Madcos 3 - El Nuevo Testamento en matsés

Chonoadtemaid uëshëmbi mëicsatsaid Esusën bëdanmiaid

¹ Adashic padpidec Nuquin Papan Chiaid chuibante shubun Esus puduedpanëdash. Ambo dada mëicsatsaid tsadnubi

² Esusën bëdanmesho isnuec padiseobo tabadpanëdash. Adec tabadec: Nëid uëshë chonoadtemaid icnubi Esusën mëicsatsaid bëdanmesho isnu. Bëdanmesho issun: Mimbi icsambuen naic, canuna, quiash tabadcuededpanëdash.

³ Aden tantiec tabadnubi mëicsatsaid chuiquin Esusën: Nëmbo nënantanquio cho, capanëdash.

⁴ Adoac choec nënantanquio mëicsatsaid nidtuidnubi ambo iccuededquido chiec Esus: Chonoadtemaid uëshën matses tantiaquin bëdambuen naquimbi ¿matses icsa uapendambi ique? ¿Nëid uëshëndambi matses bëdanmenquio icpe? ¿Bëdanmenquio icquindambi: Ma adequi uënësnu, cape? quepanëdash Esus. Aden chuisho tantiash ëcbedenquio yec padiseobo tabadpanëdash.

⁵ Adsho isash nëishtanquin abi datsidadquido bëisbanec uënësquio yec Esus: Nuquin Papan Chiaid tantiaquin naisa yec matses tantiatiapimbo icquido nec, quequin ambibi tantiec: Uënësquio iquebi, quetanquin mëicsatsaid chuiquin: Ubi mëd, Esusën cac mëdequi aton mëdante bëdampanëdash.

⁶ Adosho isash puduenanec nidquin Edodesbëd icquido padiseobon badedquio istuidpanëdash. Aido istuidash: Esus uënës uate mibi bunacpadquiecbidi bunebi. ¿Mitsi padombuen uënës uamenuen Esus bedmetiad? quecuededpanëdash padiseobo.

Esus yacno matses dadpen chochoaid

⁷ Adnubien abëd icquidobëd Esus chian Cadidea caid yacno nidpanëdash. Adec nidsho issun nidaid Cadidea yacnocquido dadpenshun Esus tsibanampanëdash.

⁸ Adnubien Esusën nadatiambocquin nabansho isbuedon chiac nëidtedi yacnocquido Esus isnuec chochopanëdash. Nëidic nidaid Udea yacnocquido. Nëidic shubu dadpen icquid Edusaden yacnocquido. Nëidic nidaid utsi Idumea yacnocquido. Nëidic acte Odan uëshë choacno ëquëmatsiuc icquido. Nëidic shubu dadpen icquid Tido yacnocquido. Nëidic shubu dadpen icquid Sidon yacnocquido quec chochopanëdash.

⁹ Adec dadpenquio chochoash tsucus tsucustsëcquio yec tabadquin tsicatiac Esus: Ubi tsicatequieque. Cano bec cho, quiampanëdash abëd icquido caic.

¹⁰ Dadpen bëdanmiosh, cadoshe. Ubitsen bëdannu, quec chochoshon: Ubitsen ma mishnu, quec Esus mishte bunec nënquido dadpen datsidadec chochopanëdash.

¹¹ Adnubi podobitsi icsa dapuduedaido choquin Esus istuidequi dannëshën sebudec cumapenec sidquec: Nuquin Papan Madombo mibi nec, quec cumapenec cuëdpanëdash.

¹² Adoaquien: Aden chuiquin utsibo tantiamenda, quequin Esusën chushcapanëdash.

2. Nuquin Papan namiacno tabadtequid iquec, quequin matsesën tantiacmaid chiaid ( 3.13—6.6 a) Nuquibi icnu. Cho, quequin abëd 12ted ictequido Esusën chiaid

¹³ Adshumbic macuësh tapa dectatoec nidnun abi tsibanquido utsi utsien chuipanëdash. Aden chiac chochoacsho issun

¹⁴ ambi tantiaidtedi 12tedtsëqui chuiquin: Ubëd tabadquin umbi chiacpadombuen mimbi tantiabenendac. Adquid icsho issun umbi chiacpadombuen Chiaid Bëda chuibanmenuen mibitedi nidmembi. Adquido icsho: Esus chuibennequido, quequin cuënaido mibitedi nendac.

¹⁵ Adembidi podobitsi icsa dapuduedaid dapuduenmequidbidi mibitedi icmembi, quequin abëd icquido Esusën chuipanëdash.

