Mateo 14 - El Nuevo Testamento en matsés

Uan acten mentoanquid cuessunniaid

¹ Adnubien Edodes Antipas cuëmëdquid nidaid cuëshë Cadidea yacnocquidon chuiquid tapa icpanëdash. Aidëmbi Esusën nadatiambocquin nabanaid chuisho tantiapanëdash.

² Aden tantiashun aton iuabo naden chuipanëdash: Uan pado acten mentoquid nepash icnui. Umbi mapi butemiondaidi Uan uincuempash icnui. Adquid icquimbien nadatiambocquin nabanchitash, quepanëdash Edodes Antipas.

^3-4 Naden Edodes Antipasën Uan cuessunnemepanëdash. Uanën: Mimbi bedaid Edodias min chidopenquio nec. Min utsi Uedipon chidobi bedquin Nuquin Papan Chiaid niacquin mimbi icsambuen nac, quequin chiac chieshënquin Edodesën Uan bedmeshun quënën tsadunmepanëdash.

⁵ Adshumbic Uan cuessunnete bunquimbi matses dadpen: Nuquin Papan oncamiaid Uan nec, quesho tantiashun: Aidon ubi cuessunnetsiash, quequin dacuëdënquin badedi Uan cuessunnenquio icpanëdash.

⁶ Adshumbic Edodesën: Ubi tishaid uëshë nëbi iquec, queshun matses dadpen chochomeshun aton shubun puduedmeshun pemepanëdash. Adnubien ambi inaid Edodiasën champin Edodesën chochomiaido shëcshëcquec bidiadtannequin ismepanëdash. Adsho issumbic Edodesën: Bëdambuen mimbi naoc, champi,

⁷ queshun naden chuipanëdash: ¿Atotsi bune? Mibi bunaidquio mibi menenu, quec Nuquin Papan isquin tantianubi muatiapimbo iquebique. En ubi chui, champi, capanëdash Edodesën.

⁸ Adoaquien aton titan chuibued tantiatanquin naden Edodes chuipanëdash: Uan acten mentoanquid mapi butetanquin pada padaidën annanshun baded ubi mene, capanëdash champin Edodes chuiquin.

⁹ Adoaquien Edodes uënësquiocquin ambi chuibued niactiadquio icpanëdash. Umbi chochomiaidon: Mibi muambo nec, canushe, quetanquin champin chiacpadombuen aton iuabo chuiquin: Uan mapi butetanquin champi mene, capanëdash.

¹⁰ Adoac nidshun quënën tsadacnobi Uan mapi butetanquin

¹¹ pada padaidën annanshun bëshun champi menepanëdash iuabon. Adoac buanshun aton tita menetuidpanëdash.

¹² Adnubien Uambëd icquidon: Uan mapi butiac caosh, quesho tantiash nidshun Uanën dada bedanquin buanshun chococatampanëdash. Adotanec Esus chiec nidpanëdash.

Esusën matses 5midted pemiaid

¹³ Nidshumbic: Mibi acten mentondaid Uan mapi butiaccosh, quequin chuituidpondash. Adsho tantianec cano antabëdtoanec nidec abentsëqui icnuec matses nibëdacno Esus nidpondash. Adec nidquin chian potesho isash: Nuquitsen nidnunid, quianec shubu dadpen icquid yacnouësh choquido matses dadpen chian dëquiadec podqued nidquidën nidannepaccondash.

¹⁴ Adnubien Esusën cano nandoash pudundoquimbi matses dadpenquio icsho istuidpondash. Adsho isash aido tantiec uënësquiocquin aidon bëbëaido nënquidobëta daicsaidotedi bëdanmebampondash.

¹⁵ Uëshë budsho istanquin abëd icquidon Esusën dayuntsëc choshon naden chuipondash: Pete nibëdacnombo nuquitedi tabadnubi inchësheque. Nidanneme, Icbo. Shubu dadpactsëcquid utsi utsiec yacno nidshun piucquid menequin ma pete bedtannu, capondash.

¹⁶ Adoaquien Esusën: Padi. Nidannemetiapimbo iquebique. Mibitedishun pemeban, capondash.

¹⁷ Adoaquien: Ma nëmbobi pan 5tedpactsëc icnubi nuëcquid daëd icpayoc, capondash.

