Mateo 13 - El Nuevo Testamento en matsés

VII. UTSI CHIACBIMBUEN 7TEDI CHUIBANAID ( 13.1-52 ) Utsi chiacbimbuen pete ëshë secaid chiaid

¹ Aton tita choaid uëshëmbi Esus shubu yacnouësh puduenanec nidec chian cuëman budash tabadtuidpondash.

² Tabadtuidsho isash matses dadpenquio chochoash tsucus tsucustsëcquio yec Esus datsidadpondash. Adsho istanec cano dapa antsadtopondash, chochoquido chian cuëman tabadnubi.

³ Adec tabadshobi naden utsi chiacbimbuen dadpen chuibampondash: Tied icbo pete ëshë secaic aton tied yacno nidposh.

⁴ Adec nidshun pete ëshë secac maisec utsi utsiec podqued nantan paëdacsho istanec choshon uicchunën cheposh.

⁵ Pete ëshë utsibic nidaid aniactsëc iquec cuënote dadpen samëdacno paëdash badedquio dëyucuidtsashi

⁶ tapunenquio yec uëshë chënquequidën badedi shoedash uënësposh.

⁷ Pete ëshë utsibic nisanquid dadpen yacno paëdash dëyucash canidotsëcshobi nisanquidën bëtinac canitiapimbo yec uënësposh.

⁸ Pete ëshë utsibic nidaid bëdambo yacno secac dëyucash caniash bacuëtanec dadpenquio ëshëcquid icposh. Utsi utsiec 100ted icnubi utsi utsiec 60ted icnuc utsi utsiec 30ted ëshëcquid icposh, quepondash Esus.

⁹ Aden chiashic: Umbi chuibambued pabiate shëcuë choquidën bëdambuen tantiata, quepondash Esus.

Naden tantiaquin utsi chiacbimbuen chiec nebi, quiaid

¹⁰ Adsho tantiashun abëd icquidon Esus naden chuipondash: ¿Atotsi queshun utsi chiacbimbuen mimbi matses dadpen tantiamequin chuibampe? caquien

¹¹ Esus nadpondash: Utsibo tantiamenquio icnëdaidi: Nëbi Nuquin Papan namiacno tabadte iquec, quequin mibitedictsëqui tantiamembi utsibo padenquio icquin.

¹² Nuquin Papa tantiate bunquidën ubi tantiabensho bëdambuen tantiamendambi. Nuquin Papa tantiauidtsëcquidën umbi utsi chiacbimbuen chiac tantienquio icsho tantiamenquio iquendambi.

¹³ Utsi chiacbimbuen aido chuibanembi. Aden chiac: Ëshë bëdambocquid icquimbi ma isenquiocpanuna. Adembidi tantiate bëdambocquid icquimbi ma abimbo chiaid tantienquio icuapanuna, capondash.

¹⁴ Nuquin Papan ambi oncamiaid Isayas naden chuiquin dada uamepampic: Chiac tantiaboshombi tantienquio iquendac. Ismiac isboshombi: Ai, aidi nec, cainquio iquendac.

¹⁵ Umbi chiac tantiatiapimbo iquec. Min matses pamumëdacbimbuen tantiate bunenquio iquec. Bëchicqueshun isenquio yacbimbuembidi isquin tantiatiapimbo iquec. Umbi chiaid tantiaquin umbi nabansho issun padpiden ubi tantiabenuanushe. Aden tantiabenshun ambi icsambuen naid ënsho issun bëdambuen ismane, quiash Nuquin Papa chushquiaid Isayasën dada uapampic, quepondash Esus.

¹⁶ Aden tantienquio icquido icnubi mibitedishun ëbëd icquidon ubi isquin tantiec tabadec. Adembidi umbi chuibansho tantiash: Abimbo caic, quequin tantiaquido icsho Nuquin Papan mibitedi bëdambo icmendac.

¹⁷ Mibi abimbo caimbique. Tantia. Nuquin Papan oncamiaidobëtan Nuquin Papa tantiec bëdambuec tabadquido dadpenshun mibitedishun ubi isacpadombuen ubi iste bunequi ubi chosho isambobi uënësbudnepampic. Mibitedishun umbi chuibansho tantiacpadombuen tantiate bunequi tantiambobi uënësbudnepampic, quepondash Esus.

