Madcos 6 - El Nuevo Testamento en matsés

Esus Nasaded yacno nidaid

¹ Auëshquio puduanec nidequi abi caninëdacno shubu daëdpactsëcquid Nasaded yacno Esus abëd icquidobëd nidpanëdash.

² Ambo nidshumbic chonoadtemaid uëshën Nuquin Papan Chiaid chuibante shubun puduedshun Nuquin Papan Chiaid chuibanquin tauapanëdash Esusën. Aden chuibansho tantiashien tantiadempambo yec tabadec: ¿Mitsi padombuen dadpen tantiabempash nepeba? ¿Tsuntsin bëdambuen tantiamepashba? ¿Mitsipadquiec nadatiambo icquin nabanquin bëdanmianquid yampashba? quecuededpanëdash.

³ Adnubic utsibo: ¿Madian mado cute chëshshun nacnenquidpenquioda nedic? Ma aton utsibo nëidted nëmbobi icpayoc. Nëidic Santiaco. Utsibic Ose. Utsibic Udas. Utsibic Simon. Adecbidi aton chibi chedo nëmbobidi icquido neuaic, quequin Esus chieshënquin aidën chuibansho tantiate bunenquio iccuededpanëdash.

⁴ Adoaqui Esus nadpanëdash: Naden nuquin matsesën chuidennec. Utsi yacno nidshun Nuquin Papan oncamiaidën chuibansho tantiaquid dadpen icnubi abi icnëdacnoshon chuibansho chieshënquid aton matses iquendac. Aton shubun icquido adecbidi iquendac, quepanëdash.

⁵ Aden abi tantiate bunenquiocsho issun nadatiambocquin dadpen nabantiapimbo icpanëdash. Ubi bëdanmepatsiash icnundac, quequin tantiaquidquio nënquido daëdpactsëc icsho mishquin bëdanmebampanëdash.

⁶ Aden bëdanmetanec: ¿Atotsi quiash umbi chuibansho tantiate bunenquio mibi icpe? quepanëdash Esus. Adashic auëshquiobi puduanec nidanneshun uanno nidenquio yec anoentsëqui shubu daëdpactsëc icquid utsi utsiec yacno capucuennequin Nuquin Papan Chiaid Bëda Esusën chuibennepanëdash.

3. Mibi Nuquin Papan chomiaid nec, quequin chiaid ( 6.6—8.30 ) Abëd icquido 12tedi: Nuquin Papan namiacno tabadte nëbi iquec, camequin Esusën nidmiaid

⁷ Aden chuibenneshumbi abëd icquido 12ted: Cho, catanquin Esusën chuipanëdash: Nëbi mibitedi nidmembique. Daëd daëdquiec nidanneshun chuibennequimbi umbi nabocpadombuembidi podobitsi icsa dapuduedaid icsho umbi namiac mimbi dapuduenmendac.

⁸ Nidquin dadpen mitsana sauedshun buanenda. Adec nidquin mimbi sanante cuesteuidtsëqui buanquin petebëta piucquid buanenda.

⁹ Tapucudte tapucudash nidanneta. Utsi buanenda. Adembidi dashcute utsi buanenquio yec mibi dasiuidaiduidtsëqui dasiuidec nidanneta.

¹⁰ Shubu dadpen yacno nidash mibi iuedquidën shubun puduedash ambouidi ushquin chuibanta. Auëshquio nidabi yec aidën shubunuidtsëqui icquin chuibanta.

¹¹ Mibi iuedenquio icquin mimbi chuibansho tantiate bunenquiocsho isash nidanneta. Adec nidnumbi: Nëmbo icquido Nuquin Papa tantiesabo yec icsaquidombo icsho Nuquin Papan cuidtequidombo mibitedi nec, quequin ismec nidaid putu tabesqueta, capanëdash Esusën abëd icquido chuiquin.

¹² Aden Esusën chiaquien abëd icquido nidannepanëdash. Adec nidshumbic: Mimbi icsambuen nabanaid ënshun Nuquin Papa tantiabenuata, quequin chuibampanëdash.

¹³ Adembidi podobitsi icsa dapuduedaid dadpen dapuduenmebampanëdash. Adembidi nënquidobëta daicsaido dadpen icsho cute bacuë bëchin manoshcabanquin dadpen bëdanmeuapanëdash Esusbëd icquidon.

Uan acten mentoanquid cuessunniaid

¹⁴ Adnubien utsibo: Chuibanquimbi Esusën nadatiambocquin nabanosh, quequin isbuedon chuisho chuiquid tapa Edodes Antipasën tantiapanëdash. Adembidi dadpenshun chuisho Esusën nabanaid tantiapanëdash. Aden tantiashun: Uan acten mentoandedned mapi butemiondaid uincuempash icnui. Adec uincuenshumbien nadatiambocquin nabanchitash, quecuededpanëdash tantiaquido.

¹⁵ Utsibobic: Nuquin Papan oncamiampid Edias nepanui, quecuededpanëdash. Utsibobic: Ëndenquimbo Nuquin Papan oncamiampid utsi uincuenaid nepanui, quecuededpanëdash.

