Madcos 15 - El Nuevo Testamento en matsés

Chuiquid tapa Pidato Esus meniaid

¹ Badiadbudnubi isadaidbon chuiquido nëidted iccuededpanëdash. Nëidic Nuquin Papa ismequin nëish iua cuessunneshun pichicaquidon chuiquido. Nëidic Moisesën chiampid tantiamequido. Nëidic isadaidbon chuiquid tsësiobo. Aidtedi iccuededec onqueshun Esus mëtaneshun buanshun Doma yacnocquidon chuiquid cobednadod caid Pidato cuëmëdquid menepanëdash.

² Aden meniac: ¿Isadaidbon chuiquid tapada ne? capanëdash Pidaton Esus chuiquin. Adoaquien: Mimbi chiacpadquid nebi, capanëdash Esusën.

³ Adnubien nëish iua cuessunneshun pichicaquidon chuiquidon: Esusën icsambuen nabanosh, quequin dadpen chiec onquecuededpanëdash.

⁴ Adsho tantiashun padpidembuen Pidaton: ¿Ëcbedenquio yecta tsade? Ma mimbi icsambuen naid dadpen nëidon chuibampayoc, caqui

⁵ ëcbedananenquio yec Esus tsadpanëdash. Adec tsadsho isash tantiadempambo yec Pidato tsadpanëdash.

Esus cueste napotiaidën dectan, quec cumapenec cuëdaid

⁶ Adshumbic: Tsusedpabon: Ma cun mado uënësmenquio icnu, queshun obeca caniactsëc cuessuniampid tantiate uëshën setan setanquien Pidaton: Quënën tsadunmiaid abentsëc chicquin puduenmenu. ¿Mitsicquidimbi chicpe? cac isadaidbon: Nëid chic, cac Pidaton chicquin puduenmedednepanëdash.

⁷ Adoaid ictednenubi quënën tsadunmenëdaid Badabas cuëmëdquid icpanëdash. Aidi utsibobëtan Doma yacnocquidobëd icte bunenquio icquin cuessunnianquid icsho issun bedmeshun quënën tsadunmenëdaid nepanëdash.

⁸ Adnubien: Pidaton setan setanquien quënën tsadunmiaid abentsëc ambi chictedniondacpaden nëbi adquid utsi chictsiash, quequin tantiec Pidato yacno isadaidbo chochopanëdash. Adec chochoshon: Quënën tsadunmiaid chictedniondacpaden abentsëc chicquin puduenme, cabededpanëdash Pidato chuiquin.

⁹ Adsho tantiashumbien Pidaton: Isadaidbon chuiquid tapa nebi, quebuedtambi ¿nidmepe? capanëdash.

¹⁰ Ubi chuiquid tapa icmenquio icquin Esus chuiquid tapa icmenushe, queshun chieshënquin nëish iua cuessunneshun pichicaquidon chuiquido Esus uënës uamete bunec, quequin tantiaquin Pidaton aden chuipanëdash.

¹¹ Adnubien Nuquin Papa ismequin nëish iua cuessunneshun pichicaquidon chuiquidon ambo tabadquido chuiquin: ¿Adambi Esus nidmepe? quequin Pidaton chiac: Padi. Badabas chicquin puduenmeta, quequin chuidoneta, quequin chuipanëdash. Adoac aden chuibededpanëdash.

¹² Aden chuibededac padpiden chuiuaquin: Mibitedishun: Isadaidbon chuiquid tapa nec, cabued icsho ¿atotsimbi nape? capanëdash Pidaton.

¹³ Adoaquien cumapenec cuëdcuededec: Cueste napotiaidën dectanme, quecuededpanëdash.

¹⁴ Adoaquien Pidaton: ¿Atotsi icsambuen nasho mimbi adope? caquien buëdanquiec cuëdcuededec: Cueste napotiaidën dectanme, quecuededuapanëdash.

¹⁵ Adsho tantiash: Isadaidbon: Bëdambocquid nec, ma ubi canu, queshun Badabas chicpanëdash. Adshumbic: Cueshcaten Esus cacuesmetanquin cueste napotiaidën dectanquin uënës uatan, quequin sondado buanmepanëdash Pidaton.