¹⁸ Adshobi: Aidtedtsëqui nëmbo bec cho, caquimbi menepondac.

¹⁹ Adoaquien Esusën abi datsidadquido chuiquin: Uasinën tabadbud, capondash. Adoac tabadbudsho istanquin pan 5tedbëta nuëcquid daëd sananquin abuc isec: Mibi bëdambocquid icquin mimbi meniaid nëid pete nec, Papa, quec onqueshun pambëta nuëcquid cuëshbudcuenquin menequin: Nëid meneban, Esusën cac abëd icquidobëtan menebampondambi.

²⁰ Aden meniac pebededash: Pequiombi, quecuededpondash abitedimbo. Aden pebededan napi uaid bedbanshun sandoaid tambanac tsitsan dapa 12ted icpondash.

²¹ Aden peboedo dadatedi tambanac 5midted icpondash. Chidobobëta bacuëbo tambanambo icpondambi.

Acte bëntse Esus capuaid

²² Adshumbic Esusën ubitedi chuiquin: Tsiuec nidnu. Mibia nidannequin chian potec nid, quepondash. Adoac cano antabëdtoanec chian potec nidnubi abentsëqui tëshëdshun Esusën abi datsidadquidotsen chuiquin: Nidannec nid, quequin nidannemepanëdash.

²³ Adec matses abitedi nidannebon: Nuquin Papa chuitannu, quianec nidash macuësh tapa dectatoash abentsëqui tsadquin Esusën Nuquin Papa chuinubi inchëshpanëdash.

²⁴ Adnubi chian dapa potec abëd icquidobëd nidequi inchëshpondabi. Adec nidec chian nënantanquio yannubi cunquequid tapa choec cunquetuidpondash. Adnuc uncadenquio yanec acte cumapenec bocquiampondash. Cumapenec acte bocquenuc cano mentoadtiadpambo icpondash.

²⁵ Adnubien badiadte anoentsëqui Esus acte bëntse abëd icquido yacmi chopondash.

²⁶ Adec acte bëntse chosho istanec ubitedi: Podobitsi nec, quiash dacuëdtanec sidquecuededpondac.

²⁷ Adnubien Esus: Ubi neque. Dacuëdenda, quepondash.

²⁸ Adoaquien Petedon: ¿Cun Icbombobida ne? Cun Icbombo icquin en ubi: Acte bëntse cho, ca, capondash.

²⁹ Adsho tantiashun Esusën: En cho, caquien Petedo canonuësh budanec acte bëntse Esus bëquedec nidpondash.

³⁰ Esusuidi isec bëdambuec niduidequi cunquequid tapan nac acte cumapenec bocquesho istanec dacuëdtanec acte bëntse niduidbuedi mentoadtsempondash. Adec mentoadquin: Ubi bed, Icbo, caquien

³¹ Esusën badedquio mëdintanquin indopondash. Aden indoequi: Cun icbon ubi bëdambuen nametsiash, quebuedi ¿atotsi quiash dacuëdtano? Ubi bëdiactsëc tantiactsëcquid mibi nec, capondash Esusën.

³² Adtanec Petedobëd cano antsadtonobi cumapenec cunquebuedi ënëdpondash. Adecbidi acte bocquenquio yanuapondash.

³³ Adsho issun cano antabëdquidon dannëshën sebudshun ismequin: Mibi bëdamboshë iquec. Ma Nuquin Papan Madombo mibi nepayoc, quequin ubitedishun Esus chuibededpondac.

Quenesaded yacnoshon Esusën daicsaidobëta nënquido bëdanmiaid

³⁴ Adashic chian dapa potiash nidaid Quenesaded caid yacno choash pudundopondabi.

³⁵ Pudundosho issun ambocquidon: Bëdanmianquid chosh, quequin uannocquido abitedi chuibenniac daicsaidobëta nënquido Esus yacno bëbëpondash.

³⁶ Bëbëshumbic: Dashcuteuidtsëqui mishash bëdantsiash, queshun Esus chuiquin: Min dashcute cuëma daicsaidobëta nënquido mishme, cac dashcute bëntsecquid cuëma mishmiaqui abitedimbo bëdampondash.