Mateo 25 - El Nuevo Testamento en matsés

Utsi chiacbimbuen chido 10ted icquid chiaid

¹ Adshumbic Esusën utsi chiacbimbuen chuiquin Nuquin Papan namiacnouësh abi chote uëshë tantienquio icte chuipondash: Tantia. Mibitedi chuinu. Chidon dadan bedabicquido 10tedshun: Aton chido bedtanec choquid bëquedtannu, queshun aton tabote bëchin taboadquid icbo icbuen buannuen sanambededposh.

² Aid chidobo 5ted tantienquio icquido icnubi 5tedbidi bëdambuen tantiaquido icposh.

³ Tantienquio icquidon tabote bëchi naimëdsho cushtonon buanambobi bëchi uesadbudtsaidi sananquin caimposh.

⁴ Padnuen bëdambuen tantiaquidon: Naimëdsho cushtono, queshun tabotebëta sedunten bëchi cushtoaid sananquin caimposh.

⁵ Aden cainaqui: Chido bedtannu, quianec nidbued choenquio icsho isash abitedi ushcastoash ushtocuededposh.

⁶ Adshumbic inchësh poctsenquio cuëntuidsho tantiashun: Choeque. Baded bëquednu nid, caquien isucunshun bëdambuen tantiaquidon ambi bëbued bëchi cushtonobien

⁷ isucunshun chido utsibon tabonoen tabote nacnembededposh.

⁸ Icsambuen tantiaquidotedishun: Bëchi bec cho. Cuna naimëdeque, caquien

⁹ bëchi bëbuedën: Padi. Mibi meniac cuna uesadtsiashe. Aid uesadan shubun puduedabi nuquitedi inchëshquiocnoc nidenquio ictsiaque. Piucquid menequin bëchi cushtoquid yano nidshun baded cushtometan, caposh.

¹⁰ Adoac bëchi bedec nidambien chido bedtanec dada choposh. Chosho isash bëdambuen tantiaquido aton tabote taboshon chido bedtanec choquid bëquedash aidobëd nidposh. Adash puduedshun puduedtiapimbo icnuc shëcuë bëtashte shëcnandoposh.

¹¹ Adnubien bëdambuen tantienquio icbuedo bëchi bedtanec chochoposh. Chochoshon shëcuë shëcnandoacsho istuidshun: Shëcuë shëcne, buchi. Ubitedi puduednu,

¹² caquien chido bedquidën: Padi. Umbi isacmaidombo mibitedi nec, caposh.

¹³ Umbi chuibued tantiashun chido icsambuen tantiaquido tanenda. Ubi chote uëshë tantiadenquio icnuc: ¿Nëbida cun Icbo chopeba? quequin ubi bëdambuen tantiec umbi chiacpadec bëdambuec tabadta, quepondash Esus abëd icquido chiec.

Utsi chiacbimbuen aton icbon piucquid daëd uate chiaid

¹⁴ Adshumbic Nuquin Papan namiacnoshon bëdambuen nate tantiamenuen Esusën utsi chiacbimbuen chuiuapondash. Nidaid utsi yacno nidnun aton piucquid dadpen dayun uaquidën aton iuabo chochomeshun: Ubi piucquid daëd uashunta, quequin chuiposh.

¹⁵ Nëidën bëdambuen tantiaquid icquin cun piucquid ubi daëd uashuntsiash, queshun aton iua piucquid 5 midted meneposh. Adshumbic utsitsen 2 midted meneposh. Adshumbic utsi un midtedi meneposh. Aden menianec icbo uanno nidposh.

¹⁶ Adnubien piucquid 5midted bedbuedën aton matsesën nacpadombuen piucquid daëd uanuen utsibo menequin iuecshun ambi meniondaid daëd uaid beduaposh. 5midted iccondaidi 5midtedbidi beduaposh 10midted icnuc.

