Madcos 16 - El Nuevo Testamento en matsés

Esus uincuenaid

¹ Aden isboshic chonoadtemaid uëshë inchëshbudec naimëdnuc Madia Macdadena yec Madia Santiacon tita yec Sadome yec quec nidshun aton piucquid menequin bëdambo nuadnuc: Esus danoshcatannu, quequin danoshcate bedpanëdash.

² Adnubi dominco uëshë badiadnuc uëshë chënquecuntsëcnubi ambi bëdambo nuadte bedbued buanec Esus chocoquiacno nidannequi:

³ ¿Tsuntsin cuënote dapan bëtashbued nuqui shëcneshumpec? quec onquenidpanëdash.

⁴ Adec onquenidquimbi cuënote dapan bëtashbued shëcniacsho istuidpanëdash. Aid cuënote dapa nuamboshë yec iuëmboshëcquid nepanëdash.

⁵ Aden shëcniacsho isash shëcuën puduedquin isaquien dada cania dashcute ushumboshëcquid dasiuidash abiucquio tsadsho ispanëdash. Aid istanec chidobo dacuëdcuededpanëdash.

⁶ Adsho issumbien: Dacuëdenda. Esus Nasaded yacnocquid cueste napotiaidën dectanquin uënës uabued mibitedishun nibënaid uincuenanec nidosh. Nëmbobi nanac uebuedi nibëdeque. Is.

⁷ Abëd icquido naden chiec nid: Nidaid Cadidea yacno abia nidshun mibi cainec. Ashunquio mimbi Esus isendac, quequin Esusbëd icquid utsibobëta Petedo chuituidec nid, quepanëdash chidobo chiec.

⁸ Aden chuisho tantianec Esus chococaid shëcuënuësh puduenanec titinquianec dacuëdec uëdëquequin utsibo chienquio yec chidobo nidannepanëdash.

Esusën Madia Macdadena ismiaid

⁹ Adnubien uincuenshun dominco badiadnuc Madia Macdadenaba Esusën ismepanëdash. Aidi ambi podobitsi icsa 7ted dapuduedaid icsho dapuduenmiondaid nepanëdash.

¹⁰ Aden ismiac nidec Esusbëd icquido yacno puduedshun uënësquio icnuc shubiec tabadsho: Nuquin Icbo uincuenacsho isombi, quequin Madian chuituidpanëdash.

¹¹ Esus uincuenash capusho isombi, Madia quesho tantiashun: Mua. Aidquio mimbi istiapimbo iquec, quec tantienquio yec tabadcuededpanëdash.

Esusën abi tantiaquid daëd ismiaid

¹² Adashic tantienquio yec tabadbued icnubi dada daëd Edusaden yacnouësh podquiedën nidsho Esusën chinuntuidpanëdash. Aden chinuntanec aidobëd nidannec shubun puduedshun ismebempanëdash Esusën.

¹³ Aden ismiac aid daëdi aucbidi Edusaden yacno niduashun ambi isbued chuituidpanëdash. Aden chiac: Muequi nec, queshun tantienquio icuapanëdash utsibon.

Esusën abëd icquido: Chuibenneta, caid

¹⁴ Adashic abëd icquidombo 11ted pec tabadte yacno tabadnubi Esus isadcuempanëdash. Adec isadcuenshun: Uincuenaccosh, quequin ubi isquidon chiaqui tantiate bunenquio mibi iccoque. Chobique. Is, capanëdash.

¹⁵ Aden chuishumbic: Nëbi nidaid utsi utsiec yacno nidanneta. Adec nidshun: Nuquin Papan namiacno tabadte iquendac, quequin Chiaid Bëda chuibenneta.

¹⁶ Aden chuisho tantiaquid: Ubi cuidenquio icnuen Esusded Nuquin Papan cuidpanëdash. Adoaid tantiaquin: Umbi icsambuen naid ënnu, quequin ismequin acten mentomequid icsho Nuquin Papan abi yacno puduedmendac. Ubi tantiesain Nuquin Papan abi yacno puduedmenquio icquin cuidendac.

¹⁷ Abi tantiaquid utsi utsien Nuquin Papan nadatiambocquin nabanquid icmendac. Adquid icmiaidën umbi nabanondacpadombuen podobitsi icsa dapuduedaid icsho dapuduenmendac. Adembidi utsibon onquete tantienquio icbuedëmbi abi uëshëmbi tantiashun umbi naid chuibanendac.

¹⁸ Adembidi nisin piaqui bidisquenquio iquendac. Adembidi: Uënësmenu, quequin dauë icsa acmiaqui uënësenquio iquendac. Adembidi nënec uënëstiadtsëcquio icquid icsho mishac bëdanendac, quepanëdash Esus.

Esus abuc indote chiaid

¹⁹ Aden chuibanquin ënshobi abuc indoac Nuquin Papan dayun abiucquio Esus tsadtuidpanëdash.

²⁰ Ambo tsadquimbi nadatiambocquin namiac abëd icquidon nidaid utsi utsiec yacno nidanneshun: Nuquin Papan namiacno tabadte iquec, quequin Chiaid Bëda Esusën naid chuibennepanëdash. Aden chuibennesho: Umbi namiaid nec, quequin Nuquin Icbon nadatiambocquin namebampanëdash.