Mateo 24 - El Nuevo Testamento en matsés

XI. NUQUIN PAPAN ABITEDIMBO NIBËDAMETE ESUSËN CHUIBANAID ( 24.1—25.46 ) Nuquin Papa tabadte shubu dapa chic chicte chiaid

¹ Adash Nuquin Papa tabadte shubu dapa daquënë uaid yacnouësh puduenanec Esus nidsho istanec choshon abëd icquidon: En is, Icbo. Nuquin Papa tabadte shubu dapa bëdambuen nacnenaidquio iqueque, capondash.

² Adsho tantiashumbien Esusën: Abimbo chuinu. Tantia. Mimbi isaidquio cuënote bëdambuen nacnenaid matses utsibon nibëdquio icnuc chic chiquendac, capondash.

Nuquin Papan cuidte uëshë yannuc icte chiaid

³ Adanec nidequi macuësh Odibos caid yacno poctsebi tsadtuidshun abëd icquido choshon utsibo tantiamenquio icquin Esus naden chuipondash: Mimbi chuibued ¿tedictsishun chicchicpec? Nëbi choec, quequin mibi chote ¿mitsipadembimbi tantiapatsia? Adembidi ¿atotsi isashini: Nuquin Papan abitedimbo cuidte nëbi yanec, quepatsia? En chui. Tantianu, capondash abëd icquidon.

⁴ Adoaquien Esusën naden chuipondash: Tantia. Mibitedi chuinu. Muaquidoba choendac. Aido choshon chuisho tantiash: Abimbuen cachitec, quec mua uadenda.

⁵ Adquido chochoshon: Nuquin Papan Chomiaidquio Quidistu caid Mesias nebi, quequin muaquin chiaqui matses dadpenshun: Ai, abimbuen mimbi caic, capendac.

⁶ Ubi choabi icnuc: Matses dadpenquio cuesnan cuesnannubi nidaid utsi utsiec yacnouësh cuesnantiadpambo tabadac caosh, quequin chuisho mibitedishun tantiendac. Adsho tantiash dacuëdenda. Nuquin Papan matses abitedi cuidte uëshë choabi icnuc ambi tantiacpadec matses adonanendac.

⁷ Adec matses utsi dadpen icquido matses utsibobëd cuesnanendac. Nidaid utsin icquidon nidaid utsin icquidobëd cuesnanendac. Nidaid utsi utsiec yacno pete nibëdnuc bunquiote iquendac. Nidaid utsi utsiec yacno nidaid cumapenec ishcudtednendac.

⁸ Adsho issun chido bacuë nëncuenacbimbuec nëbi matses abitedi natiametequid yanec, quequin tantiata, quepondash Esus.

⁹ Adashic abi onquec: Umbi chiacpadquio yannuc chieshëmënquidon ubi tantiaquid icsho mibitedi bedshun utsi utsien mëyanmendac. Utsi utsien cuessunnemendac. Aden nidaid utsi utsiec yacno tabadquido dadpenshun ubi tantiaquido icsho chieshënquiendac.

¹⁰ Adoac ubi tantiaquido icbuedombi chieshtoshon ubi tantienquio yanendac. Adshun ubi tantiaquid ompodacsho bedmeshun mëyanmendac. Adec dadpen chieshëmëdendac.

¹¹ Adnubien muaquido dadpen yanash: Nuquin Papan oncamiaidquio nebique. Tantia. Chuinu, quependac. Adsho tantiashun dadpenshun: Ai, abimbo mimbi chiec, caindac.

¹² Matses dadpenquio icsambuecshë tabadec utsibobëd tantiananenquio yanendac.

¹³ Adquido icnubi chieshtoenquio icquin ubi tantiaquido icsho Nuquin Papa yacno tabadmendambi.

¹⁴ Ubi choabi icnuc: Ma matses abitedishun: Nuquin Papan namiacno tabadte iquec, quequin umbi naid Chiaid Bëda chuibansho ma tantianu, queshun ubi tantiaquidon nidaid utsi utsiec yacno nidshun chuiben chuibenendac. Aden matses abitedi chuibennequin nainambi Nuquin Papan matses cuidte uëshë choendac, quepondash Esus.

Matses icsamboshë icquid chote chiaid

¹⁵ Adashic abi onquec: Nuquin Papan: Ubi tabadte shubu yacnoshon adotemaidquio nec, caid pichicate dayunshun icsambuenshë nabanquid iquec, quesho tantiashun: Nëbien icsambocquid chochitec, quequin tantiata. Ëndenquimbo Nuquin Papan oncamiaid Daniedën aden icsambuen nate chuiquin Nuquin Papan Chiaid dada uapampic. Aidën dada uampid isbanquin mimbi tantiendac.

