Madcos 9 - El Nuevo Testamento en matsés

¹ Aden chiashic Esus: Nëmbo tabadquid ubi tantiaquid utsi utsiec uënësabi yec nidaidën abi tabadsho Nuquin Papa nadatiambocquidën ambi namiaid choquin ismendac, quepanëdash.

Esus bëchamauanquiecsho isaid

² Aden chiashic 5tedec ushanec nidquimbi Esusën Petedo yec Santiaco yec Uan yec quenuc buanash macuësh tapa abucquiocquid yacno nidpanëdash. Ambo nidash dectatoash tabadquin aidon isnubi Esus utsiacbimbuec yanec bëchamauanquiec yampanëdash.

³ Adecbidi aton dashcute bëchamauanquiec ushumboshë yampanëdash. Adquio isadnuc matsesën pantiapimbo iquec.

⁴ Adnubien ambi buambuedon isnubi Nuquin Papan oncamiampid Ediasbëd Moises isadcuenash Esusbëd onquec tabadsho ispanëdash.

⁵ Adsho isashien: Icbo, mibëd nëmbo choash tabadquin mibitedi isec bëdambo iquebi. Mibi nëmbo tabadte 3ted shubumpi uanu mitsana yec Moisesëna yec Ediasëna yec quenuc, quepanëdash Petedo Esus caic.

⁶ Nadombuen chuinu, quenquio yec abëd icquidbëd dacuëdec tabadquin aden bëdambuen tantienquiocquin chuipanëdash Petedon.

⁷ Adec tabadshobien abu ushu choquin bëtimpanëdash. Aden bëtinacnouëshquiobi naden chiec onquiampanëdash: Nëid Umbi tantiaidquio yec cun Madombo neque. Aidën chuisho bëdambuen tantiata, quec onquepanëdash Nuquin Papa.

⁸ Adsho tantiatanquin isaquien Esusbëd tabadbued nibëdnuc Esus abentsëqui icsho ispanëdash.

⁹ Adtanec macuësh budquimbi Esusën naden abëd chobuedo chuipanëdash: Mimbi nëbi isbued utsibo chienda. Matsesën Tishaid icshobi uënësuac uincuenacsho issumbi chianta, quepanëdash.

¹⁰ Adsho tantiash utsibo chienquio yec: ¿Mitsipadquio abibi uincuente icpec? quec onquecuededpanëdash Esusbëd chobuedo.

¹¹ Adec onquecuededashic: Nuquin Papan Chomiaidquio nec, quequin nëbi mibi tantiembi. Mibi adquid icnuc ¿Mitsipadquid chuiquin Moisesën chiampid tantiamequidon chuiposh? Nuquin Papan Chomiaid choabi icnuc bëyuc Edias yampidba choendac, quequin ma chuibampaboc, quequin chuipanëdash.

¹² Adoaquien Esusën: Ai, abimbo chiosh. Matses bëdambuec tabadmenuec Edias bëyuc choendac, quequin Nuquin Papan Chiampid iquec. Adquid icnuc ¿atotsi queshun Matsesën Tishaid yec nëbi tabadsho matsesën chieshënquin natiamequin mëyanendac, quequin chiampid icuapec?

¹³ Tantia. Mibi chuinu. Ediasbimbuecquid chondash. Aidi Nuquin Papan chiampicpadec choacsho abi bunacpadombuen abi chieshënquidën uënës uapanëdash, quequin Esusën chuipanëdash.

Podobitsi icsa dapuduedaid madompi Esusën bëdanmiaid

¹⁴ Adec onquetanec choquin abëd icquido ambi niambuedo yacno matses dadpen datsidadacsho istuidpanëdash. Aidon isnubi Moisesën chiampid tantiamequidobëd Esusbëd icquido cumapenec cuëdcuededec tabadsho istuidpanëdash.

¹⁵ Adec Esus chosho isashien iccuededquido: Bëdanmianquid choeque. Isnunid, quetanec titinquianec choquin: ¿Choecta icco? capanëdash.

¹⁶ Adoaquien: ¿Atotsi quiash ubëd icquidobëd mibitedi cumapenec cuëdcuededo? capanëdash Esusën.

¹⁷ Adshobien iccuededquid abentsëcshun chuiquin: Icbo, mibi ismenuen cun madompi bëombi. Aidi podobitsi icsan onquesa icmiaid nec.