¹⁶ Adsho tantiashien Edodes Antipas: Umbi mapi butemiondaidi Uan pado uincuempash icnui, quepanëdash.

¹⁷ Ënden aidëmbi Uan bedmeshun shocosh bucu nacnenaidën tanemeshun quënën tsadunmepanëdash. Aidëmbi aton utsi Uedipon chido Edodias bedacsho issun Uanën:

¹⁸ Min utsin chidobi bedquin mimbi icsambuen nac, quequin chiac chieshënquin Edodesën Uan bedmeshun quënën tsadunmepanëdash.

¹⁹ Adoacsho issumbien aton chido Edodiasën Uan chieshënquin: Cuessunnemetiadquidi mibi nec, capanëdash aton bënë Edodes cain. Adoac aid cuessunnemete bunequi cuessunetiapimbo icpanëdash.

²⁰ Uan Nuquin Papa tantiaquidquio yec bëdambocquid nec, queshun dacuëdquin cuessunnetiapimbo yec Edodes Uan cudaspanëdash: Cun chidon cuessunnemenushe, quiash. Aden tantiaquin Edodesën abi tsadacno Uan chuibanmenuen chomedednepanëdash. Uanën chuibansho tantiash: ¿Mitsipadopembimbi nëid iqueba? Ambi chuibanaid bëdambo iquec. Aidën chuisho tantiash bëdambo iquebi, queshun Edodesën chomedednepanëdash.

²¹ Adec aton chido Uan cuessunnemete bunnubien aton bënën abi tishaid uëshë tantiaquin pemenuen nëidtedi chuiquido chochomepanëdash. Nëidic abëtan chuiquid. Nëidic sondadon chuiquid tapatedi. Nëidic nidaid Cadidea yacnocquidon chuiquid tapatedi quequin chochomepanëdash Edodesën.

²² Aden chochomiash aidobëd pec tabadnubien aton chidon champi puduedash shëcshëcquec bidiadtanepanëdash. Adec shëcshëcquec bidiadtanesho isash: Bëdambuen mimbi naoc, quecuededpanëdash Edodesbëdi ambi chochomiaido champi caic. Aden chuisho tantiashumbien Edodiasën champi chuiquin: Mibi bunaidquio mibi menenu. Ubi chui.

²³ Nuquin Papan tantianubi abimbo caimbique. Mibi bunaid ubi chuita. Mimbi namiacno nidaid tembi daëdquio cuëshaid bunebi, mimbi ubi casho tantiashun aidtembi cuëshaid mibi menembi, capanëdash.

²⁴ Aden Edodesën chuisho tantiash: ¿Atotsimbi chuipeba? quetanec aton tita yacno puduedshun: Mibi bunaid mibi menenu. Ubi chui, Edodesën caoshibique. ¿Atotsimbi chuipe? quepanëdash aton tita chiec. Adsho tantiashun aton titan: Uanën mapi bunebi, quequin chuita, capanëdash.

²⁵ Aden chiaquien badedquio Edodes yacno titinquianec choec puduedshun champin: Nëbimbobi Uan acten mentoanquidën mapi pada padaidën annanshun ubi mene, capanëdash aton titan chuibocpadombuen chuiquin.

²⁶ Adsho tantiash Uan tantiec Edodes uënësquio icpanëdash. Adec uënësquiocquimbi ambi chuibued niacte bunquimbi niactiapimbo icpanëdash. Umbi chochomiaidon: Mibi muambo nec, canushe, quetanquin:

²⁷ Uanën mapi butetan, capanëdash Edodesën sondado chuiquin. Adoac nidshun quënën tsadacnobi Uan mapi butetanquin

²⁸ pada padaidën annanshun bëshun champi meniac buanshun aton tita menetuidpanëdash.

²⁹ Adnubien: Uan mapi butiac caosh, quesho tantiash abëd icquido chochoshon Uanën dada bedanquin buanshun chococatampanëdash.

Dada 5midted Esusën pemiaid

³⁰ Adoambic Esusën: Ubi chuibenneta, caido ambi nidmebuedo padpidec Esus yacno chochouashun ambi nabanaidbëtabi ambi chuibanaid chuituidpanëdash.

³¹ Aden chuibanash tabadnubi matses dadpen nidannenubi utsibo chochosho isash: Penuna, quenquio icpanëdash Esus abëd icquidobëd. Adsho isashien Esus: Matses nibëdacno tabadec tiboquec nidnunid, quepanëdash abëd icquido caic.

³² Aden chianec cano dapa antabëdtoanec nidec matses nibëdacno abëd icquidobëdtsëqui Esus nidpanëdash.

³³ Adec nidsho matses dadpenshun isbededquimbi abi nidte yacno tantiec: Ambo nidequi nec, quianec shubu dadpen icquid utsi utsiec yacnouësh chochoquido titinquianec abia nidannepanëdash.