Pete ëshë secaid cuembo chiaid

¹⁸ Adashic abi onquec: Tantia. Umbi pete ëshë secaquid utsi chiacbimbuen chuibued cuembo mibitedi chuinu.

¹⁹ Nuquin Papan namiacno tabadte iquec, quequin chiaqui tantienquio icsho Mayan Icsa Satanasën nac badedi bëshunendac. Adquid podquied nantan pete ëshë secac paëdacsho uicchunën badedi chiacbimbuecquid nendac.

²⁰ Pete ëshë utsi cuënote dadpen samëdacno paëdaidbimbuecquid nad iquec. Nuquin Papan Chiaid chuibansho tantiash: Bëdambo iquebi, quec cuishonquendac.

²¹ Adsho: Nuquin Papa tantiaquid nec, queshun utsibon chieshënac pete ëshë dëyuquec tapunuidtsashi uënësacbimbuen badedi chieshtoshon Nuquin Papan Chiaid tantienquio yanendac. Adembidi chieshtomiantequid utsi utsiec icnuc Nuquin Papa tantienquio yanuaindac.

²² Pete ëshë utsi nisanquid dadpen dëyucaid yacno paëdaidbimbuecquid nad iquec. Nuquin Papan Chiaid chuibansho tantiashun ambi dadpen tantiaiduidi tantiec chieshtoendac. Utsibic ambi bedteuidi tantiaquin nabanec abibi mua uadec chieshtoshon tantienquio yanuaindac. Adquido Nuquin Papan Chiaid tantiesabo yanshun bëdambuec tabadaid utsibo tantiamenquiocquid yanendac. Adquid nisanquidën bëtinac bacuëtiapimbo yacbimbuecquido nec.

²³ Padnuen pete ëshë utsi nidaid bëdambo yacno secac paëdaidbimbuecquid nad iquec: Nuquin Papan Chiaid chuibansho tantiaquioshon ambi tantiabued bëshunenquio icquin tantiec bëdambuec tabadquid nendac. Adquidën chuibanac ubi tantiaquid 100ted yanendac. Utsin chuibanaquic 60ted yanendac. Utsin chuibanaquic 30ted yanendac, quequin abi tantiabente Esusën chuipondash.

Utsi chiacbimbuen uasin icsa seuanaid chiaid

²⁴ Adshumbic Nuquin Papan namete utsi tantiamenuen Esusën utsi chiacbimbuen padpiden chuibanuapondash. Tantia. Chuinu. Tiedën caniquid pete adosbiecquid icbon seposh.

²⁵ Adanec ushec nidambic inchëshën choshon chieshëmënquidon uasin ëshë icsambocquid daëd uain ansecauamposh.

²⁶ Adoac adosbiecquid tidico canidotsëcnubi abëdi tancandaëdpambuec uasin icsambocquid canidoposh.

²⁷ Adsho istanquin iuabon aton icbo chuituidposh. ¿Pete ëshëbida sio? cac: Ai, quesho tantiash: Ma icsambo icquidbëd tancandaëdpambuec canidopacboc. ¿Mitsi paden siac? quequin iuabon icbo chuiposh.

²⁸ Adoaquien: Chieshëmënquidombien ansecauanchitash, cac: ¿Chicshunnetanquindambi icpe? aton iuan cac:

²⁹ Padi. Petebëdi chiquidtsiash.

³⁰ Ma aidbëdi caniec ëshëpanuna. Ëshëacsho issun abitedi bednun nanuna. Adoshombic icsambo icquidba tsindobanshun nëdëncanun nanuna. Adotanquimbic petembo bedshun sandoshon pete dayun uate shubun sannun nanuna, caposh tied icbon, quequin Esusën chuipondash.

Mostasa ëshëmpi chiaid

³¹ Adshumbic Nuquin Papan namiacno tabadte tantiamenuen Esusën utsi chiacbimbuen naden chuipondash: Tied icbo mostasa caid ëshëmpi aton tiedën sec nidposh.

³² Aden siaid ëshë pistsëcquiocbuedi caniec nuamboshë yanec cuidi cuidipamboshë icposh. Aid cuidin uicchun dadpen chochoec tabadtonequin shubu uashun aton bacuë tishposh, quepondash Esus.