¹⁸ Aidi podobitsi icsan cumapenen bëcunnedenniac nidaidën uebudec ëcbacush ëcbacushpambo yec cuididiquedenniosh. Adecbidi uënësannec cuembo yec tsasiec uebudash uequin shëta chëquëdëshcannec. Adquio yannesho bëombique. Podobitsi icsa dapuduedaid dapuduenme, cauidombi mibëd icquido chuiquin. Adoaqui dapuduenmetiapimbo iccosh, quepanëdash aidën papa Esus chiec.

¹⁹ Aden chuisho tantiash abëd icquidobëta ambo icquido caic: Esus nadatiambocquid nec, quequin ubi tantiesa mibitedi nec. ¿Tedectsicshun umbi chiacpaden mibitedishun tantiabempe? ¿Mibitedishun tantienquiocsho isash tedectsiashini chieshtope? quetanquin: Min madompi bec cho, capanëdash Esusën.

²⁰ Adsho tantiashun bëpanëdash. Bëaqui Esus istanquin podobitsi icsa abi dapuduedaidën cumapenen bëcunniac madompi uebudash ëcbacush ëcbacushpambo yec cuididiquepanëdash.

²¹ Adsho istanquin Esusën madompin papa naden chuipanëdash: ¿Tedtsi seta matanmec adquid nec? Tantianu. Ubi chui, capanëdash Esusën. Adoaquien: Bacuëmpi ictsequi taondaid nec.

²² Abi dapuduedaidën cute dëtsiadoaid nënedenniosh. Adembidi uënësmenu, quequin actetsen nëpaëdmedenniosh. ¿Ada ubëta cun madompi tantiaquin podobitsi icsa dapuduedaid dapuduenmeshuntsia? quepanëdash madompin papa Esus chiec.

²³ Adoaquien Esusën: ¿Ada podobitsi icsa dapuduedaid dapuduenmeshuntsia? ¿quecta ique? Nuquin Papa nadatiambocquin naquidquio nec, quequin tantiaquidën tantiacpadombuen Nuquin Papan nashunendac, capanëdash.

²⁴ Adsho tantiashien cumapenec cuëdec: Tantiembi. Umbi pistsëc tantiasho issun ubi udictsëc tantiamequin nashun, Icbo, quepanëdash madompin papa.

²⁵ Adsho tantiash matses dadpen chochosho issun podobitsi icsa naden chuiquin: Matses oncamenquio icquin pashu uaquid mibi neque. Ambo padpidec tabadenquio yec dapuduenta, capanëdash Esusën.

²⁶ Aden chiaquien podobitsi icsa cumapenec sidquequin madompi uebudmiac cuididiquenubi dapuduempanëdash. Adec dapuduenan uënësacbimbuec madompi uesho isash: Uënësosh, quecuededpanëdash isquido.

²⁷ Adshobien madompi mëdintanquin Esusën uëtsëndoac isucunec nidtopanëdash.

²⁸ Adashic Esus utsin shubun puduedacsho: ¿Atotsi queshumbimbi podobitsi icsa madompi dapuduedaid dapuduenmenquio icpo? capanëdash abëd icquidon utsibo tantiamenquio icquin.

²⁹ Adoaquien Esusën: Dapuduen, quequinuidtsëqui mimbi chuibudac adquid dapuduenesa nec. Nuquin Papa nadatiambocquin naquid nec, quequin tantiaquin chuidenneshun mimbi podobitsi icsa dapuduedaid: Dapuduen, cac dapuduenendac, quequin chuipanëdash.

Abi uënës uamete padpiden Esusën chuiuaid

³⁰ Aden chianec nidaid cuëshë Cadidea matambidanec nidpanëdash. Nidequi: Ubëd icquidotedtsëqui tantiamequin chuibannu, quec utsibo ismenquio yec nidpanëdash Esus.

³¹ Adec nidquin chuibanequi: Matsesën Tishaid icshobi ubi chieshënquidon ubi bedmendac. Aden bedshun meniac mëyanquin uënësuac daëdec ushash uincuenendabi, quepanëdash Esus.

³² Aden chuibansho tantiashien bëdambuen tantienquio yec dacuëdcuededquin: Ubi bëdambuen tantiamequin chui, catiapimbo icpanëdash abëd icquidon.

¿Mitsicquid chuiquid tapa iquendac? quequin chiaid

³³ Adanec shubu dadpen icquid Capednaun caid yacno Esus chouapanëdash. Adec chouash shubun puduedshun: Podquiedën choec ¿atotsi chiec cuëdnanec mibitedi onquecuededec nio? capanëdash Esusën abëd icquido chuiquin.