¹⁷ Adembidi piucquid 2midted meniondaidën 2midbidi daëd uaposh 4midted icnuc.

¹⁸ Padnuen un midted menebuedën chieshquin aid daëd uainquio icquin ambi uëdëshcaid shëcuën nauedquin piucquid un midtedtsëqui ompoposh.

¹⁹ Iuecquio ictanniash choshombien icbon ambi piucquid meniondaido aton iuabo chuituidposh. ¿Atotsi nao? caquien

²⁰ ambi 5midted meniondaidën: Is icbo. Mimbi ubi meniondaidtedbidi daëd uaombique. Nëbi mitsana 10midted iquec, caquien

²¹ icbon: Ai, cun iua bëdambocquid mibi nec. Umbi daëdpactsëc meniondaidi daëd uaquin umbi chiacpadombuen mimbi bëdambuen nac. Nëbi dadpen namequid icta. Ubëd cuishonquec tabadec cho, caposh.

²² Adnubien aton iua ambi piucquid 2midted meniondaid choshon: Is, icbo. Mimbi 2midted meniondaid daëd uaombi. Nëbi mitsana 4midted iquec, caquien

²³ icbon: Ai, cun iua bëdambocquid mibi nec. Umbi chiacpadombuen naquin mimbi cuna daëduaque. Nëbi mibitsen dadpen namequid icta. Mibitsen ubëd cuishonquec tabadec cho, caposh.

²⁴ Adnubien piucquid un midted meniondaidtsen choshon: Icbo, utsinabëta mimbi nitsinacmaid utsina bedbanquid mibi icsho isash: Chushcanushe, quiash dacuëdec tsadtenniobi.

²⁵ Adec dacuëdampambo icquid icsho mibi dacuëdënquin mimbi meniondaidted piucquid ompoquin chococaondambi. Në mimbi meniondaidtedtsëqui bëombi, caquien

²⁶ icbon: Cun iua icsambocquid yec chieshquidquio mibi nec. Umbi chiacpadombuen nambo mimbi iquec. Ubi caic: Ancanquidquio icquin ubi chushcanushe, queshun

²⁷ nuquin matsesën nacpadombuen umbi meniondaid piucquid sauedte yacno nidshun ¿atotsi queshun nauedtanenquio icco? Adoacsho choshon aid daëd uaquin sanaid bedtsenombi, caposh.

²⁸ Adshumbic aton iua utsi chuiquin: Chieshquidëna bedshuntanquin piucquid 10midted dayun uaquid mene, cac meneposh.

²⁹ Naden naimbi. Umbi chiacpaden naquin daëd uacsho issun atona daëd uaquin menendambi, queposh aton icbo. Adoshombic umbi chiaid tantiesa icquin chieshquin daëd uambocsho issun umbi menebued bedshunendambi, queposh aton icbo.

³⁰ Aid iua tantiesa yec chieshquid icsho cuidquin inchëshquio yacno netan cac netanac natiaquiec shëta chëquëdëshquequiec shubiquiendac, quepondash Esus.

Matses abitedishun naid cuidnun chuite chiaid

³¹ Adshumbic Esusën padpiden abi chote chuiuapondash: Matsesën Tishaid yec abi yacnouësh abëd icquidobëd choec: Abitedishun Icbombueni nec, quiash bëchamauampambuec choequi cun tsadte dapa bëdamboshëcquidën tsadtoquin abitedimbo ismendambi.

³² Adshumbic matses abitedimbo chochomequin datsidadmendambi. Aton icbon nëish iua obecabëta cabada tsinacacbimbuen naindambi:

³³ Matsesën aton nëish iua obeca abiuc tsaduntanquimbi copioc cabada tsadunendac. Adombuen naindambi.