Nami uaid bidiscamete cabiunaid chiaid

³³ Adembidi Esusën utsi chiacbimbuen naden chuiuapondash: Nuquin Papan namiacno tabadte nadquio iquec. Chidon nami uashun cabiunac nua bidisquedoec. Adquiecbidi Umbi Chiaid tantiaquidën chuibanac ubi tantiaquido dadpen yanendac, quequin Esusën chuipondash.

Nuquin Papan chiampicpadombuen naid

³⁴ Cuembo chienquio icquin utsi chiacbimbuenuidi Esusën matses dadpen chuibampondash.

³⁵ Aden Esusën chuite chuiquin ambi oncamiaido Nuquin Papan dada uamiampicpadombuen nanuen adopondash. Nuquin Papan dada uamiampid nad iquec: Cuembo chienquio icquin utsi chiacbimbuenuidi chuibanendambi. Ëndenquimboshë nidaid uashun aidën icquido uashumbi Nuquin Papan ambi tantiaidi ambi uaido chiambo iquec. Adembidi aidon tsiuecquidotedi chiambobidi iquec, quequin Esusën chuite chuipampic.

Uasin ëshë icsambo icquid ansecauanaid cuembo chiaid

³⁶ Adshumbic matses dadpen tabadsho isash: Nidec nid, cac nidsho isanec nidec Esus shubun puduedpondash. Puduedsho isash aidbëd abëd icquido puduedacsho naden chuipondash: Chieshëmënquidon uasin ëshë icsambo icquid ansecauanaid, quequin mimbi chuibued en cuembo chui. Tantianu, Icbo. ¿Atotsi tantiamenuen mimbi aden chuipo?

³⁷ caquien Esusën naden chuipondashi: Pete ëshë bëdambocquid sequidbimbuecquid Matsesën Tishaid nebi.

³⁸ Padnuen tied tapan icquidbimbuecquid nidaidën tabadquidotedi nec. Pete ëshëbimbuecquid Nuquin Papan namiaido nec. Padnuen ubi chieshënquido Mayan Icsa Satanasën namiaido icquin uasin icsambocquid ansecaquidbimbuecquido nec.

³⁹ Adquid icnuc uasin ëshë icsambo icquid sequidbimbuecquid Mayan Icsa Satanas nec. Aidën namiac matses icsambo icquidon ubi tantiaquidobëd tabadquin icsambuen nametiadquio iquendac. Adsho badedi cuidenquio icquin Nuquin Papan cuidte uëshë choabi icnuc matses icsambo icquidobëd bëdambocquido abi tabadmendambi. Adec tabadsho ambi tantiacpadën Nuquin Papan namiac abëd icquidon ubi tantiaquido beduanendac.

⁴⁰ Icsambo icquid caniacsho tacuesquin tsindoshon nëdëncacbimbuen Nuquin Papan cuidte uëshëmbi icsambo icquido cuidendac.

⁴¹ Matsesën Tishaid icquin Cun Pabëd icquido chomendambi. Icsamianquidobëta icsambuen naquidotedi bedshun chian annëdënquiacno nëseca, quequin umbi chiac

⁴² bedshun chian annëdënquiacno nësecaindac. Adoac: Ubi, quec natiec mëyadbudec shëta shëchëdëshquequiec sidquebudnendac.

⁴³ Padnuen ubi tantiec bëdambuec tabadquido Nuquin Papan namiacno nidash bëdamboshë yec uëshë chënquiacbimbuec bëchamauanquiec iquendac. Umbi aden chuibambued tantiashun pabiate shëcuë choquidën bëdambuen tantiata, quepondash Esus.

Nuquin Papabëd tabadte bunquiota, quiaid

⁴⁴ Adshumbic padpiden Esusën Nuquin Papan namete naden chuipondash: Tantia. Utsibon ompoampid bëdamboshëcquid istuidaid bedte cumapenec bunquiaid mibi chuinu. Utsin tied nantan nidshun dadan utsibon ëndenquimbo ompoampid piucquid dadpenquio sandoaid istuidposh. Aden Istuidshun aid bedte bunquin padpiden ompouaposh. Adshumbic atona abitedimbo menequin piucquid dadpen bedshun tied icbo aid piucquid meneposh. Adshumbic: Nëbi cun tied nec, queshun piucquid ompoampid bedposh.

Utsi chiacbimbuen casëdo ushumbo yec bëdamboshë isadquid bedte chiaid

⁴⁵ Tantia. Nuquin Papan nametequid chuiquin mibitedi chuiuanu. Acte dapan icquid chiun bedshun nacnenaid casëdo ushumbo yec bëdamboshë usadquid bunquin bednuen nibëmbenneposh.