³⁴ Adsho tantiashun ëcbedenquio icpanëdash abëd icquidon. Nuquitedi abëd icquido yec ¿mitsicquid chuiquid tapambo iquendac? Tantianuna, quec abi cuëdnambued chienquio yec tabadpanëdash.

³⁵ Adnubien abi tsadacnouëshi: Cho, quiampanëdash Esus abëd icquido 12ted caic. Adoac chochoacsho isash: Chuiquid tapa icte bunquin iuan nacbimbuen utsibo tantiaquin nashunquid icta, capanëdash Esusën.

³⁶ Adec onqueshumbic bacuëmpi abentsëc bedtanquin abëd icquido tabadacno nënantanquio tsadumpanëdash. Aid bacuë icuquec Esus nadpanëdash:

³⁷ Esus tantiaquid nebi, queshun nadquid bacuë nashunquin ubi nashunacbimbuecquid nendac. Adquidën ubiuidi nashunenquiocquin ubi chomequid Nuquin Papa nashunuacbimbuecquid neuaindac, quepanëdash Esus abëd icquido chiec.

Nuqui chieshënesa nuquibëd icquidbimbuecquid nec, quiaid

³⁸ Adnubien utsin nabansho issun Uanën naden chuipanëdash: Icbo, mimbi nabocpadombuen utsin nasho ubitedishun ispombi. Aidën: Esus nadatiambocquin naquidquio nec, quequin tantiembique. Dapuduen, cacpadquiequi podobitsi icsa dapuduemposh. Adosho issun: Esusbëd icquidpenquio mibi neque. Aden chienda, quequin chuipombi, quepanëdash Uan.

³⁹ Adsho tantiashumbien Esusën: Adquid: Aden chienda, cainda. Nadatiambocquin nabanquidquio Esus nec, quequin abimbo tantiaquin umbi nacpadombuen nabanquidën ubi icsambuen chuishuntiapimbo iquec.

⁴⁰ Nuqui chieshënenquio icquin: Nadatiambocquin nabanquidquio Esus nec, quequin umbi nabocpadombuen nabanquid nuqui bëdambuen isquid nendac, quepanëdash Uan caic.

⁴¹ Abimbo chiembique. Tantia. Esuquidistu tantiaquid nec, quequin mibitedi acte acmequin nashunquid Nuquin Papan bëdamboshëcquid menetequid iquendac, quepanëdash Esus.

Tantiabentsëcquid icsambuen namequid cuidendac, quiaid

⁴² Adashic abi onquec Esus: Nadquid ubi tantiaquid bacuë icsambuen namequin chieshtomesho issun adosbiecquid macueste cuënote iuëmbocquid tëdectanquin tëtaneshun acte dapa mad caid ëquëducquioshë yacno nënepatecnëdan.

^43-44 Min mëdanten icsambuen naquin Nuquin Papan Chiaid niaquec mibi icsaic. Mëteshunniac bedtiapimbo yacbimbuen mimbi icsambuen naid ënta. Ënenquio icsho Nuquin Papan ënëdenquio yec chian annëdënquiacno nësecaquin cuidnushe.

^45-46 Adembidi min taën capuquin icsambuen naquin Nuquin Papan Chiaid niaquec mibi icsaic. Tateshunniac caputiapimbo yacbimbuen mimbi icsambuen naid ënta. Ënenquio icsho Nuquin Papan ënëdenquio yec chian annëdënquiacno nësecaquin cuidnushe.

⁴⁷ Adembidi min ëshën isquin icsambuen naquin Nuquin Papan Chiaid niaquec mibi icsaic. Ëshë chicshunac istiapimbo yacbimbuen mimbi icsambuen naid ënta. Ënenquio icsho Nuquin Papan ënëdenquio yec chian annëdënquiacno nësecaquin cuidnushe.

⁴⁸ Ënëdenquio yec chian annëdënquiacno nësecacsho macun uënësmenquio icquin mibi pendac.

⁴⁹ Padnuen pambid sa casecashun shëacbimbuec Nuquin Papa tantiaquid icnu, queshun mimbi icsambuen naid ënmiac nainquio yec mibitedi bëdambo yanendac.

⁵⁰ Sa bëdambocquid bëdambo iquec. Sa bëdambo icbuedi icsacsho ¿Mitsipaden bëdambo icmeuapec? Sa bëdambocquid casecac daëdacsho petiadquio yacbimbuec utsibobëd bëdambuec tabadta, quepanëdash Esus.