¹⁶ Aden: Nuquin Papa tabadte shubu dapa yacnoshon ambi natemaid icsambuen naic puduedshun chuibanosh, quesho tantiash nidaid cuëshë Udea yacnocquido macuësh tapa yacno ompodec cuenac bëdambo ictsiash.

¹⁷ Adecbidi shubu macano padapadapambo icquidën tabadquido yec umanuc dectatoten budanec: Cuna bedbono, quenquio yec cuenta.

¹⁸ Adecbidi tied nantan nidshun: Chonoadtannu, quequin min dashcute bëntsecquid chicshun dectanaid bednuec bidiadenquio yec badedquio cuenta.

¹⁹ Adquid icnuc cuennuequi bacuë usunquidobëd bacuë chishmequido badedquio cuentiapimbo yec mëyadec natiaquiendac.

²⁰ Adec natiatequid icnuc: Ue taëec iquenuanquid icnuc adquid icmenda. Adembidi chonoadtemaid uëshënquio adquid icmenda, quequin Nuquin Papa chianneta.

²¹ Adnubi cumapenen Nuquin Papa chieshënquimbi abi tantiaquidotsen natiamequin iuen mëyadmequiendac. Adec ëndenquimbo Nuquin Papan nidaid uan matses mëyadtequid nibëdpampic. Aden matses mëyadmian adquid utsi nibëdendac.

²² Adquid icnuc Nuquin Papan ënmenquio icnuc matsestedi nibëdantsiandac. Adquid icnubi ambi: Umbi tantiamiaido nec, quequin tantiaquin Nuquin Papan ënmendac, quepondash Esus.

²³ Adashic abi onquec: Nuquin Papa chieshënte uëshë icnuc: Nëid Quidistu Nuquin Papan Chomiaid neque. Isec cho, quequin utsin utsinquien chuisho tantienda.

²⁴ Adquid uëshë icnuc: Nuquin Papan Chomiaid Quidistu nebi, quec muaquid utsi utsiec yanendac. Adecbidi: Nuquin Papan oncamiaid nebi, quec muaquid utsi utsiec iquendac. Aidon: Ubi tantiaquid icmenu, quequin ubi chieshënquidombi nadatiambocquin nabanquin ismendac. Adosho issun Nuquin Papan tantiamiaidonquiobi utsin utsinquien ubi tantienquio ictsenendac.

²⁵ Adquid yanabicnuc: Muaquido iquendac, quequin mibitedi chiec nebi, quepondash Esus.

²⁶ Adashic padpidec onquec: Umbi aden chuibued tantiashun utsibo muasho tantienda. Ubi caic: Utsibo ismenquio yec shubu nibëdacno choac caoshe. Isnunid, cac nidenda. Adembidi: Choash aid shubun ompodac caoshe. Isnunid, cac istanenda. Muambo neque.

²⁷ Ubimbo padpidec choquimbimbi abitedimbo ismendac. Abu uëshëmbo yec bed bedquetannesho ¿ada matses abitedishunquio isenquio icpadic? Ai, isec. Adembidi Matsesën Tishaid yec ubi chouasho matses abitedishunquio isendac.

²⁸ ¿Ada uënësaid pisenaid yacno edeste budenquio icpadic? Ai, budec. Adecbidi Nuquin Papan cuidte uëshë chonoc abitedishun isnuc chouaindabi, quepondash Esus.

Matsesën Tishaid yec abi chouate Esusën chiaid

²⁹ Adshumbic padpiden chiec: Aden matses icsamboshë icquidon ubi tantiaquido natiamequin mëyadmequin naimbudnubi uëshë chënquebuedi inchëshquio yanendac. Inchëshën uëshëtsen chënquenquio yanendac. Uispa chedo paëdbudnendac. Abuc tabadquid abitedimbo uëdëquendac.

³⁰ Adnubien Matsesën Tishaid yec ubi chotequid icnuc abuc ismiantequid icsho isbededendac. Adsho isash nidaidën tabadquido matses abitedimbo dacuëdec natiaquiec shubiquiendac. Adnubini Matsesën Tishaid iquequi abitedishun Icbo yec nadatiambo icquin nabanquidquio yec bëchamauanquiec abu ushu yacno ubi chosho isbededendac.

³¹ Adnuc nua shoncanubimbi Nuquin Papabëd icquidombo naden chuiquin: Ubi tantiaquido bedtan, caindac. Adoac nidaid utsi utsiec yacno nidanneshun ubi tantiaquido abitedimbo bedtanendac.

³² Aden chuishumbic: Ambi chuibued uëshë yante tantiamenuen Esusën naden chuipondash: ¿Mitsi paden: Seta taëec, quequin tantiapec? Suc seccuduquiaid issun: Nëbi seta taëec, quequin matsesën tantiec.

