidi neque. Cun iua bëdanmeta, quepanëdash sondadon chuiquid tapa.

¹⁰ Adsho tantiashun Esusën abi tsibambëquido naden chuipanëdash: Bëdambuen tantiaquin nëidën chuipec. Nëidën: Chuiquinuidtsëqui cun iua bëdanmetsiash, quequin ubi bëdambuen tantiaquid nec. Aidpadquid isadaidbo nibëdec.

¹¹ Tantia. Chuinu. Matses utsi icquimbi sondadon chuiquid tapan ubi tantiec. Adec nidaid utsi utsiec yacnocquido isadaidpembo ubi tantiaquido yanash uëshë choacmiuësh choec Nuquin Papan namiacno puduedtequid iquendac. Adecbidi uëshë nidacmiuësh choec puduedtequid icuaindac. Adash isadaidbon tsusedpabo Abadauan yec Isac yec Acobo yec quec aidobëd pec tabadendac.

¹² Padnuen isadaidbo dadpenquio Nuquin Papan namiacno tabadtiadquidi puduedtiapimbo iquendac. Aido abi tantiesabo icsho chian annëdënquiacno nësecac mëyadec shëta chëquëdëshquec natiaquiec shubiquiendac, quequin Esusën chuipanëdash.

¹³ Adshumbic sondadon chuiquid tapa chuiquin: Min shubuno nidec nid. Mimbi tantiacpadquiequi min iua bëdanaque, cac nidshun Esusën chuibocpadënquio aton iua bëdanacsho istuidpanëdash.

Petedon nachi Esusën bëdanmiaid

¹⁴ Adtanec Esus Petedon shubu yacno nidec puduedpanëdash. Puduedshun isaquien Petedon nachi nëncuenash chumbo yec ueten uepec.

¹⁵ Adec uesho istuidshun mëdante mëmishquin Esusën bëdanmepanëdash. Aden bëdanmiac dauebudec bëdanshun Esus pemequin nashumpanëdash.

Esusën matses dadpen bëdanmiaid

¹⁶ Adnubien aid inchëshbudtsëqui: Esus ismenu, quequin podobitsi icsa dapuduedaido dadpen bëbëshobien podobitsi icsa dapuduedaido caic: Dapuduen, quequin dapuduenmebanshumbic daicsaidobëta nënquidotsen Esusën bëdanmebampanëdash.

¹⁷ Daicsaidobëta nënquido bëdanmendac, quequin ëndenquimboshë Nuquin Papan Esusën nate chuiquin ambi oncamiaid Isayas dada uamepampicpadombuen napanëdash Esusën. Naden chuipampic: Nuqui daicsaidbëta nuqui nënaid bedshunquin bëdanmendac, quequin chuipampic Isayasën.

Abëd icte bunquido Esusën chiaid

¹⁸ Adashic abi isnuec chochoash matses dadpenquio datsidadsho isash abëd icquido chiec: Chian potec nidnunid, quianec chian yacno nidec Esus puduampanëdash.

¹⁹ Puduanec nidanneshobien Moisesën chiampid tantiamequidën Esus chinunshun naden chuipanëdash: Tantiamequid, mibi nidacnombobi nidec mibëd nidebi, caquien

²⁰ Esusën: Tantia. Mibi chuinu. Bëdi chëshë aton shëcuën ushquid. Uicchun aton shubu uash abuc ushquid. Padnueni Matsesën Tishaid yequi cun shubu nibëdnuc ubi ushte nibëdec, capanëdash.

²¹ Adshobien abëd capucuennequid utsin: Chiatacqui, Icbo. Cun pa uënësaccoshe. Chococatambono, caquien:

²² Padi icnuna. Ma uënësacbimbuen ubi tantienquio icquidon ma uënësaid chococanu. Mibi ubëd iquec cho, cabidanec Esus chian yacno nidannepanëdash.

Natiambo cunquenuc acte bocquequid Esusën ënëdmiaid

²³ Adec chian budash Esus abëd icquidobëd cano antabëdtoanec nidpanëdash.

²⁴ Aden potec nidec nënantanquio yannubi cunquequid tapa cumapenec cunquetuidnuc acte cumapenec bocquiampanëdash. Adec acte bocquenuc cano acte ancushad ancushadquiec yannuc cano mentoadtiadtsëcquio icpanëdash. Adsho issun Esus chiec nidshun abëd icquidon: Dacuëdampambo iquec, quetanquin isaquien Esus ushpec.

²⁵ Adshobien tinquin: Nuqui mentoadeque. Isucunshun ubitedi acten mentomenda, Icbo, caquien:

²⁶ ¿Atotsi quiash natiec dacuëdcuedede? Ubi bëdiactsëc tantiaquido mibitedi nec, quetanec nidtoshon cunquequidbëtabi acte chiec: Padi. Ënëd, caquien natiambo cunquebuedi badedquio ënëdpanëdash. Adecbidi actetsen bocquenquio yampanëdash.

²⁷ Adsho isashien tantiadempambo yec tabadec: ¿Mitsipadquidënquio nac ambi chiacpadec actebëd cunquequid badedquio ënëdposhba? quecuededpanëdash abëd icquido.

Dada daëd podobitsi icsabo dapuduedaid Esusën dapuduenmiaid

²⁸ Aden chian potiash pudundonobien nidaid Cadada yacnocquid podobitsi icsa dapuduedaid dada daëd choec Esusën dayun chopanëdash. Aid daëdi uënësaido chococaid shëcuëmbi tabadec uidënquiocquido nepanëdash. Matses cuessunnete bunquiec dacuëdampambo icsho isash aid podquiedën matses capuenquio icpanëdash.

²⁹ Aidon podobitsi icsabon oncamiacpadombuen cumapenec cuëdquin Esus naden chuipanëdash: ¿Atotsi ubitedi canuec ne? ¿Nuquin Papan Madombo icquin ubi natiamequin cuidnuecta cho? ¿Nuquin Papan abitedi cuidte uëshë choabi icnubida ubitedi cuide? capanëdash podobitsi icsabon oncamiac.

³⁰ Ambobi uannopactsëc chanchu dadpenshun natiacquin udquin pebededec tabadpanëdash.

³¹ Adnubien podobitsi icsabon aid dada daëd oncameuac: Ubitedi cuenmequin chanchon dadan icbo icbuen dapuduedme, quecuededpanëdash podobitsi icsabo.

³² Adsho tantiashun Esusën: Ai, mimbi tantiacpadec nid, cac nidash chanchon dadan icbo icboec dapuduednuc niquianec abucquio quiusudacnouësh chian nëpaëdbudnec mentoadbudnepanëdash chanchu nibëdquio yec.

³³ Adsho istanequien chanchu pemequin isquido aton matses chiec titinquianec shubu dadpen yacno nidannepanëdash. Ambo nidshun chanchu mentoadbudnebuedbëta podobitsi icsabo dapuduenmebued uesquin chuituidpanëdash. Nuqui dacuëdëmbuedobi bëdambo yanosh, quequin chuituidpanëdash.

³⁴ Adoaquien ambocquido abitedi Esus isec chochopanëdash. Adec chochoshombien: Dacuëdampambo mibi iqueque. Nëmbo iquenquio yec nidec nid, cabededac Esus nidpanëdash.