³⁴ Adshumbic Abitedishun Icbombo icquin abiuc icquido ubi tantiaquido naden chiendambi: Cun Pan mibi bëdambo icmiaido neque. Ubëdi tabadec cho. Matses uabi yec ëndenquimboshë mibitedi caic: Aido ubi tantiaquido icmeshun ubëdi bëdamboshë yacno tabadmendambi, quequin Cun Pan tantiamiaido yec ambi namiacno ubëdi bëdambuec tabadec cho, caindambi, quepondash Esus.

³⁵ Adshumbic naden chiendambi: Mimbi ubi bundoacsho pemedennec. Acte bundoacsho adembidi mimbi ubi acmedennec. Mimbi isacmaidquio icshobi mimbi min shubun ubi iuedtednec.

³⁶ Cun dashcute nibëdsho mimbi ubi dashcute menedennec. Nëncuenash uënëstiadtsëcquio icsho ubi tantiec mibi datsadtennec. Quënën tsadunac tsadsho mimbi ubi istandennec, caindambi.

³⁷ Adoaquien ubi tantiec bëdambuec tabadquidon: Tantiadenquio icnuc mimbi chuipec, icbo. ¿Bundoacshodambi mibi pemedionda? Mambi mibi pemiambo iqueyoc. Mambi mibi acte bundoacsho acmiambo iqueyoc.

³⁸ ¿Umbi isacmaidquio icshodambi mibi iuedtionda? Mambi padambo iqueyoc. ¿Dashcute nibëdshodambi mibi menedionda? Mambi padambo iqueyoc.

³⁹ ¿Mibi nënec uënëstiadtsëcquio icsho isashtabi mibi datsadtionda? ¿Quënën tsadunac tsadshodambi mibi istanionda? Mimbi tantiadenquio icnuc chuipec, quequin ubi chiendac.

⁴⁰ Adoac naden abitedishun Icbombo icquin chiendambi: Tantia. Mibitedi chuinu. Umbi chiacpadombuen atona nibëdquido utsibon bëdambuen istiapimbocquido mimbi nashundednec. Aden ubi nashunacbimbuembi mimbi aido nashundedneque. Ubëdi tabadec cho, caindambi.

⁴¹ Adoshombic Abitedishun Icbombo icquin ubi tantiesabo yec cun copioc tabadquidotsen naden chiendambi: Nuquin Papan cuidtequido icquin mibi icsaid ënte bunenquio icbuedo mibitedi neque. Nuquin Papan Mayan Icsa Satanasbëta podobitsi icsabo cuidacno ënëdenquio yec chian annëdënquiacno nid, caindambi.

⁴² Bundoacsho mimbi ubi pemenquio ictennec. Acte bundoacsho mimbi ubi acmenquio ictennec.

⁴³ Mimbi isacmaid icshobi mimbi ubi iuedenquio icquin cacunmedennec. Dashcute nibëdsho issun mimbi ubi menenquio ictennec. Nënsho isash mibi ubi datsadenquio ictennec. Quënën tsadunac tsadsho mimbi ubi istannenquio ictennec, caindambi.

⁴⁴ Aden chiaquien: Tantiadenquiocnoc mimbi chiec. Pete bundopash, quequin tantienquio iccondambi. Acte bundopash, quequin tantienquio iccondambi. Umbi isacmaid icshobi mibi isambo iquembi. Min dashcute nibëdsho mibi isambo iquembi. Mibi nënsho isambo iquembi. Mibi quënën tsadunaid tantiambo iquembi. Tantiadenquio icnuc mimbi chuipec, quequin ubi tantiesabon chiendac.

⁴⁵ Adoac naden chiendambi: Atona nibëdquido nashunenquio icquin ubibi nashunenquio yacbimbuen umbi chiacpadombuen naisabo mibitedi neque. Nuquin Papan icsaido cuidacno nid, caindambi.

⁴⁶ Adoac aido icsambuec tabadquido ënenquio icquin cuidacnombo nidnubi bëdambuec tabadquido Nuquin Papa yacno ënëdenquio yec tabadendac, quequin Esusën chuipondash.