³³ Adembidi umbi chuibuedtedi yansho issun puduedte shëcuë dayun choacbimbuec: Nëbimbobi Matsesën Tishaid yec cun Icbo choec, quequin tantiata.

³⁴ Abimbo chiembique. Tantia. Umbi chuibambuedtedi yanabicnuc nëbi matses icquido uënësec naimëdenquio iquendac.

³⁵ Abubëd nidaid nibëdanendac. Padnuen Umbi Chiaid nibëdantiapimbo icquid icnuc umbi chuibocpadquio iquendac, quepondash Esus.

³⁶ Adashic abi onquec Esus: Aid uëshënquio chouaindac, quetiapimbo matses iquec. Nuquin Papabëd icquido adtiapimbo icuaic. Aton madombo iquequi ubitsen adtiapimbo iquebi. Cun Pa abentsëcshunquiobien ubi chote tantiec.

³⁷ Ubi Matsesën Tishaid caic matses: Nëbi choec, quetiapimbo icnubini padpidec chouaindac. Noen cano dapa nacnennubi ¿mitsipadec aton matses tabadpampic?

³⁸ Nidaid abichobi mauanambo icnuc: Nuquin Papan nuqui cuidendac, quequin tantienquio icquin peshun acquinc aton chido bedquinc aton champi bedmequinc caic tabadpampic. Adnubien Noen Nuquin Papan chiacpadombuen cano dapa anshubu uaquin nacnenquin nainash puduedpampic.

³⁹ Aton matses: Nëbimbobini Nuquin Papan cuidchitec, quenquio icnubi ue dapambo sequec mauanquidën matses abitedimbo maboccac uënësbudnepampic. Adnubi Noe ambi cano dapa anshubu uaidën nuadtopampic. Adquiecbidi Matsesën Tishaid ubi icsho: Aid choec, quequin tantienquio icnubini chouaindac.

⁴⁰ Adec choquin Nuquin Papa yacno tabadmenuen umbi: Bedtan, cac tied nantan dada daëd icsho istuidshun ubi tantiaquid abentsëc beduanquimbi utsi ubi tantiesa icsho nianendac.

⁴¹ Adembidi chido daëdshun macuesso istuidshun Nuquin Papa yacno tabadmenuen ubi tantiaquid abentsëc beduanquimbi utsi ubi tantiesa icsho nianendac.

⁴² Aden umbi chuibued tantiashun: ¿Nëbida cun Icbo chopeba? quequin ënenquio icquin ubi tantiata. Ubi chote uëshë mibitedishun tantienquio iqueque.

⁴³ Tantia. Chuinu. ¿Nëbi ampequid choshon cuna ampec, quequinda shubu icbon tantiapadic? Padenquio. Tantiaquidënquien: Ampe choshon cuna bedtsiash, queshun atona bëdambuen isquin ampemenquio ictsiash.

⁴⁴ Adquiecbidi Matsesën Tishaid yec ampe choacbimbuec chosho: Umbibi tantienquio icchitomane, queshun chieshtoenquio icquin ubi tantiaquin cainta, quepondash Esus.

Iua chieshtoenquiocquidbëta iua chieshtoquid chiaid

⁴⁵ Adshumbic abi cainte Esusën naden chuiuapondash. ¿Icbon chiac Mitsi padquid iuan abipadquid utsibo bëdambuen namepec? Adquid chuinu. Tantia. Pete tambanquin musucshun umbi namiaid utsitedi bëdambuen menebanta, quequin ambi namiaid utsi abentsëc chianec icbo nidec.

⁴⁶ Adec nidashic aton icbo chouashun ambi chiacpadombuen ambi namiaidën nacsho istuidshun: Bëdambo iquec, caindac.

⁴⁷ Umbi namiaid utsibon chuiquid icta. Adquid icquin cunatedi dayun uaquin isquid icta, quequin icbon chiendac.

⁴⁸ Adquid icnubi adombuen naisa icbo utsin namiaid icpec. Aton icbo baded choenquio icsho issun

⁴⁹ aton icbon namiaid icquimbi abëta iuaid utsibo chieshënquin cuesbanshun nua peshun tantiadennuen acte paë uaid acquidobëtan nua acpec.

⁵⁰ Aden nabanec: ¿Nëbida cun icbo chopeba? quequin tantienquio icnubien aton icbo chopec.

⁵¹ Adec choshon ambi chiacpadombuen nainquio icsho istuidshun: Icsambo iquec, queshun cumapenquien cuidendac. Adombuembidi Nuquin Papan icsambuen naquido cuidendac. Bëdambo icquid danmianquido cuidacno matses mëyadtequid yacno nidmendac. Adoac natiaquiec shëta chëquëdëshquec shubiquiendac, quequin Esusën chuipondash.