Sondadon Esus mamënshunaid chiaid

¹⁶ Adoac Esus bedshun abi tabadtenniacno shubu dapa tsicatequin daquënë uacno nuntan sondadon buampanëdash. Adoshombic sondado utsibo dadpen chochomepanëdash.

¹⁷ Chochoshon dashcute dapa piu piumbocquid chuiquid tapa dasiuidacbimbuecnuc dasiuinshun mauete pinchuc pinchucpambo icnuc nacnenaid Esus mauemepanëdash.

¹⁸ Adshumbic chuiquid tapa cuënacbimbuen cuënquin: Mibi isash bëdambo iquebi, isadaidbon chuiquid tapa, quequin Esus oncaquin mamënshumbededpanëdash sondadon.

¹⁹ Adotanquimbic ambi cueste sananmiaid bedshundednequin sondado abentsëcshun abentsëcshunquien macuestanquin bëpishtucatanec dannëshën sebudec shuebudshun: Chuiquid tapa nec, quequin mamënshumpanëdash.

²⁰ Aden oncaquin mamënshumbededtanquin dashcute dapa piu piumbocquid ambi dasiuimbued dachictanquin aton dashcutebidi dasiuinuapanëdash. Adoshon: Ma uënësnu. Cueste napotiaidën dectanec nidnu nid, quianec nidquin Esus buampanëdash.

Esus cueste napotiaidën dectanaid

²¹ Aden abi dectante cueste napotiaid Esusën buanquin iuënmenubi abi datanquid dada Simon cuëmëdquid icsho issun sondadon cueste chiadtometanquin buanmepanëdash. Aid dada shubu dadpen icquid Sidene yacnocquid yec aton tied yacnouësh choquid nepanëdash. Aidbidi Adejandobëtan Dupon papa nepanëdash.

²² Aden cueste napotiaid buanmec macuësh tapa mapi canitebimbuec isadquid yacno chopanëdash. Aidi cun onqueten mapi canite quequin Codcota quequin cuënaid nepondash.

²³ Ambo choshon uba chinaid paë uaid dauë mida caid nëcushtanquin meniac Esusën aquenquio icpanëdash.

²⁴ Aden isuidsho istanquin cueste napotiaidën dectampanëdash. Aden dectanshun: Aton dashcute bednu, quequin sondadobon abi cuëmëdquidtedi dada uabanshun tëchun sandoshon cadotannequin dada uaidëmpi abia puduenquid isbanquin Esusën dashcute bedpanëdash.

²⁵ Uëshë abuctoec 9 yannuc Esus cueste napotiaidën dectampanëdash.

²⁶ Esus dectanaid mapino: Isadaidbon chuiquid tapa icsho cuidaid nec, quequin cueste pada uaidën dada uaid diadpanëdash.

²⁷ Cuesanquid yec ampequid daëd ëquë dectambudcuenquin dectantanquin nënantanquio Esus dectampanëdash.

²⁸ Icsambocquidbëta dectanendac, quequin Nuquin Papan chiampicpadembi napanëdash.

²⁹ Aden dectanac Esus diadsho aid isbidannequin mapi tacuquequin mamënshunquin naden chuipanëdash: Nuquin Papa tabadte shubu dapa chic chictanquin daëdec ushquin chuca uaimbi, quec mibi onquiondac.

³⁰ Nadatiambocquid yec: Nëbi uënëstiapimbo iquebi, quianec mibibi bud, cabidannepanëdash.

³¹ Aden chuinubi adembidi nëish iua cuessunneshun pichicaquidon chuiquidobëtan Moisesën chiampid tantiamequidon naden chuipanëdash: Utsi utsien bëdanmequimbi utsi uënësacsho uincuenmebued yec abibi budtiapimbo iquec, quepanëdash Esus caic.

