Mateo 15 - El Nuevo Testamento en matsés

Matses icsamete chiaid

¹ Adnubien Moisesën chiampid tantiamequidobëd padiseobo shubu dadpen icquid Edusaden yacnouësh chochoshon naden Esus chuimepondash:

² ¿Atotsi queshun mibëd icquidon nuquin tsusedpabon chiampicpadombuen nainquiocquimbi mëpamëdambobi pepec? capondash.

³ Adsho tantiashun Esusën: ¿Atotsi queshun Nuquin Papan Chiaid niacniacquin min tsusedpabon chiampiduidi tantiaquin mibitedishun nabampe?

⁴ Tantia. Mibitedi chuinu. Nuquin Papan naden chuipampic: Papabëta tita chieshënenquio icquin bëdambuen isquin tantiata. Adembidi: Aton papabëta aton tita chieshënquin icsambuen chuishunsho cuidquin uënës uaquid, quequin Nuquin Papan Chiampid iquec.

⁵ Aden chiampid icnubi aid niacquid icquin min tsusedpabon ambembi chiaiduidi mimbi chiec: Aton titabëta aton papa cudasënac bëdambo iquec, mibi quepec. Naden papabëta tita chiec: Nuquin Papa menetequid nëidted cun piucquid icnuc mitsana nibëdsho menetiadquidi mibi menenquio iquembi, quequin chuiuapec.

⁶ Aden aton papabëta aton tita nashunenquio icquin cudasënac bëdambo iquec, mibi quepec. Aden chuiquid icquin min tsusedpabon icsambuen chiampiduidi tantiaquin ma mibitedishun Nuquin Papan Chiaidquio niac niacpayoc.

⁷ Nuquin Papa tantiaquid nebi, quec bëdambocquid danmianquido mibitedi nec. Ëndenquimboshë Nuquin Papan ambi oncamiaid Isayasën mibitedishun icsambuen tantiate naden chuiquin dada uamepampic:

⁸ Isadaidbon: Nuquin Papa bëdambocquid nec, quequin chiec onquequidobi umbi chiacpadombuen naisa nec.

⁹ Nuquin Papan abi tantiasho ubi bëdambuen isec, quec abembi onquequidëmbi ubi bëdambuen tantienquio iquec. Umbi chiaidquio chuiquin tantiamenquio icquin aton matsesën chiampiduidi chuibanquin tantiamepec, quequin Isayasën chuipampic, quequin Esusën chuipondash.

Ana shëcuënuësh choaid chiaid

¹⁰ Adashic Esus abi datsidadquido chiec: Mibitedi bëdambuen chuinu. Tantiec cho, queshun naden chuipondash:

¹¹ Tsusedpabon chiampicpadombuen mëpamëdambobi pete ambi pequin chebudaidën matses icsatiapimbo iquendac. Padnuen ambibi ëquëducshun icsambuen tantiaquin chiec onquiaidëmbien matses icsaindac, quequin Esusën chuipondash.

¹² Adsho tantiashun abëd icquidobëtan naden chuipondambi: Mimbi aden chuibued tantiashun padiseobon mibi nëishënosh, Icbo. ¿Ada tantie? caquien:

¹³ Dacuëdenda. Ambi nitsinacmaid cute icsho Cun Pa abuc icquidën chichicshun tsindoshon nëdëncacbimbuen ambi tantiamiabi yaido icquin ambembi chuibanquido icsho Nuquin Papan cuideque.

¹⁴ Dacuëdenda. Padiseobo bëshuaidbimbuec icquido nec. Bëshuaidën aton matses bëshuaid utsi bëdambuen buantiapimbo iquec. Buannuec abidaëdi shëcuë ampaëdtsiashe. Aidon chiaid tantienda, quepondash Esus ubitedi chiec.

¹⁵ Adshobien Petedon: Mimbi ana shëcuënuësh choaid, quequin chuibued tantiambo iccombique. Aid cuembo tantianu, Chui. Icbo, caquien

¹⁶ Esusën: ¿Mibitedishunda adembidi tantienquio ique?

¹⁷ Tantia. Chuinu. Ana shëcuën puduednuc mimbi pete pequin chebudbued min pucuno budash iuecpactsëc yash min dadanouësh puduenuaic. Adquidën Nuquin Papan Chiaid niacmequin icsamenquio iquendac.

¹⁸ Matses onquiaidimbi ana shëcuënuësh choaid caoc. Abi ëquëducuësh chieshëmënec onquec: Adoembi, quequin otacquio tantiaquin icsambuen chuiquin matsesën icsambuen naindac nadquidtedi.

¹⁹ Nëidic icsambuen tantiaquido. Nëidic cuessunnianquido. Nëidic aton chidopenquio chudquido. Nëidic aton bënëpenquio chudmequido. Nëidic ambi natemaidi naic chudnanquido. Nëidic ampequido. Nëidic mua uanquido. Nëidic icsambuec chuishumënquido.

²⁰ Adquidotedi: Ai, adote bunebi, quequin otacquio ëquëducshun tantiashun naic matses icsatequid nendac. Padnuen penush mëpamëdenquio icquin Nuquin Papan Chiaid niaquenquio iquendac, quepondash Esus abëd icquido chiec.