³⁴ Adec aidtedi abia chochoambien Esus abëd icquidobëd choquin cano nandopanëdash. Aden nandoash pudundoquimbi matses dadpenquio abi cainec tabadsho isash Esus: Abi dayun uaquid nibëdnuc nëish iua obeca icsambuec tabadacbimbuec icsambuec tabadquido chochoac, quequin aido uënësquiocquin tantiaquin Esusën dadpenquio chuibampanëdash.

³⁵ Uëshë budsho istanquin abëd icquidon Esusën dayuntsëc choshon: Pete nibëdacno nuqui tabadnubi inchësheque.

³⁶ Nidanneme, Icbo. Shubu dadpactsëcquid utsi utsiec yacno nidshun piucquid menequin ma pete bedtannu, capanëdash.

³⁷ Adoaquien Esusën: Mibitedishun pemeban, capanëdash. Adsho tantiashumbien abëd icquidon: ¿Ubitedi nidshundambi piucquid dadpenquioshë 199tedec ushec chonoadacsho issun meniactedi menequin pan bedtampe? quepanëdash.

³⁸ Adoaquien: ¿Pan penun bëaid iccuededquidona tedtsi iqueque? Mibitedishun istan, capanëdash Esusën. Aden chiac matsesën bëbëaid istuidshun bedash abëd icquido: Pan 5ted icnubi nuëcquid daëd iquec, quepanëdash.

³⁹ Aden bedshun abëd icquido chiac: Nëmbo iccuededquidobëd utsibo uasinën tabadbudme, capanëdash Esusën iccuededquido chuiquin.

⁴⁰ Adoac 50ted 50tedquiec tabadbudnubi utsibo 100ted 100tedquiec tabadbudpanëdash.

⁴¹ Adec tabadbudsho istanquin pan 5tedbëta nuëcquid daëd sananquin abuc isec: Mibi bëdambocquid icquin mimbi meniaid nëid pete nec, Papa, quec onqueshun pambëta nuëcquid cuëshbudcuenquin menequin: Nëid meneban, Esusën cac abëd icquidon menebampanëdash.

⁴² Aden meniac pebededash: Pequiombi, quecuededpanëdash abitedimbo.

⁴³ Aden pebededan napi uaid bedbanshun sandoaid tsitsan dapa tambanac 12ted icpanëdash.

⁴⁴ Aden pebuedo dadatedi tambanac 5midted icpanëdash.

Acte bëntse Esus choaid

⁴⁵ Adshumbic Esusën abëd icquido chuiquin: Mibia nidquin shubu dadpen icquid Betsaida yacno chian potec nidta, capanëdash. Adoac cano antabëdtoanec chian potec nidnubi tëshëdshun Esusën abi datsidadquidotsen: Nidannec nid, quequin nidmepanëdash.

⁴⁶ Aden matsestedi nidmianec macuësh tapa yacno Nuquin Papa chiec Esus nidpanëdash.

⁴⁷ Adnubien inchëshbudtsëqui abëd icquido chian dapa nënantanquio cano dapan nidpanëdash. Adec nidnubi tëshëdbosh Esus abentsëqui mananuc tsadpanëdash.

⁴⁸ Ashunquio Esusën isnubi abëd icquido bëdiactsëcquio nidshobi cunquequid tapa choquidën bëded bëdedaqui cumapenen uncabededpanëdash. Adnubien badiadte anoentsëqui acte bëntse choquin abëd icquido Esusën datantsenquimbi ismepanëdash.

⁴⁹ Adec acte bëntse chosho istanec: Podobitsi nec, quec

⁵⁰ dacuëdtanec sidquecuededpanëdash abëd icquido. Adsho issumbien: Ubi neque. Dacuëdenda, capanëdash Esusën.

⁵¹ Aden chuitanec cano antsadtonobi cumapenec cunquebuedi ënëdpanëdash. Adec ënëdsho isash tantiadempambo yec tabadec: ¿Mitsi padquid nepec? quecuededpanëdash abëd icquido.

⁵² Pete daëdpactsëc icquidi matses dadpen pemebambuedën nac nec, quequin tantienquio yec pamunacbimbuec icpanëdash.

Quenesaded yacnoshon Esusën nënquidobëta daicsaido bëdanmiaid

⁵³ Aden chian dapa potiash nidaid Quenesaded caid yacno choshon cano nëshpanëdash.

⁵⁴ Aden nëshan pudundosho issun ambocquidon: Bëdanmianquid chosh, quequin tantianec

⁵⁵ badedquio shubu utsi utsiec yacno nidanneshun chuibenniac nënquidobëta daicsaido nandoten nandoshon Esus yacno bëbëpanëdash.

⁵⁶ Adecbidi shubu dadpen yacno yacnombuec Esus capucuennesho issun adembidi ambocquidon: Bëdanmianquid nec, queshun Esus nidaid podquied cuëman sambannuen daicsaidobëta nënquido bëbëpanëdash. Aden bëbëshun sanac samëdsho issun: ¿Ada min dashcute cuëma daicsaidobëta nënquido mishmetsia? cac Esusën mishmiaidtedi bëdancuededpanëdash.