³² Quidistu Nuquin Papan Chomiaid isadaidbon chuiquid tapa nebi, quebued yec mibibi bud. Adec budacsho issun: Quidistu nec. Mesias, quequin tantiendambi, quepanëdash. Aden aidon chuinubi abëta dectanaidon adembidi icsambuen chuishunuapanëdash.

Esus uënësaid

³³ Adnubien uëshë cuembo yannuc inchëshpondash. Uëshë cuembo icnuc bedanec uëshë budambi 3 icnuc cuësquec nidaid abichobimbo inchëshquio icpondash.

³⁴ Adec uëshë budec 3 yannubien Esus cumapenec cuëdec nadpanëdash: Edoi, Edoi, dama sabactani, quec cun onqueten: ¿Atotsi queshun ubi isenquio icquin niano? Papa, quec adpanëdash.

³⁵ Adec cuëdsho tantiash isquido utsi utsiec: Tantia. Nuquin Papan oncamiampid Edias cuënec neque, quecuededpanëdash.

³⁶ Adnubien Esus isec nidbuedi badedi titinqueshun uba chinaid mucambocquid nëcushtanquin shapu shapupactsëcquid puntanquin cueste dëdectanshun acmenu, quequin ëccuëscadonequimbi: Isbono. Edias Esus bedec chonoshe, capanëdash.

³⁷ Adnubien cumapenec cuëdtanec Esus uënëspanëdash.

³⁸ Adec uënësnubien Nuquin Papa tabadte shubu dapa yacno quënë uaid nuntan dectanaid dashcute dapa ënapen icquid abucuësh budec tembi daëdquio yec canchedbudcuempanëdash.

³⁹ Aden bëisec nidnubi Esus cumapenec cuëdec uënësso isash: Abimbo chuiquid niosh. Ma nëid dada Nuquin Papan Madombobi nepayoc, quepanëdash Doma yacnocquid sondadon chuiquid capitan caid.

⁴⁰ Adnubien ambobi uannoshon isec nëidted chidobo tabadpanëdash. Nëidic Madia Macdadena. Nëidic Madia utsi Osen tita. Aidi Ose tsibanquid Santiacon titabidi nepanëdash. Nëidic Sadome. Aidtedshun Esus ancuenquio diadsho isbededpanëdash.

⁴¹ Aido Esus tsibanshun nidaid Cadidea yacno capusho issun abi nashumbuedo uënësso isec tabadpanëdash. Adecbidi chido utsibo dadpen Edusaden yacno Esusbëd chobuedo Esus uënësso isec tabaduapanëdash.

Esus chococaid

⁴² Adashic biednes caid uëshë inchëshbudtsëqui: Chonoadtemaid uëshë yaneque. Esus chococatannu, quianec Esus tantiaquid utsi nidpanëdash.

⁴³ Aidi isadaidbon chuiquid tapa utsibobëd iccuededquid abentsëc Ose cuëmëdquid shubu dadpen icquid Adimatea caid yacnoshon tishaid yec: Ubi uënësabicnubi ma Nuquin Papan abitedishun Icbo icquin ambi namiacnoshon chomiaidën abitedi namete iquec, quequin cainquid yec dacuëdenquio iquec Pidato chiec nidpanëdash. Adec nidshun: Esusën dada bedshun chococate bunebique. ¿Ada ubi buanme?

⁴⁴ caquien: ¿Badedquioda uënëspash? quequin tantiaquin sondadon chuiquid capitan caid chomeshun Pidaton: ¿Ada Esus uënësaccosh? capanëdash.

⁴⁵ Adoac sondadon chuiquidën: Ai. Uënësaccosh, quesho tantiashun: Ai, bedshun buanta, capanëdash Pidaton Ose chuiquin.

⁴⁶ Adoac nidshun Osen piucquid menequin uënësaid chococanun dabidicate dashcute cuëshë bëdamboshëcquid bedshun Esusën dada imbudshun dataneshun buampanëdash. Adoshombic macuësh tapa cuënote shëcuë uaquin ambi ënden nacnenmiaidën nauedshun cuënote dapan bëtashpanëdash.

⁴⁷ Aden Esus chococasho Madia Macdadenabëtan Madia utsi Osen titan ispanëdash.