⁴⁶ Aden nibënquin bëdaidquio icsho istuidash: Nadquid utsi nibëdec, quiash cumapenec bedte bunquioposh. Adshun atona abitedimbo menequin piucquid bedshun casëdo icbo aid piucquid menequin casëdo bedposh.

Utsi chiacbimbuen nëshaid tapa chiaid

⁴⁷ Adshumbic Esusën Nuquin Papan namete padpiden chuiuaquin utsi chiacbimbuen chuiuapondash. Tantia. Mibi chuinu. Nuëcquid bedshun nibedacbimbuen naindambi. Matsesën nuëcquid bednuen aton nëshaid tapa acte dapa mad caid nëneshun nuëcquid utsi utsien bedquid.

⁴⁸ Aden nëshaid cubu cubuctsëcquio icnuc nuëcquid bedshun acte cuëman sambudash tabadquin nuëcquid nibedquid. Nuacquid tsitsanën sandobanquimbi aniactsëcquid acte nësecaquid.

⁴⁹ Adombuembidi Nuquin Papan abitedi cuidte uëshë chonoc Nuquin Papabëd icquido nidaidën chomendac. Adoac choshon nuëcquid nibedacbimbuen matses bëdambocquido Nuquin Papa yacno tabadmequimbi

⁵⁰ icsambo icquido chian annëdënquiacno nësecaindac. Adoac: Ubi cuidec, quiash shëta chëquëdëshquec natiaquiec shubiquiendac, quequin Esusën Nuquin Papan cuidte chuipondash.

Ëndenquimbo chiampidbëta nëbi chuca chiaid

⁵¹ Adshumbic Esusën: ¿Ada umbi chuibuedtedi tantie? caquini: Ai, tantiembi, quecuededpondac.

⁵² Adsho tantiashun Esusën ubitedi naden chuipondash: Nuquin Papan Chiampid tantiamequid utsibo chuiquin: Nuquin Papan namiacno tabadtequid iquec, quequin tantiaquid yanshun naden chiendac: Matsesën atona ëndenquimbo ambi dayun uanëdaidbëta nëbi chuca icquid ismequin utsi utsien chicacbimbuen chiendac. Nuquin Papan Chiaid ëndenquimbo dada uampidbëtabi Nuquin Papan Chiaid chuca umbi chuibambuedquio mibitedishun chuibanendac, quepondash Esus.

VIII. ESUSËN DADPEN NABANAID ( 13.53—17.27 ) Nasaded yacno Esus nidaid

⁵³ Aden utsi chiacbimbuen dadpen chuibanquin nainanec Esus auëshquiobi puduanec nidec

⁵⁴ abi caninëdacno shubu dadpen icquid Nasaded yacno Esus nidpondash. Ambo nidshumbic Nuquin Papan Chiaid chuibante shubun puduedshun Esusën chuibampondash. Aden chuibansho tantiashien tantiadempambo yec tabadec: ¿Mitsishunquio adombuen cumapenen tantiabempash nepeba? ¿Mitsipadquiec nadatiambocquin nabanquid yampash?

⁵⁵ quenubien utsibo: ¿Nuqui isacmaidta nedic? Ma aton papa cute chëshshun nacnenquid nepaboc. Aton tita Madia nec. Aton utsibo nëidtedi iquec. Nëidic Santiaco. Nëidic Ose. Nëidic Simon. Nëidic Udas.

⁵⁶ Aido nëmbobi icquido nec. Adecbidi aton chibi chedotsen nëmbobidi icquido neuaic. ¿Adquid icnuc cumapenen tantiaquidta nedic? Ma adquidpenquio neyoc, quequin

⁵⁷ Esus chieshënquin aidën chuibansho tantiate bunenquio icpondash. Adsho tantiashumbien Esusën naden chuipondash: Utsibo yacno nidshun Nuquin Papan oncamiaidën chuibansho tantiaquid dadpen icnubi abi caninëdacnobidi chouashun chuibansho chieshënquid aton matses iquendac. Adecbidi aton shubun icquido iquendac, quequin chuidednec, quepondash Esus.

⁵⁸ Aden abi tantiate bunenquio icsho issun nadatiambocquin bëdamequin daëdpactsëc ismepondash.