Isadaidpembo chidon Esus tantiaid

²¹ Adanec auëshquiobi puduanec nidec nidaid cuëshë utsi shubu dadpen icquid Tido caidbëd shubu dadpen icquid Sidon caid yacno Esus nidpondash.

²² Adnubien ambocquid chido cananebo icquid yec Esus yacno choquin cuëntuidpondash: Icbo, Dabidën Mado caid icquin ubi bëdambuen tantiaquin nashunta. Cun champi podobitsi icsa dapuduedshun natiamequin mëyadmequioshe. Cun champi bëdanmeta, capondash.

²³ Adoac Esusën ëcbedenquio icpondash. Ëcbedenquio yaqui chidon tsibambëquin cuëmbëpondash. Adsho tantiashun ubitedishun: Chieshanquiec cuënchoeque. Cuenme, Icbo, caquien

²⁴ Esusën cuenmenquio icquimbi aid chido chuiquin: Isadaidbo obeca bënnudacbimbuen Nuquin Papa tantienquio icsho aidoba tantiamequin chuibannuec chondabi, quepondash Esus.

²⁵ Adsho tantiash nidenquio yec chido Esus ismec danëshën tinquebudec: Cun champi bëdanmequin ubi nashunta, Icbo, queshobien Esusën:

²⁶ ¿Aton bacuëbon petebi bedtanquin opaba pemiacta bëdambo icpadic? quepondash.

²⁷ Adsho tantiashumbien chidon: Ai, abimbo mimbi caic, Icbo. Padnuen icbon pequin paëdmiaid opan petsëcquid,

²⁸ caquien Esusën: Ai. Ubi tantiaquidquio mibi nec. Mimbi chiacpadec min champi bëdanendac, quesho tantianec aton shubuno nidshun isaquien aton champi bëdanac Esusën chuibocpadënquiobi.

Daicsaidobëta nënquido Esusën dadpen bëdanmiaid

²⁹ Adanec auëshquiobi nidec chian dapa Cadidea cuëman nidquid podquiedën nidannepondabi. Adashic macuësh tapa pudundoec poctsebi Esus tsadtuidpondash.

³⁰ Tsadtuidsho issun matses dadpenquio chochoquin daicsaidobëta nënquido dadpen Esusën dayun nadquidtedi bëbëpondash. Tidinquequido yec bëshuaido yec mëicsaido yec onquesabo yec daicsaid utsitedi yec quenuc bëbëpondash. Adsho isanec nidtotanquin Esusën bëdanmebampondash.

³¹ Bëdanmiac onquenquio icbuedi onquiampondash. Bëshuacbuedëmbi isbempondash. Capuenquio icbuedi capucuempondash. Daicsaidobëd utsibo nënquidotedi adecbidi bëdancuededpondash. Adsho isash tantiadempambo yec tabadec nadpondash: ¿Adquidta ictednec? Nuquin matses isadaidbon tantiaid icquin Nuquin Papan namiac bëdanmequin naic, quiash: Nuquin Papa bëdambo iquec, quecuededpondash Esusën bëdanmesho isquidotedi.

Matses dadpenquioshë 4midted Esusën pemiaid

³² Adec tabadsho isashien Esus: Matses bunec tabadsho isash nëido tantiec uënësquio iquebi. Aidon ubëd daëdec ushec tabadquin aton pete uesquin piash bunec tabadec, queshun pemiambobi: Min shubu yacno nidshun petan, cac podquiedën nidannec padishnushe, queshun nidannemetiapimbo iquebi, quepondash Esus abëd icquido chiec.

³³ Adsho tantiashumbien abëd icquidon: Shubu nibëdec matses nibëdacno nuqui tabadec. Adquid icnuc ¿mitsimbo pete bedtiad? Ma matses dadpenquioshë icpayoc, capondash.

³⁴ Adoaquien Esusën: ¿Tedtsi pan iquec? caquien: Pan 7ted icnubi nuëcquidëmpi daëdpactsëc iquec, capondash abëd icquidon.

³⁵ Adsho tantiashumbien abi datsidadquido chuiquin: Nidaidën tabadbud, cac abitedimbo tabadbudpondash.

³⁶ Adshumbic pan 7tedbëta nuëcquid bedshun sananquin Nuquin Papa chiec: Nëid mimbi uaid pete bëdambo iquec, Papa, quequin chuitanquin cuëshbudcuenquin abëd icquido menepondash: Pemeban, quequin. Adoac abitedimbo menebanac pebededpondash.

³⁷ Aden piash abitedimbo: Pequiombi, quecuededpondash. Aden pebededan napi uaid bedbanquin sandoaid tsitsan dapa 7ted cubu cubuctsëcquio icpondash.

³⁸ Aden pebuedotedi tambanac 4midted dada icpondash. Chidobobëta bacuëbo tambanambo icpondambi.

³⁹ Adshumbic: Nidannec nid, capondash Esusën ambi pemebuedo chuiquin. Adoac aido nidannebon chian budash cano antabëdtoanec potec nidec nidaid cuëshë utsi Macdada yacno Esus nidpondash.