¹⁶ Ambi: Ubi chuibenneta, caidombo nëidtedi icpanëdash. Simon cashumbic Petedo caid.

¹⁷ Nëidic Sebedeon mado Santiacobëd Uan. Aid daëdi: Abu cuëdquidën mado nec, quequin Buanedquis, quequin cuëmpanëdash.

¹⁸ Nëidic Andedes. Nëidic Uedipe. Nëidic Badtodome. Nëidic Debi cashumbic Mateo cuënaid. Nëidic Tomas. Nëidic Adpeon mado Santiaco. Nëidic Tadeo. Nëidic Simon cananebo caid.

¹⁹ Nëidic Udas Iscadiote. Aidi abi chieshënquido Esus bedmequid nepanëdash. Aidtedi Esusën: Ubi chuibenneta, caido nepanëdash.

Bedsebu caidën tantiamiaid Esus nec, quequin chuishunaid

²⁰ Aden chianec nidequi abëd icquidobëd Esus shubun puduedpanëdash. Shubun puduednubi matses dadpen chochoash tsucus tsucustsëcquio yec tabadsho issun Esusën abëd icquidobëtambi petiapimbo icpanëdash.

²¹ Aden penquio iccosh, quequin chuituidac aton utsibobëd aton tita Esus bednuec chopanëdash. Icsabudec tantiadenashien nechitash, quiosh matses, quesho tantianec puduanec chopanëdash.

²² Adecbidi Moisesën chiampid tantiamequido Edusaden yacnouësh choshon Esusën podobitsi icsa dapuduedaid dapuduenmesho isbuedo nadec onquepanëdash: Podobitsi icsan icbo Bedsebu caidën namiaid icquimbien Esusën podobitsi icsa dapuduenmequin nachitec, quepanëdash.

²³ Adoaquien Esus: Mibi tantiamete chuibannu. Tantiec cho, quetanquin: ¿Mitsipaden Mayan Icsa Satanasën ambi iuaidon icbo icquimbi ambi dapuduedmiaidi dapuduenmepatsiash? Padenquio ictsiash.

²⁴ Chuiquid tapan nëishshun abëd icquido cumapenen chushcac: Aidbëd ictiapimbo iquebi, quianec cuëshcuëshëdec niqueshun chieshënac aidon chuiquid tapa ictiapimbo iquendac.

²⁵ Adquiecbidi shubu icbo abëd icquido chushcaquin nicash aidobëd shubu abentsëquën bëdambuec tabadtiapimbo iquendac.

²⁶ Adquiecbidi Mayan Icsa Satanasën ambi dapuduedmiaidi dapuduenmiash aidon icbo ictiapimbo ictsiash.

²⁷ Shubu icbo dada uidënquiocquid icsho: Aid ampeshunnu, quequin dataneshunuidtsëqui ampeshuntsiash.

²⁸ Tantia. Abimbo chuinu. Matsesën icsambuen naidtedi tantienquio yec Nuquin Papa bëshunendac. Adecbidi Nuquin Papa icsambuen chuishumbuedëmbi: Ubi bëdambuen ista, Papa, quesho tantiashun aidën icsambuen naid tantienquio yec Nuquin Papa bëshunendac.

²⁹ Padnuen Nuquin Papan Mayan Bëdan namesho issumbi: Icsambo iquec, quequin icsambuen chuishunquid icsho issun aidën icsambuen naid tantiec Nuquin Papa bëshuntiapimbo iquendac. Nëbi bëshunenquio icashic adecbidi iuecash bëshuntiapimbo iquendac. Bëshuntemaid nec, quepanëdash Esus.

³⁰ Podobitsi dapuduedshumbien Esusën naic, abi caquido chiec adpanëdash Esus.

Esus yacno aton utsibobëd aton tita choaid

³¹ Adnubien Esus yacno aton titabëd aton utsibo chopanëdash. Adec choash matses dadpen nuntan tabadsho isash umanuc tabadtuidshun: Tita chosh, quequin chuitan, capanëdash utsi chuiquin.

³² Adoac puduedshun Esus nënantan tsadsho istuidshun: Titabëd min utsibo chochoshon mibi isnuen umanucshun cainec, quequin chuipanëdash.

³³ Adoaquien Esusën: ¿Mitsicquid cun tabëd cun utsibo nepec? quetanquin

³⁴ abëd tabadquido isquin chiec: Nëido cun tabëd cun utsibo nec, caimbi, quepanëdash Esus.

³⁵ Adashic: Nuquin Papan chiacpaden nabanec tabadquid icsho dada cun utsi caquimbic chido cun chibi catanquimbi utsi: Cun ta nec, caimbi, quepanëdash Esus.